ဂျန်ဇက် (NSS) - ဇန်နဝါရီ ၁၃

မြန်မာနိုင်ငံဟာ ၂၀၂၄ ခုနှစ်အတွက် ထုတ်ပြန်လိုက်တဲ့ ကမ္ဘာတဝှမ်းစစ်အင်အားအတောင့်တင်းဆုံးနိုင်ငံတွေထဲမှာ အဆင့်တက်လာခဲ့ပြီး ကမ္ဘာ့အဆင့် ၃၅ နေရာမှာရပ်တည်နေခဲ့ကြောင်း global fire power အဖွဲ့က သတင်းထုတ်ပြန်လိုက်ပါတယ်။ 

အဆိုပါအဖွဲ့ဟာ နှစ်စဉ်နှစ်တိုင်းကမ္ဘာတဝှမ်းရှိ နိုင်ငံတွေရဲ့စစ်အင်အားတွေကို လေ့လာသုံးသပ်ကာ ကမ္ဘာအဆင့်အညွှန်းကိန်းတွေထုတ်ပြန်ပေးနေခြင်းဖြစ်သည်။ ကမ္ဘာ့နိုင်ငံပေါင်း ၁၄၅ နိုင်ငံနဲ့ပတ်သက်ပြီး တစ်နိုင်ငံချင်းစီရဲ့ စစ်သားအရေအတွက်၊ ကာကွယ်ရေးအသုံး စရိတ်နဲ့ စစ်လက်နက်ပစ္စည်းပိုင်ဆိုင်မှု၊ ကာကွယ်ရေးစစ်ရေးလှုပ်ရှားမှုစတဲ့အချက်တွေကိုအခြေခံကာ ကမ္ဘာ့အဆင့်သတ်မှတ်ဖော်ပြခဲ့တာဖြစ်ပါတယ်။ 

ဂလိုဘယ်ဖိုင်းယားအဖွဲ့ရဲ့ဖော်ပြချက်အရ အမေရိကန်၊ ရုရှား၊ တရုတ် နဲ့ အိန္ဒိယနိုင်ငံတို့ဟာ၂၀၂၄ ခုနှစ်အတွင်း ကမ္ဘာစစ်အင်အားအတောင့်တင်းဆုံးနိုင်ငံတွေအဖြစ် ထိပ်ဆုံးနေရာတွေမှာရပ်တည်နေကြောင်းသိရပါတယ်။ အာဆီယံဒေသအတွင်းနိုင်ငံတွေထဲမှာ မြန်မာနိုင်ငံရဲ့စစ်အင်အားအဆင့်သတ်မှတ်ချက်ဟာ အဆင့် ၆ နေရာမှာရှိနေပြီး အင်ဒိုနီးရှား၊ ဗီယက်နမ်၊ ထိုင်း၊ စင်ကာပူ၊ ဖိလစ်ပိုင်နိုင်ငံတို့က ထိပ်ဆုံး ၅ နေရာအတွင်းရှိခဲ့ပါတယ်။

မြန်မာနိုင်ငံရဲ့ စစ်အင်အားအတောင့်တင်းဆုံး ကမ္ဘာ့အဆင့်သတ်မှတ်ချက်ဟာ ပြီးခဲ့တဲ့ ၂၀၂၃ ခုနှစ်က ကမ္ဘာ့အဆင့် ၃၈ နေရာမှာရပ်တည်ခဲ့ပါတယ်။၂၀၂၄ ခုနှစ်အတွက် ကမ္ဘာ့နိုင်ငံများထဲ စင်အင်အားအတောင့်တင်းဆုံးနိုင်ငံတွေစာရင်းမှာ မြန်မာနိုင်ငံက ရမှတ်ပေါင်း  ၀ ဒသမ ၅၂၅၁ မှတ်ရရှိခဲ့ပြီး ကမ္ဘာအဆင့် ၃၅ နေရာမှာရှိနေခဲ့ကြောင်းသိရပါတယ်။