Pika  (NSS) - မေလ  ၂၇ 

     ရုရှားသမ္မတပူတင်သည် ဘီလာရုစ်နိုင်ငံသို့ နှစ်ရက်ကြာ အလည်အပတ်ခရီးစဉ်ရောက်ရှိနေပြီး နျူကလီးယားလက်နက်စစ်ရေးလေ့ကျင့်မှုများတွင် ဘီလာရုစ်နိုင်ငံ၏ပါဝင်ပတ်သက်မှုဆိုင်ရာ ဆွေးနွေးပွဲများကို လုပ်ဆောင်သွားမည်ဖြစ်ကြောင်းလည်းသိရသည်။ 

  ပူတင်က "နျူကလီးယားလက်နက်စစ်ရေး လေ့ကျင့်ခန်းရဲ့ ဒုတိယအဆင့်ကို ကျွန်တော်တို့ဆွေး နွေးသွားမှာပါ'ဟု ပြောဆိုခဲ့သည်။ မေလ(၂၃)ရက်နေ့တွင် Minsk အမျိုးသားလေဆိပ်တွင် ဘီလာရုစ်သမ္မတလူကာရှန်ကိုက ၎င်းကိုကြိုဆိုနှုတ်ဆက်ခဲ့ ပြီးနောက် ပူတင်က ယခုကဲ့ သို့ထုတ်ဖော်ပြောဆိုခဲ့ခြင်းဖြစ်သည်။ ပူတင်က "ဒီဆွေးနွေးပွဲက နျူကလီးယားလက်နက်စစ်ရေးလေ့ကျင့်ခန်းမှာ ကျွန်တော်တို့ရဲ့ ဘီလာရုစ်မိတ်ဖက်တွေ၊ လုပ်ဖော်ကိုင်ဖက်တွေရဲ့ တိုက် ရိုက်ပါဝင်ပတ်သက်မှုတွေနဲ့လည်း သက်ဆိုင်ပါတယ်"ဟု ပြောဆိုခဲ့သည်။ 

ရုရှားတပ်ဖွဲ့များသည် နိုင်ငံတောင်ပိုင်းစစ်ဘက်ခရိုင်တွင် မဟာဗျူဟာမြောက်နျူကလီးယားလက်နက်စစ်ရေးလေ့ကျင့်မှု ပထမအဆင့်ကို ပြီးခဲ့သည့် မေလ(၂၁)ရက်နေ့တွင် စတင်လုပ် ဆောင်ခဲ့ခြင်းဖြစ်သည်။ အဆိုပါ စစ်ရေးလေ့ကျင့်ခန်းသည် အနောက်အုပ်စုနိုင်ငံများက ယူကရိန်းကို စစ်လက်နက်ပစ္စည်းများ ကူညီပံ့ပိုးပေးကာ စစ်ပွဲအတွင်း နက်နက်ရှိုင်းရှိုင်းဝင်ရောက်လာမှုကို တားဆီးရန်နှင့် အနောက်အုပ်စု၏ ခြိမ်းခြောက်မှုများကို တုံ့ပြန်နိုင်သည့် ၎င်းရဲ့စွမ်းရည်ကို ပြသရန် ရည်ရွယ်ထားခြင်းဖြစ်ကြောင်း ရုရှားအစိုးရကပြောကြားခဲ့သည်။ 

   စစ်ရေးလေ့ကျင့်မှုတွင် တပ်ဖွဲ့ဝင်များထံ နျူကလီးယားလက်နက်များ ပေးပို့ခြင်း၊ မဟာ ဗျူဟာမြောက် နျူကလီးယားထိပ်ဖူးများကို ဒုံးကျည်များတွင် တပ်ဆင်ခြင်းနှင့် နျူကလီး ယားလက်နက်များကို လျှို့ ဝှက်စွာဖြန့်ကျက်ချထားခြင်းတို့ ပါဝင်ကြောင်းလည်း သိရသည်။ အဆိုပါ နျူကလီးယားလက်နက်စစ်ရေးလေ့ကျင့်ခန်းကိုလုပ်ဆောင်ရန် ယခုလအစောပိုင်း တွင် ရုရှားသမ္မတပူတင်က အမိန့်ပေးခဲ့ခြင်းဖြစ်ကြောင်းသိရသည်။