ဂျန်ဇက် (NSS) - ဇန်နဝါရီ ၂၃ 

အမေရိကန် နဲ့ ဗြိတိန်စစ်တပ်တို့ဟာ ယီမင်နိုင်ငံရှိ ဟူသီလက်နက်ကိုင်အုပ်စုတွေကို ဇန်နဝါရီ ၂၃ ရက်က ပစ်မှတ်ထားတိုက်ခိုက်မှုတွေ ထပ်မံလုပ်ဆောင်ခဲ့ကြောင်း သိရပါတယ်။

ဗြိတိန် နဲ့ အမေရိကန်စစ်တပ်တို့ဟာ ဟူသီလက်နက်ကိုင်အုပ်စုထိန်းချုပ်ထားတဲ့ယီမင်နိုင်ငံရှိ ဒုံးကျည်နဲ့ ထောက်လှမ်းရေးပစ္စည်းများ သိုလှောင်ထားတဲ့နေရာတွေကို ပစ်မှတ်ထားတိုက်ခိုက်ခဲ့ခြင်းမျိုးဖြစ်ကြောင်း သိရပါတယ်။ 

ဟူသီလက်နက်ကိုင်အုပ်စုဟာ ပါလက်စတိုင်းတွေကို အားပေးထောက်ခံကြောင်းပြသဖို့ ပင်လယ်နီဒေသအတွင်း ဖြတ်သန်းနေတဲ့ကုန်စည်သင်္ဘောတွေကို ပစ်မှတ်ထားတိုက်ခိုက်ခဲ့ခြင်းမျိုးဖြစ်ကြောင်း သိရပါတယ်။ ဟူသီလက်နက်ကိုင်အုပ်စုရဲ့တိုက်ခိုက်မှုတွေကြောင့် ကမ္ဘာ့ကုန်သွယ်ရေးလောကမှာ ရိုတ်ခတ်မှုတွေဖြစ်လာခဲ့ပြီး ကုန်စည်သင်္ဘောတွေလမ်းကြောင်းပြောင်း သွားလာနေရကြောင်း သိရပါတယ်။ အမေရိကန် နဲ့ ဗြိတိန်တို့ဟာ ယီမင်နိုင်ငံရှိ မတူညီတဲ့နေရာပေါင်း ၈ ခုကို အဓိကထားတိုက်ခိုက်ခဲ့ပြီး သြစတြေးလျ၊ ဘာရိန်း၊ ကနေဒါ နဲ့ နယ်သာလန်နိုင်ငံတို့က ကူညီထောက်ပံ့ပေးခဲ့ကြောင်း သိရပါတယ်။ 

အမေရိကန်စစ်ဘက်ပြောရေးဆိုခွင့်ရှိသူတစ်ဦးက လေယာဉ်တင်သင်္ဘောတွေ၊ နဲ့ စစ်လေယာဉ်တွေကနေ ယီမင်နိုင်ငံကို ဒရုန်းနဲ့ ဒုံးကျည်အစင်းပေါင်း ၃ဝ နဲ့ ပစ်ခတ်တိုက်ခိုက်ခဲ့ကြောင်း ပြောပါတယ်။ အမေရိကန်နဲ့ ဗြိတိန် တို့ဟာ ဟူသီလက်နက်ကိုင်အုပ်စုရဲ့စစ်လက်နက်ပစ္စည်းတွေ သိုလှောင်ထားရာနေရာတွေကို ပစ်မှတ်ထား တိုက်ခိုက်ခဲ့ပေမယ့် သက်ရောက်မှုဘယ်လောက်အထိ ရှိစေခဲ့သလဲဆိုတဲ့အချက်ကို အတိအကျသတင်း ထုတ်ပြန်ခြင်းမျိုးမရှိသေးကြောင်း သိရပါတယ်။

အမေရိကန်စစ်တပ်ဟာ ယီမင်နိုင်ငံကိုတိုက်ခိုက်ချိန်အတွင်း ဟူသီလက်နက်ကိုင်အုပ်စု ပိုင်ဆိုင်ထားတဲ့ဒုံးကျည်၊ ရေဒါ၊ ဒရုန်းနဲ့ အခြားစစ်လက်နက်ပစ္စည်းတွေ ဘယ်လောက်အထိ ပျက်စီးခဲ့ရသလဲဆိုတာကို အတိအကျ သတင်းထုတ်ပြန်ခြင်းမျိုးမရှိကြောင်း သိရပါတယ်။ အမေရိကန် နဲ့ ဗြိတိန်တို့ဟာ ပြီးခဲ့တဲ့ဇန်နဝါရီ ၁ဝ ရက်နောက်ပိုင်းကတည်းက ဟူသီလက်နက်ကိုင်အုပ်စုတွေကို စတင်တိုက်ခိုက်ခဲ့ကြောင်း သိရပါတယ်။