ယွန်း (NSS) - ဇန်နဝါရီ ၁၁

 လုပ်ငန်းများရပ်စဲထားသည့် ထားဝယ်အထူးစီးပွားရေးဇုန်အား ထိုင်းနိုင်ငံအစိုးရအနေဖြင့် စိတ်ဝင်စားနေပြီး ပြန်လည်ဆက်သွယ်လာသည့် အနေအထားများရှိနေကြောင်း သိရသည်။

မြန်မာအထူးစီးပွားရေးဇုန်ဆိုင်ရာ ဗဟိုအဖွဲ့ ဥက္ကဋ္ဌ ဒုတိယဗိုလ်ချုပ်မှူးကြီးစိုးဝင်းက ဇန်နဝါရီလ(၁၀)ရက်တွင် ကျင်းပခဲ့သည့် မြန်မာအထူးစီးပွားရေးဇုန်ဆိုင်ရာဗဟိုအဖွဲ့၏ (၁/၂၀၂၄) ကြိမ်မြောက် လုပ်ငန်းညှိနှိုင်းအစည်းအဝေးတွင် အထက်ပါကဲ့သို့ ပြောကြားခဲ့ခြင်းဖြစ်သည်။

မြန်မာနိုင်ငံတွင် အကောင်အထည်ဖော်နေသည့် အထူးစီးပွားရေးဇုန်သုံးခုအနက် တတိယစီမံကိန်းတစ်ခုဖြစ်သည့် ထားဝယ်အထူးစီးပွားရေးဇုန် စီမံကိန်းကို ၂၀ဝ၈ ခုနှစ်တွင်အကောင်အထည် ဖော်ဆောင်ရွက်ခဲ့ကြသည်။

ထို့သို့ဆောင်ရွက်လျက်ရှိရာ နောက်ပိုင်းကာလများ၌ အကြောင်းအမျိုးမျိုးကြောင့် တာဝန်ပေးထားသည့် အီတာလျံ-ထိုင်းကုမ္ပဏီအနေဖြင့် ရှေ့ဆက်မတိုးနိုင်ဘဲ လုပ်ငန်းကို ရပ်စဲထားခဲ့ရာ ဖြေရှင်းဆောင်ရွက်ရမည့် အနေအထားများရှိနေကြောင်း ဗဟိုအဖွဲ့ ဥက္ကဋ္ဌက အသိပေးပြောကြားထားသည်။

သို့သော် ထိုင်းနိုင်ငံ၏ နိုင်ငံရေးအပြောင်းအလဲကြောင့် ထားဝယ်အထူးစီးပွားရေးဇုန်ကို ထိုင်းနိုင်ငံအစိုးရနှင့် ချိတ်ဆက်ဆောင် ရွက်နိုင်ရန် အစီအစဥ်ရှိနေသည်ကို သိရကြောင်း ၎င်းက ပြော သည်။

လက်ရှိတွင် ထိုင်းအစိုးရအနေဖြင့် ထားဝယ်အထူးစီးပွားရေးဇုန်ကိစ္စကို စိတ်ဝင်စားပြီး ပြန်လည်ဆက်သွယ်လာသည့် အနေအ ထားများရှိနေသည့်အတွက် အဆိုပါကိစ္စရပ်အပေါ်တွင် လိုအပ်သလိုပူးပေါင်းဆောင်ရွက်သွားရေး ၎င်းက တိုက်တွန်းပြောကြားထားသည်။

“တစ်ဖက်နိုင်ငံက စိတ်ဝင်စားမှုရှိနေတယ်ဆိုတာက စီးပွားရေးပြန်လည်နလန်ထဖို့အတွက်ရော ပြည်တွင်း၊ ပြည်ပအလုပ်အ ကိုင်တွေ၊ လုပ်ငန်းတွေ ပြန်ပြီးတော့ကောင်းမွန်ဖို့အတွက်ရော ပိုပြီးတော့ကောင်းလာမယ်လို့ထင်ပါတယ်။ အခွင့်အရေးလေးရတာတော့ကောင်းတယ်။ အချိန်အများကြီးယူရမယ်။ ပြည်တွင်းကရော နိုင်ငံခြားကရော ရင်းနှီးမြှုပ်မှုတွေ ဝင်လာမှအဆင်ပြေမှာပေါ့။ အရင်းအနှီးလည်းများလိမ့်မယ်။ ရေရှည်မှာ တိုင်းပြည်အတွက်လည်း လိုတယ်။ ပြည်သူတွေအတွက်ရော၊ လုပ်ငန်းတွေအတွက်လည်းလိုတဲ့ စီးပွားရေးဇုန်ကြီးပေါ့”ဟု စီးပွားရေးပညာရှင်တစ်ဦးက NSS ကို သုံးသပ်ပြောကြားထားသည်။

ထားဝယ် အထူးစီးပွားရေးဇုန်သည် ဟက်တာ ၂ဝဝဝဝ အကျယ် အဝန်းရှိပြီး စီမံကိန်းလုပ်ငန်းများ အကောင်အထည်ဖော်ပြီးစီးပါက အရှေ့တောင်အာရှတွင် အကြီးဆုံးစီးပွားရေးဇုန် ဖြစ်လာမည်ဖြစ်ကြောင်း သိရသည်။

အထူးစီးပွားရေးဇုန်တွင် ထားဝယ် ရေနက်ဆိပ်ကမ်း၊ စက်မှုဇုန်နယ်မြေ နှင့် ထိုင်းနိုင်ငံ ကန်ချနပူရီသို့ သွယ်တန်းဖောက်လုပ်မည့် ၁ဝ၅ မိုင်အရှည်ရှိ ၈ လမ်းသွား စူပါဟိုင်းဝေးကားလမ်း၊ ရထားလမ်း၊ ဓာတ်အားလိုင်းများ၊ ရေနံ၊ သဘာဝပိုက်လိုင်းများ ပါဝင်ပြီး နယ်ခြားဝင်ထွက်ဇုန်တို့ ပါဝင်ရန် စီစဉ်ထားခဲ့ကြောင်း သိရသည်။