ရောင်နီ (NSS) - စက်တင်ဘာ ၆ 

          တရုတ်နိုင်ငံမှာရှိတဲ့ သားမွေးခြံတွေက တိရစ္ဆာန်တွေမှာ ဗိုင်းရပ်စ်ပိုး ဒါဇင်ပေါင်းများစွာ ကူးစက်ခံနေရတာတွေ့ရှိခဲ့ရပြီး အချို့ရောဂါပိုးတွေဟာ အသစ်ဖြစ်တဲ့အပြင် လူသားကိုပါ ကူးစက်နိုင်တယ်လို့ သုတေသီတွေက စက်တင်ဘာ ၄ ရက်မှာ ပြောကြားခဲ့ပါတယ်။ 

            Mink လို နို့တိုက်သတ္တဝါတွေဟာ ဗိုင်းရပ်စ်အသစ်တွေ ကူးစက်နိုင်ဖို့ ပိုမိုလွယ်ကူစေတယ်လို့ သိပ္ပံပညာရှင်တွေက Covid-19 ကူးစက်မှုတွေ ဖြစ်ပေါ်နေကတည်းက သတိပေးထားတာပါ။ Covid-19 ဗိုင်းရပ်စ် သုတေသနကို ဦးဆောင်ခဲ့တဲ့ ဗိုင်းရပ်စ်ဗေဒပညာရှင် အက်ဝက်ဟုမ်းက ကမ္ဘာလုံးဆိုင်ရာ သားမွေး မွေးမြူရေးလုပ်ငန်းဟာ "ကပ်ရောဂါ အသစ်တစ်ခု စတင်မယ့် ဖြစ်နိုင်ခြေအရှိဆုံး အရာတစ်ခုဖြစ်တယ်"လို့ ဆိုထားပါတယ်။ 

          တရုတ်ဦးဆောင်တဲ့ သုတေသီအဖွဲ့ဟာ ၂၀၂၁ ခုနှစ်မှ ၂၀၂၄ ခုနှစ်အတွင်း နိုင်ငံတစ်ဝန်းရောဂါကြောင့် သေဆုံးခဲ့တဲ့ Mink ၊ ယုန်၊ မြေခွေးနဲ့ ရက်ကွန်းလို တိရစ္ဆာန် (၄၆၁)ကောင်ရဲ့ အဆုတ်၊ အူ မျိုးရိုးဗီဇနမူနာတွေကို စစ်ဆေးခဲ့ပြီးနောက် ဒီသုတေသနစာတမ်းထွက်ရှိလာခြင်း ဖြစ်ပါတယ်။ အဖွဲ့ရဲ့လေ့လာမှုအရ အဲဒီတိရစ္ဆာန်တွေမှာ ဗိုင်းရပ်စ် အသစ် (၃၆)ခု အပါအဝင် ဗိုင်းရပ်စ် (၁၂၅)ခု တွေ့ရှိခဲ့တယ်လို့ ဆိုပါတယ်။ ၎င်းတို့ အနက် ဗိုင်းရပ်စ် (၃၉)ဟာ လူသား အပါအဝင် အခြားမျိုးစိတ်တွေကိုလည်း ကူးစက်နိုင်ခြေရှိတယ်လို့ ဆိုထားပါတယ်။