စော (NSS) - မေ ၂၈

ဆေးဝါးမှတ်ပုံတင်မရှိသော CORALAN အပါအဝင် အခြားဆေးဝါးများကို ဈေးကွက်၌ ရောင်းချမှုများရှိနေပြီး သုံးစွဲခြင်းမပြုရန် FDA Myanmar က ယမန်နေ့ (မေလ ၂၇ ရက်)တွင် အသိပေးထုတ်ပြန်ထားသည်။

 အစားအသောက်နှင့်ဆေးဝါးကွပ်ကဲရေးဦးစီးဌာနသည် ဈေးကွက်ရှိဆေးဝါးများကို ပုံမှန်စစ် ဆေးလျက်ရှိရာ အရည်အသွေး၊ အာနိသင်၊ ဘေးအန္တရာယ်အာမခံချက်မရှိသည့် ဆေးဝါးမှတ် ပုံတင်မရှိသော ဆေးဝါးများကို ဈေးကွက်အတွင်း ရောင်းချနေခြင်းအား တွေ့ရှိခဲ့ရကြောင်း ဆိုသည်။ သို့ဖြစ်ပါ၍ အများပြည်သူများ သိရှိသတိပြုနိုင်ရန်နှင့် သုံးစွဲခြင်းမှ ရှောင်ကြဉ်နိုင်ရန်အတွက် မှတ်ပုံတင်ရှိသောဆေးဝါးနှင့် တရားမဝင်ဆေးဝါး၏ ဓာတ်ပုံများကို FDA က နှိုင်းယှဉ်ကာ အသိပေးထုတ်ပြန်ထားသည်။

သုံးစွဲရန် မသင့်သောဆေးဝါးများမှာ CORALAN ၊ COVERAM ၊ COVERSYL ၊ daflon ၊ DIAMICRON MR ၊ VASTAREL OD နှင့် VASTAREL MR အမှတ်တံဆိပ်များဖြစ်ကြောင်းသိရသည်။ အဆိုပါတရားမဝင်တင်သွင်းထားသော ဆေးဝါးများတွင် မြန်မာနိုင်ငံဆေးဝါးမှတ်ပုံ တင်အမှတ်မပါရှိသည့်အပြင် စာသားများမှာ တူရကီဘာသာများဖြင့် ဖော်ပြထားကြောင်း သိရသည်။ တရားဝင်တင်သွင်းထားသော ဆေးဝါးများတွင် မြန်မာနိုင်ငံဆေးဝါးမှတ်ပုံတင်အမှတ်ပါရှိပြီး စာသားများမှာ အင်္ဂလိပ်ဘာသာများဖြင့် ဖော်ပြထားကြောင်းသိရသည်။