NSS - ဧပြီ ၂၀

လူထုအား ကျန်းမာရေးစောင့်ရှောက်မှုပေးနေသည့် ဆေးရုံဆေးခန်းများကို တိုက်ခိုက်ခြင်းအပေါ် ဆေးကောင်စီနှင့် ပုဂ္ဂလိကဆေးရုံများအသင်းတို့ ကန့်ကွက်ရှုတ်ချကြောင်း သဘော ထားထုတ်ပြန်ထားသည်။

မြန်မာနိုင်ငံဆေးကောင်စီနှင့် မြန်မာနိုင်ငံပုဂ္ဂလိကဆေးရုံများအသင်းက ယမန်နေ့(ဧပြီ ၁၉ ရက်) ညပိုင်းတွင် အထက်ပါကဲ့သို့ အသိပေးထားခြင်းဖြစ်သည်။ ပြီးခဲ့သည့် ဧပြီ(၁၄)ရက်နေ့ ညပိုင်းတွင် အကြမ်းဖက်များ ပစ်ခတ်တိုက်ခတ်ခဲ့သည့် ရှော့တိုက်ဒုံးများသည် ပြင်ဦးလွင်မြို့၊ ပြည်သူ့ဆေးရုံကြီး အရိုးကုသဆောင်ပေါ်သို့ ကျရောက်ပေါက်ကွဲခဲ့ကြောင်း သိရသည်။

အဆိုပါဖြစ်စဥ်ကြောင့် ဆေးရုံတက်ရောက်၍ ဆေးကုသမှုခံယူနေသည့် ကလေးငယ်များ အပါအဝင် လူနာနှင့် ဆေးရုံဝန်ထမ်းများ ထိခိုက်ဒဏ်ရာရရှိခဲ့ပြီး ဆေးရုံအဆောက်အဦများလည်း ထိခိုက်ပျက်စီးခဲ့ကြောင်း နစကမှဆိုထားသည်။

အလားတူ ဧပြီ(၁၆)ရက်နေ့ ညနေပိုင်းတွင်လည်း အကြမ်းဖက်များ၏ Drop Bomb များဖြင့် တိုက်ခိုက်ခံရမှုကြောင့် တနင်္သာရီတိုင်း၊ ပုလောမြို့နယ်၊ ပလောက်မြို့ပြည်သူ့ဆေးရုံ၊ ကလေးကုသဆောင်ပေါ်သို့ ကျရောက်ပေါက်ကွဲခဲ့ပြီး ဆေးကုသမှုခံယူနေသည့် ကလေးငယ်နှင့် လူနာစောင့်များ ထိခိုက်ဒဏ်ရာ ရရှိခဲ့ကြောင်း သိရသည်။

အဆိုပါဖြစ်စဥ်နှင့်ပတ်သက်၍ ဆေးပညာရှင်များ ပါဝင်သည့် မြန်မာနိုင်ငံဆေးကောင်စီအနေဖြင့် ဆန့်ကျင်ရှုတ်ချကန့်ကွက်ကြောင်း သဘောထားထုတ်ပြန်ထားသည်။ ထို့ပြင် မြန်မာနိုင်ငံပုဂ္ဂလိကဆေးရုံများအသင်းအနေဖြင့်လည်း အထက်ပါဖြစ်စဥ်ကို ပြင်းထန်စွာကန့်ကွက်ကြောင်း သဘောထားထုတ်ပြန်ထားကြောင်း သိရသည်။

အလားတူ ဗုဒ္ဓဘာသာကလျာဏယုဝအသင်း YMBA(ဗဟို) အပါအဝင် အဖွဲ့အစည်းပေါင်း(၂၀)ကလည်း ပြင်းထန်စွာကန့်ကွက်ရှုတ်ချကြောင်း သဘောထားများကို ပြီးခဲ့သည့် ရက်ပိုင်းက အသီးသီးထုတ်ပြန်ခဲ့ကြောင်း သိရသည်။