ဂျန်ဇက် (NSS) - ဇန်နဝါရီ ၂ဝ

အရှေ့အလယ်ပိုင်းဒေသအတွင်း တင်းမာမှုတွေမြင့်တက်နေချိန်မှာပဲ အီရန်စစ်တပ်ဟာ ဇန်နဝါရီလ ၁၈ ရက်ကစတင်ပြီး ကြီးမားတဲ့ စစ်ရေးလေ့ကျင့်ခန်းအစီအစဉ်ကိုစတင်လိုက်ပါတယ်။

အဲဒီစစ်ရေးလေ့ကျင့်ခန်းအစီအစဉ်အတွင်း အီရန်လေတပ်၊ ရေတပ်၊ အာကာသတပ်ဖွဲ့တွေ၊ လေကြောင်းရန်ကာကွယ်ရေးတပ်ဖွဲ့တွေ၊ အီရန်မြေပြင်တပ်ဖွဲ့တွေပူးပေါင်းပြီး စစ်ရေးလေ့ကျင့်ခဲ့တာဖြစ်ကြောင်းသိရပါတယ်။ အီရန်ဟာ အဲဒီစစ်ရေးလေ့ကျင့်ခန်းအတွင်း Khordad-3 လေကြောင်းရန်ကာကွယ်ရေးစနစ်တစ်ခုကိုအောင်မြင်စွာ စမ်းသပ်ပစ်လွှတ်ခဲ့ကြောင်းသိရပါတယ်။ အဲဒီလေကြောင်းရန်ကာကွယ်ရေးစနစ်ဟာ အီရန်စစ်တပ်က ပြည်တွင်းမှာကိုယ်ပိုင်ထုတ်လုပ်ထားတဲ့ဒုံးကျည်ဖြစ်ပြီး ရန်သူတွေပစ်ခတ်လိုက်တဲ့ ဒုံးကျည်တွေကို အပြည့်အဝကာကွယ်နိုင်စွမ်းရှိတဲ့ လေကြောင်းရန်ကာကွယ်ရေးစနစ်မျိုးဖြစ်ကြောင်းသိရပါတယ်။ 

အဲဒီလေကြောင်းရန်ကာကွယ်ရေးစနစ်ဟာ ၃၆၀ ဒီဂရီလှည့်ပြောင်းနိုင်ပြီး ပစ်မှတ်တွေကို ပစ်ချနိုင်စွမ်းရှိတယ်လို့ ဆိုပါတယ်။ အီရန်ဟာ အရှေ့အလယ်ပိုင်းအရေးတင်းမာမှုတွေရှိနေချိန်မှာပဲ Defenders of Velayat Skies 1402 အမည်ရှိ စစ်ရေးလေ့ကျင့်ခန်းအစီအစဉ်တွေကိုစတင်ခဲ့တာဖြစ်ကြောင်းသိရပါတယ်။ အဲဒီစစ်ရေးလေ့ကျင့်ခန်းအတွင်း Khordad-3 လေကြောင်းရန်ကာကွယ်ရေးစနစ်ကိုလည်းအသုံးပြုခဲ့ပြီး ပစ်မှတ်တွေကို ထိမှန်အောင် စွမ်းဆောင်နိုင်ခဲ့ကြောင်းသိရပါတယ်။အီရန်စစ်တပ်ဟာ အဆိုပါစစ်ရေးလေ့ကျင့်ခန်းအစီ အစဉ်ကို နိုင်ငံတောင်ပိုင်း၊ အရှေ့တောင်ပိုင်း နဲ့ အ နောက်တောင်ပိုင်းတို့မှာပြုလုပ်ခဲ့တာဖြစ်ကြောင်းအီရန်မီဒီယာတွေက ဖော်ပြထားပါတယ်။ အီရန်စစ်တပ်ဟာ အစ္စရေးနဲ့ဟားမက်စ်လက်နက်ကိုင်အဖွဲ့ကြားဖြစ်ပွားနေတဲ့ ဂါဇာစစ်ပွဲနဲ့ဆက်နွယ်ပြီး အမေရိကန်၊ အစ္စရေးတို့နဲ့တင်းမာမှုတွေရှိနေသလို ပါကစ္စတန်နိုင်ငံနဲ့လည်း ပြီးခဲ့တဲ့ရက်ပိုင်းက အပြန်အလှန်ပစ်ခတ်မှုတွေဖြစ်ပွားခဲ့ကြောင်းသိရပါတယ်။