ကျော်(NSS) - ဇန်နဝါရီ ၁၂

မန္တလေးတိုင်း၊ ငါန်းဇွန်မြို့နယ်တွင် PDF အဖွဲ့ဝင်များက မိသားစုဝင်(၃)ဦးကို သတ်ဖြတ်ပြီးနောက် ယင်းရုပ်အလောင်းများသယ်လာသည့် နိဗ္ဗာန်ယာဥ်ကိုပါ မိုင်းခွဲတိုက်ခိုက်ခဲ့ကြကြောင်း လုံခြုံ ရေးအဖွဲ့နှင့်နီးစပ်သူများထံမှ သိရသည်။

ဖြစ်စဥ်သည် ယမန်နေ့ (ဇန်နဝါရီလ ၁၁ ရက်)၊ မွန်းတည့်ပိုင်းက ငါန်းဇွန်မြို့နယ်၊ ဆင်ဖြူကုန်းကျေးရွာ နှင့် မြေနီကျေးရွာအနီးတို့၌ ဖြစ်ပွားခဲ့ခြင်းဖြစ်ကြောင်း သိရသည်။

ယမန်နေ့၊ မွန်းတည့် ၁၂ နာရီခွဲကျော်ခန့်က PDF အဖွဲ့ဝင်(၆)ဦးသည် ဆိုင်ကယ်(၃)စီးဖြင့် ငါန်းဇွန်မြို့နယ်၊ ဆင်ဖြူကုန်းကျေးရွာရှိ ဦးအောင်ရင် (၇၀)နှစ်၏နေအိမ်သို့ ရောက်ရှိလာခဲ့ကြကြောင်း သိရသည်။

ထိုသို့ ရောက်ရှိလာပြီးနောက် နေအိမ်အတွင်းသို့ဝင်ရောက်ကာ နေအိမ်အတွင်းမှ ဦးအောင်ရင်၊ ၎င်း၏ဇနီးဖြစ်သူ ဒေါ်ခင်စန်းရင် (၆၃)နှစ် နှင့် သားဖြစ်သူ ဦးအေးငြိမ်းလင်း(၄၂)နှစ်တို့အား သေ နတ်များဖြင့်ပစ်ခတ်ကာ ဓားများဖြင့်လည်း ထိုးခဲ့ကြကြောင်း သိရသည်။

"အတော်ရက်စက်တဲ့ လုပ်ရပ်ပါ။ မိသားစုတွေအိမ်ထဲမှာစကား ပြောနေတုန်း ဆိုင်ကယ်တွေနဲ့ရောက်လာပြီး သေနတ်တွေနဲ့ပစ် ဓားတွေနဲ့ထိုးခဲ့ကြတာ။ သူတို့ မိသားစုက ရိုးရိုးအေးအေးနဲ့တောင်သူအလုပ်လုပ်ကိုင်နေကြတဲ့လူ‌တွေပါ။ သိရသလောက်ဆိုရင် သတ်ဖြတ်တာတွေလုပ်ပြီးတော့ PDF အဖွဲ့ဝင်တွေက ဆင်ဖြူကုန်းကျေးရွ ာရဲ့ အနောက်မြောက်ဘက်ကိုထွက်သွားကြတယ်"ဟု လုံခြုံရေးအဖွဲ့နှင့်နီးစပ်သူတစ်ဦးက ပြောသည်။

ထိုသို့ သေနတ်ဖြင့်ပစ်ခတ် ဓားများဖြင့်ထိုးခံခဲ့ရသဖြင့် ဦးအောင်ရင်၊ ဒေါ်ခင်စန်းရင်နှင့်ဦးအေးငြိမ်းလင်းတို့မှာ ကျည်ထိမှန်နှင့်ထိုးသွင်းဒဏ်ရာများရရှိ၍ အခင်းဖြစ်နေရာ၌သေဆုံးသွားခဲ့ကြကြောင်း သိရသည်။

ထို့ကြောင့် အခင်းဖြစ်စဥ်အား လုံခြုံရေးအဖွဲ့ဝင်များက စစ်ဆေးမှုများပြုလုပ်ပြီးနောက် သေဆုံးသူ(၃)ဦး၏ ရုပ်အလောင်းများအား ဓမ္မမာမက လူမှုကူညီရေးအသင်း၏ နိဗ္ဗာန်ယာဥ်ဖြင့် ငါန်းဇွန်မြို့နယ်၊ ငါန်းမြာတိုက်နယ်ဆေးရုံသို့ပို့ဆောင်ရန် အခင်းဖြစ်နေအိမ်မှထွက်ခွာခဲ့ကြကြောင်း သိရသည်။

ထိုသို့ ထွက်ခွာလာစဥ် PDF အဖွဲ့ဝင်များက ငါန်းဇွန်မြို့နယ်၊မြေနီကျေးရွာအနီးအရောက် နိဗ္ဗာန်ယာဥ်အား လက်လုပ်မိုင်း (၁)လုံးဖြင့် ဖောက်ခွဲတိုက်ခိုက်ခဲ့ကြကြောင်း သိရသည်။

"ရုပ်အလောင်းတွေသယ်လာတဲ့ကားကို မြေနီကျေးရွာနားအရောက်မှာ လက်လုပ်မိုင်းတစ်လုံးနဲ့ လမ်းညာဘက်ကနေ ဖောက် ခွဲတိုက်ခိုက်တာပါ။ ဒီလို လုပ်ရပ်မျိုးကတော့ ဘယ်လိုမှလက်ခံနိုင်စရာအကြောင်းမရှိဘူး။ သူတို့သတ်ဖြတ်လို့ သေပြီးနေတဲ့လူတွေနဲ့ ဘာအရောင်အသွေးမှမပါဘဲ လူမှုဒုက္ခတွေကို ကူညီပေးနေတဲ့ လူမှုကူညီရေးအဖွဲ့တွေကို တိုက်ခိုက်တာက လုံးဝမဖြစ်သင့်တဲ့ကိစ္စပါ"ဟု လုံခြုံရေးအဖွဲ့နှင့်နီးစပ်သူတစ်ဦးက ပြောသည်။

လက်လုပ်မိုင်းဖြင့်ဖောက်ခွဲတိုက်ခိုက်ခံခဲ့ရသဖြင့် ရုပ်အလောင်းများတင်လာသော နိဗ္ဗာန်ယာဥ်၏ ညာဘက်ခြမ်းလေကာမှန် (၃)ချပ်ကွဲ၊ ညာဘက်ခြမ်းကားကိုယ်ထည် အနည်းငယ်ပေါက်ပြဲပျက်စီးခဲ့သော်လည်း ထိခိုက်ဒဏ်ရာရရှိသူမရှိခဲ့ကြောင်း သိရသည်။

ဖြစ်စဥ်များမှ ပြစ်မှုကျူးလွန်သူများကို ဖမ်းဆီးရမိရေးနှင့်ဥပဒေအရ ထိရောက်စွာအရေးယူနိုင်ရေးတို့အတွက် လုံခြုံရေးအဖွဲ့ဝင်များက စုံစမ်းစစ်ဆေးမှုများပြုလုပ်လျက်ရှိကြောင်း သိရသည်။