ယွန်း (NSS) - ဇန်နဝါရီ ၁၄

ရန်ကုန်တိုင်းဒေသကြီးအတွင်းရှိ လှိုင်သာယာမြို့နယ်ကို အဆင့်မြှင့်တင်နိုင်ရန်အတွက် Town Plan များ ရေးဆွဲဆောင်ရွက်ရန် နစကဥက္ကဋ္ဌ ကအသိပေးပြောကြားထားသည်။

နစက ဥက္ကဋ္ဌ၊ ဗိုလ်ချုပ်မှူးကြီးမင်းအောင်လှိုင်က ဇန်နဝါရီလ (၁၃)ရက်တွင် ရန်ကုန်တိုင်းအတွင်းရှိ စက်မှုဇုန်ကော်မတီဥက္ကဋ္ဌများ၊ ကော်မတီဝင်များနှင့် MSME လုပ်ငန်းရှင်များအား  လှိုင်သာယာ စက်မှုဇုန်ကနောင်ခန်းမ၌ တွေ့ဆုံစဥ် အထက်ပါကဲ့သို့ပြောကြားခဲ့ခြင်းဖြစ်သည်။

လှိုင်သာယာမြို့နယ်ကို အဆင့်မြှင့်တင်ရန်အတွက် မြို့ပြ နှင့် အိမ်ရာစီမံကိန်းများ တည်ဆောက်ရာတွင် Town Plan များရေးဆွဲ၍ စနစ်တကျ ဆောင်ရွက်ရန် နစကဥက္ကဋ္ဌက တိုက်တွန်းပြောကြားထားသည်။

ထို့ပြင် လှိုင်သာယာအရှေ့ပိုင်းတွင် စာသင်ကျောင်းများနည်းပါးနေပြီး ကျောင်းများတည်ဆောက်ရာတွင် ပညာရေးဝန်ကြီးဌာနမှ သတ်မှတ်ထားသည့်အတိုင်း အားကစားကွင်းများ နှင့် ခန်းမများပါ ထည့်သွင်းတည် ဆောက်ရန် ၎င်းကပြောသည်။

နိုင်ငံ့အနာဂတ်ကောင်းမွန်ရေးအတွက် ပညာရေးကောင်းမွန်ရန်လိုအပ်ခြင်းကြောင့် ကျောင်းများကောင်း မွန်ရန်လိုပြီး ရပ်ကွက်များအလိုက် အခြေခံပညာ ကျောင်းများရှိရန်လိုအပ်သည့်အပြင် အားကစားကွင်းများလည်း ရှိရန်လိုကြောင်း သိရသည်။

ထို့ကြောင့် မြို့ပြစီမံကိန်းနှင့် အိမ်ယာစီမံကိန်းများ တည်ဆောက်ရာ၌ အားကစားကွင်းများ၊ ဈေးနှင့် ကျောင်းများ၊ ဆေးရုံများ ထည့်သွင်းတည်ဆောက်ရန် နစကဥက္ကဋ္ဌက အသိပေးပြောကြားထားသည်။

စီမံကိန်းများတည်ဆောက်ရာ၌ လယ်ယာစိုက်ပျိုးမြေများ မထိခိုက်စေရန် နှင့် ဈေးများတည်ဆောက်ရာတွင် အဆင့်မီသည့်ဈေးများ၊ Shopping Mall များ တည် ဆောက်ရန်လိုကြောင်း ၎င်းကပြောသည်။

၂၀၂၁-၂၀၂၂ ခုနှစ်တွင် လှိုင်သာယာမြို့နယ်အတွင်းရှိ တရားမဝင်နေထိုင်သူများအား ဥပဒေနှင့်အညီ ဆောင် ရွက်ခဲ့ရာ လက်ရှိတွင်တရားမဝင် ကျူးကျော်နေထိုင်သူများမရှိစေရေး၊ ဥပဒေနှင့်အညီဖြစ်စေရေးနှင့် ပြန်လည်နေရာချထားရေးတို့ကို စီမံဆောင်ရွက်ပေးရေးကို နစကဥက္ကဋ္ဌက ထည့်သွင်းပြောကြားထားသည်။