Pika (NSS) - ဇန်နဝါရီ ၁၆ 

ပိုလန်အစိုးရသည် ဒုတိယကမ္ဘာစစ်နောက်ပိုင်း ပထမဆုံးအကြိမ်အဖြစ် ဂျာမနီတပ်ဖွဲ့များကို ၎င်း၏ နယ်မြေပေါ် တွင် လက်ခံရန် ပြင်ဆင်နေကြောင်း ပိုလန်နိုင်ငံခြားရေးဒုဝန်ကြီး Andrzej Szejn က ပြောကြားခဲ့သည်။

၂ဝ၂၂ ခုနှစ် ဖေဖော်ဝါရီလတွင် ရုရှား-ယူကရိန်းစစ်ပွဲ စတင်ဖြစ်ပွားပြီးနောက် ပိုလန်နိုင်ငံဆိုင်ရာ ဂျာမနီ သံအမတ်ကြီး Arndt Freytag von Loringhoven သည် နိုင်ငံအရှေ့ပိုင်းတွင် နေတိုးအဖွဲ့၏ တည်ရှိမှုကို ပိုမို အားဖြည့်ရန်အတွက် အမြတမ်းတပ်ဖွဲ့များ ပိုလန်နိုင်ငံသို့ လွှဲပြောင်းပေးရန် အကြုံပြုချက်စာတစ်စောင်ကို ရေးသားခဲ့ကြောင်း သိရသည်။ 

Arndt Freytag von Loringhoven ၏ အကြုံပြုချက်ကို ပိုလန်၏ ကွန်ဆာဗေးတစ်အစိုးရက ပယ်ချခဲ့ဖူးကြောင်းလည်း သိရသည်။ Andrzej Szejn က "ကျွန်တော်တို့ရဲ့အရှေ့ပိုင်းနယ်စပ်အကျော်မှာ စစ်ပွဲဖြစ်ပွားနေချိန်မှာ မဟာမိတ်တွေရဲ့အကူအညီနဲ့ ပူးပေါင်းဆောင်ရွက်မှုတွေ အားလုံးကို ကြိုဆိုပါတယ်။ ဒါကြောင့် ဂျာမနီတပ်ဖွဲ့တွေဟာ လစ်သူယေးနီးယားနိုင်ငံမှာ လုပ်ခဲ့သလိုပဲ ပိုလန်နိုင်ငံအရှေ့ပိုင်းမှာ နေတိုးအဖွဲ့ရဲ့ တည်ရှိမှုကို ပိုမိုအားဖြည့်ချင်တယ်ဆိုရင် ကျွန်တော်တို့က ကြိုဆိုနေမှာပါ။ ဂျာမနီနိုင်ငံဟာ ကျွန်တော်တို့ရဲ့ မဟာမိတ်နိုင်ငံဖြစ်ရုံတင်မဟုတ်ဘဲ စီးပွားရေးမိတ်ဖက်နိုင်ငံလည်းဖြစ်ပါတယ်" ဟု ပြောခဲ့သည်။

သို့သော်လည်း ဂျာမန်အစိုးရသည် ပိုလန်နိုင်ငံတွင် ၎င်း၏ တပ်ဖွဲ့များ ဖြန့်ကျက်ချထားရန် ရည်ရွယ်ထားခြင်း ရှိ/မရှိ ဆိုသည့်အချက်ကို လက်ရှိအချိန်အထိ ရှင်းရှင်းလင်းလင်းမသိရှိရသေးကြောင်း သိရသည်။ နေတိုးအဖွဲ့တွင် အမေရိကန်၊ ဗြိတိန်၊ ခရိုအေးရှား နှင့် ရိုမေးနီးယားစစ်သားများ၏ အမြဲတမ်းတပ်စခန်းတစ်ခုရှိပြီး ဘီလာရုစ်နိုင်ငံ နယ်စပ်အနီးရှိ အခြေစိုက်စခန်းတစ်ခုတွင် တပ်စွဲထားကြောင်းလည်း သိရသည်။

ပိုလန်နိုင်ငံ  Poznan မြို့အနီးတွင် အမေရိကန်တပ်ဖွဲ့များ၏ အမြဲတမ်းတပ်စခန်းတစ်ခုရှိကြောင်းလည်း သိရသည်။ ဂျာမနီတပ်ဖွဲ့များသည် ၁၉၃၉ ခုနှစ် စက်တင်ဘာလ(၁)ရက်တွင် ပိုလန်နိုင်ငံကို ကျူးကျော်ဝင်ရောက်ခဲ့ ပြီး ဒုတိယကမ္ဘာစစ်ကို စတင်ခဲ့ခြင်းဖြစ်ကြောင်း သိရသည်။ ထို့ပြင် ၁၉၃၉ ခုနှစ်မှ ၁၉၄၅ ခုနှစ်အတွင်း နာဇီတပ်ဖွဲ့များ ၏ သတ်ဖြတ်ခြင်းခံခဲ့ရသော ပိုလန်နှင့်ဂျူးလူမျိုး (၅ ဒသမ ၆) သန်းခန့်ရှိမည်ဟု Polish Institute of National Remembranceက ခန့်မှန်းပြောခဲ့သည်။