NSS - ဇန်နဝါရီ ၁၁

မန္တလေးတိုင်း၊ စဉ့်ကိုင်မြို့တွင် PDF အဖွဲ့က လမ်းပေါ်သို့ လက် လုပ်ဗုံး(၃)လုံး ပစ်ပေါက်ဖောက်ခွဲမှုကြောင့် လင်မယား(၂)ဦး ထိခိုက်ဒဏ်ရာများ ရရှိခဲ့ကြောင်း ရဲတပ်ဖွဲ့က သတင်းထုတ်ပြန်ထားသည်။

ပြီးခဲ့သည့် ဇန်နဝါရီလ ၈ ရက်၊ ည ၇နာရီခွဲအချိန်တွင် စဉ့်ကိုင်မြို့၊ မြို့မရပ်ကွက်ရှိ မြို့နယ်ပြည်သူ့ဆေးရုံအနီးရှိလမ်းပေါ်၌ အထက်ပါကဲ့သို့ ဖြစ်ပွားခဲ့ခြင်းဖြစ်ကြောင်း သိရသည်။

စဉ့်ကိုင်မြို့၊ တရုတ်စုရပ်ကွက်မှ မြို့မရပ်ကွက်ဘက်သို့ PDF အဖွဲ့ဝင်များလိုက်ပါမောင်းနှင်လာသည့် Hijet ကားတစ်စီးသည် အထက်ပါ လမ်းပေါ်၌ လက်လုပ်ဗုံး(၃)လုံးအား ပစ်ပေါက်၍ မောင်းနှင်ထွက်ပြေးသွားခဲ့ကြောင်း သိရသည်။

ပေါက်ကွဲမှုများဖြစ်ပွားခဲ့ပြီးနောက် အခင်းဖြစ်နေရာအနီးမှ ဖြတ်သန်းသွားသည့် မြို့သစ်ရပ်ကွက်နေ ဦးသီဟအောင်(၃၄)နှစ်နှင့် ၎င်း၏ဇနီးဖြစ်သူ ဒေါ်နန်းစိုးစိုးခိုင်(၄၂)နှစ်တို့တွင် ဗုံးစထိမှန်ဒဏ်ရာများ ရရှိခဲ့ကြောင်း သိရသည်။

ထို့ကြောင့် ထိခိုက်ဒဏ်ရာများရရှိခဲ့သည့် လင်မယား(၂)ဦးကို စဉ့်ကိုင်မြို့နယ်ပြည်သူ့ဆေးရုံသို့ ပို့ဆောင်ပေးခဲ့ပြီး ပြစ်မှုကျူးလွန် သူများအား ဖော်ထုတ်ဖမ်းဆီး၍ ဥပဒေနှင့်အညီအပြစ်ပေးအရေး ယူနိုင်ရေးလုံခြုံရေးတပ်ဖွဲ့ဝင်များက စုံစမ်းစစ်ဆေးလျက်ရှိကြောင်း သိရသည်။