စော (NSS) - ဇန်နဝါရီ ၁၉

မြန်မာနိုင်ငံက ရှားပါး ပန်ဒါနီများကို တရားမဝင်လမ်းကြောင်းများကတစ်ဆင့် ရောင်းချနေမှုများ ရှိနေကြောင်း အဆိုပါပန်ဒါနီများအရေးစောင့်ကြည့်လေ့လာသူတစ်ဦးက NSS ကို ပြောသည်။

မြန်မာနိုင်ငံရှိ ပန်ဒါနီ(ခေါ်) ကြောင်နီ မျိုးစိတ် အကောင်အရေအတွက်မှာ ကျဆင်းနေပြီး မျိုးသုဉ်းလုနီးပါး အန္တရာယ် ကျ‌ရောက်နေပြီဖြစ်ကြောင်းလည်း သိရသည်။

ပန်ဒါနီ (ခေါ်) ကြောင်နီများသည် ကချင်ပြည်နယ် မြောက်ဖျားပိုင်း၊ တရုတ်နိုင်ငံနယ်စပ်နှင့် အိန္ဒိယနိုင်ငံနယ်စပ်တို့တွင် အဓိကနေထိုင်ပြီး ၎င်းတို့ကို မမြင်နိုင်သည့် ဝါးတောများအတွင်း၌ ကျက်စားနေထိုင်ကြကြောင်းလည်း သိရသည်။

"အဓိကက အဲဒီဘက်မှာ ဒေသခံတွေက ပန်ဒါနီလေးတွေကို မွေးတာလည်း မဟုတ်ဘူး။ ဒီအတိုင်းဖမ်းတယ်၊ သတ်တယ်။ အသားကိုစားတယ်။ ဒါပေမယ့် ပန်ဒါနီတွေက ဈေးကွက်ထဲမှာ အသားကို သိပ်ပြီးရောင်းတာမရှိဘူး။ ဒေသတစ်ဝိုက် စားတာမျိုးရှိတယ်။ တရုတ်ကြတော့ တအားကို ထိန်းသိမ်းရေးတွေလုပ်နေတာ။ တရုတ်နဲ့မြန်မာနယ်စပ် တရုတ်တွေက ပန်ဒါနီကို ဆေးဖော်ဖို့ပဲဖြစ်ဖြစ်၊ ပန်ဒါနီအရေခွံကို ချိတ်ဆွဲဖို့၊ ကြမ်းပြင်မှာ သားရေကိုခင်းဖို့ အဲဒီလိုမျိုးအကြောင်းပြချက်တွေကြောင့် ပန်ဒါနီကို လိုချင်တယ်။ လိုချင်တဲ့အခါမှာ သူတို့နိုင်ငံမှာ ဖမ်းခိုင်းလို့မရဘူး။ အဲဒီအတွက်ကြောင့် မြန်မာနိုင်ငံကနေဝယ်တယ်။ ပြီးရင် တရားမဝင်အောက်လမ်းကြောင်းကနေ သူတို့နိုင်ငံကို သယ်တယ်။ ပြောရမယ်ဆိုရင် သူတို့နိုင်ငံမှာ ကာကွယ်ပြီးတော့ ဒီနိုင်ငံမှာကတော့ ပန်ဒါနီကိုလာပြီးတော့ ဝယ်တယ်။ ပိုက်ဆံရတော့ ဒီဘက်က ဒေသခံလူတွေ၊ မုဆိုးတွေကလည်း ရောင်းတယ်။ အဲဒီလိုမျိုး လည်ပတ်တဲ့အတွက်ကြောင့် ဒီပန်ဒါနီတွေက သေနေတာပါ"ဟု အထက်ပါ စောင့်ကြည့်လေ့လာသူက ဆိုသည်။

အဆိုပါပန်ဒါနီများကို မြန်မာနိုင်ငံ အပါအဝင် နီပေါနိုင်ငံ၊ အန္ဒိယနိုင်ငံ၊ ဘူတန်နိုင်ငံနှင့် တရုတ်နိုင်ငံတို့တွင် အဓိကတွေ့နိုင်ကြောင်း သိရသည်။

"ဒီကောင်လေးတွေက အရှေ့တောင်အာရှ(၁၀)နိုင်ငံမှာဆိုရင် မြန်မာမှာပဲရှိတာ ထိုင်းမှာ တောင်မရှိဘူး။ ဒီဟာသာ မြန်မာနိုင်ငံမှာ မရှိဘူးဆိုရင် အခြားနိုင်ငံမှာ သွားကြည့်ရတော့မှာ"ဟု ၎င်းက ထပ်မံပြောသည်။

၎င်းပန်ဒါနီများသည် သိုသိုဝှက်ဝှက်နေတတ်သည့် အကျင့်ရှိသည့်အပြင် ကင်မရာထောင်ချောက်များလည်း မတပ်ဆင်နိုင်သေးသောကြောင့် အကောင်အရေအတွက်ကို တိတိကျကျ မသိရှိရသေးကြောင်း သိရသည်။