ရောင်နီ (NSS) - မတ် ၂၅

လာအိုနိုင်ငံ ဗီယင်ကျန်းမြို့ရှိ နေအိမ်တစ်ခုမှာ အာဟာရချို့တဲ့နေတဲ့ အာရှဝက်ဝံနက်သား ဆယ့်ခြောက်ကောင်ကို ထိန်းသိမ်းစောင့်ရှောက်ရေး ပရဟိတအဖွဲ့ Free the Bears က တွေ့ရှိခဲ့ပြီး ထိန်းသိမ်းကယ်ဆယ်နိုင်ခဲ့တယ်လို့ သိရပါတယ်။ 

ရင်ဘတ်မှာ လခြမ်းဖြူပုံစံ အမွေးဖြူလေးတွေရှိတာကြောင့် လဝက်ဝံလို့ လူသိများတဲ့ ဝက်ဝံသားပေါက်ကလေး တွေဟာ မျိုးတုံးလုနီးပါးမျိုးစိတ် စာရင်း IUCN Red List မှာ ပါဝင်တဲ့ ရှားပါးတိရစ္ဆာန်တွေဖြစ်ပါတယ်။ အာရှ တစ်ဝှမ်းမှာ ထောင်ပေါင်းများစွာသော တောရိုင်းရှားပါး တရိစ္ဆာန်တွေကို အိမ်မွေးတိရစ္ဆာန်တွေအဖြစ် ထားရှိခြင်း (သို့မဟုတ်) စျေးကြီးတဲ့ တိုင်းရင်းဆေးပညာတွင် အသုံးပြုဖို့အတွက် မွေးမြူလေ့ရှိပါတယ်။ ပြီးခဲ့သီတင်းပတ် ကတော့ လာအိုနိုင်ငံရှိ နေအိမ်တစ်ခုမှာ ဝက်ဝံ သားပေါက် ၁၇ ကောင်ကို ပြီးခဲ့တဲ့ သီတင်းပတ်အစောပိုင်းက တွေ့ရှိ ခဲ့ပြီး ၎င်းတို့အနက် တစ်ကောင်ဟာ သေဆုံးသွားခဲ့တယ်လို့ သိရပါတယ်။ ဝက်ဝံပေါက်လေးတွေရဲ့ အလေးချိန်ဟာ ၁.၃ ကီလိုဂရမ်မှ ၄ ကီလိုဂရမ်ကြား ရှိပြီး အသက်ကတော့ ၂ လမှ ၄ လဝန်းကျင်ရှိမယ်လို့ ယူဆရပါတယ်။

ဒီဝက်ဝံပေါက်လေးတေံကို ဖမ်းဆီးမွေးမြူခဲ့တဲ့ အိမ်ပိုင်ရှင်ကိုတော့ ရဲတပ်ဖွဲ့က ဆက်လက်ရှာဖွေနေဆဲဖြစ်ပြီး အဆိုပါ ဝက်ဝံပေါက်တွေကို Luang Prabang တောရိုင်းတိရစ္ဆာန်ဘေးမဲ့တောကို လွှဲပြောင်းပေးထားတယ်လို့ သိရပါတယ်။