မြူနစ် (NSS) - ဇန်နဝါရီ ၁၁

အစိုးရအုပ်ချုပ်မှုအောက်တွင်ရှိခဲ့သော ဟိုပန်နှင့် ပန်လုံမြို့တို့ကို ထိန်းချုပ်လိုက်ပြီဖြစ်ကြောင်း "ဝ"လက်နက်ကိုင်အဖွဲ့ UWSA က ကြေညာလိုက်သည်။

"ဝ"လက်နက်ကိုင်အဖွဲ့ UWSA က ဇန်နဝါရီလ ၁၀ ရက် တွင် အထက်ပါကဲ့သို့ အသိပေးကြညာခဲ့ခြင်းဖြစ်သည်။

"ဝ"ကိုယ်ပိုင်အုပ်ချုပ်ခွင့်ရဒေသရှိ ဟိုပန်မြို့ နှင့် ပန်လုံမြို့ နှစ်ခုကို UWSA ထံလွှဲပြောင်းခဲ့သည့်အခမ်းအနားအား ဇန်နဝါရီလ ၁ဝ ရက်တွင် ဟိုပန်ရှိ မြို့တော်ခန်းမ၌ ကျင်းပခဲ့ကြောင်း သတင်းထုတ်ပြန်ထားသည်။

၎င်းအခမ်းအနားကို  UWSA ၏ မိုင်းမောခရိုင်မှူးနှင့် ဌာနဆိုင်ရာတာဝန်ရှိသူများ တက်ရောက်ခဲ့ကြသည်ဟုလည်း သတင်းထုတ်ပြန်ထားသည်။

ပြီးခဲ့သော ရက်ပိုင်းအတွင်း၌ ဟိုပန်မြို့ရှိ လုံခြုံရေးစခန်းများကို ကိုးကန့်လက်နက်ကိုင်အဖွဲ့ MNDAA ပူးပေါင်းအဖွဲ့များက ဝင်ရောက်တိုက်ခိုက်ပြီးနောက် "ဝ"လက်နက်ကိုင်အဖွဲ့ UWSA က ယခုကဲ့သို့ နေရာယူသိမ်းပိုက်ခဲ့ခြင်းဖြစ်သည်။

လက်ရှိ မြန်မာနိုင်ငံတွင် ဖြစ်ပွားနေသည့်တိုက်ပွဲများအတွင်းသို့ "ဝ"လက်နက်ကိုင်အဖွဲ့ UWSA သည် ပါဝင်လာပြီးဟု သုံးသပ်မှုများလည်းရှိနေသည်။

ယခုကဲ့သို့ "ဝ"လက်နက်ကိုင်အဖွဲ့ UWSA က ဟိုပန် နှင့် ပန်လုံမြို့တို့ကို ထိန်းချုပ်လိုက်ခြင်းနှင့်ပတ်သက်၍ နစကဘက်က တစ်စုံတစ်ရာ ထုတ်ပြန်ပြောဆိုခြင်းမျိုး မရှိသေးပေ။