ကျော်(NSS) - ဇန်နဝါရီ ၉

မြန်မာ့ရိုးရာလက်ဝှေ့စိန်ခေါ်ပွဲဖြစ်သည့် The Great Lethwei (TGL)ပြိုင်ပွဲ၏ အမှတ်စဉ်(၆) ပြိုင်ပွဲ၌ မြန်မာပြည်ချန်ပီယံသွေးသစ်ဝင်းလှိုင်နှင့် ပထမတန်းရိုးရာလက်ဝှေ့ကျော် ကျော်စွာဝင်းတို့ ယှဥ်ပြိုင်ထိုးသတ်သွားမည်ဖြစ်ကြောင်း ပြိုင်ပွဲကျင်းပရေးအဖွဲ့ထံမှ သိရသည်။

အဆိုပါ TGL-6 ပြိုင်ပွဲအား လာမည့် ဇန်နဝါရီလ ၂၈ ရက်၊ နေ့လည် ၃ နာရီခွဲ၌ ကျင်းပသွားမည်ဖြစ်ရာ သွေးသစ်ဝင်းလှိုင်နှင့်ကျော်စွာဝင်းတို့သည် ခေါင်တွဲဆိုင်းအဖြစ် ယှဥ်ပြိုင်ထိုးသတ်သွားကြမည်ဖြစ်သည်။ 

မြန်မာပြည်ချန်ပီယံသွေးသစ်ဝင်းလှိုင်အား TGL-6 ပြိုင်ပွဲ၌ယှဥ်ပြိုင်ထိုးသတ်ရန် ပထမတန်းလက်ဝှေ့ကျော် ကျော်စွာဝင်းမှစိန်ခေါ်ခဲ့ခြင်းဖြစ်ပြီး ၎င်းတို့ ၂ ဦးသည် အလဲထိုးစနစ်ဖြင့်ယှဥ်ပြိုင်ထိုးသတ်ကြမည်ဖြစ်သည်။

သွေးသစ်ဝင်းလှိုင်နှင့်ကျော်စွာဝင်းတို့သည့် ပြီးခဲ့သည့် ၂၀၂၃ ခုနှစ်၊ နိုဝင်ဘာလအတွင်းကလည်း ပထမအကြိမ်တွေ့ဆုံ၍ ၅ ချီပွဲအဖြစ် ယှဥ်ပြိုင်ထိုးသတ်ခဲ့ကြပြီးနောက် ပူးတွဲသရေကျခဲ့ပြီး ယ ခုတစ်ကြိမ်တွေ့ဆုံမှုသည် ၎င်းတို့နှစ်ဦးအတွက် ဒုတိယအကြိမ်တွေ့ဆုံယှဥ်ပြိုင်ထိုးသတ်မှုဖြစ်ကြောင်း သိရသည်။

ပြီးခဲ့သည့် TGL-5 ပြိုင်ပွဲဖြစ်သည့် မြန်မာ့ရိုးရာလက်ဝှေ့စိန်ခေါ်ပွဲတွင် သွေးသစ်ဝင်းလှိုင်သည် ယှူးခလိန်းမင်းအား ပထမအချီ၌ ပင် အလဲထိုးဖြင့်အနိုင်ရရှိထားကာ ပထမတန်းလက်ဝှေ့ကျော် ကျော်စွာဝင်းမှာလည်း ပြီးခဲ့သည့် ဇန်နဝါရီလ ၄ ရက် (လွတ်လပ် ရေးနေ့)က ယှဥ်ပြိုင်ထိုးသတ်ခဲ့သော လက်ဝှေ့ပြိုင်ပွဲတွင် ထိုင်းလက်ဝှေ့ကျော်ဖြစ်သည့် ဖုန်းစီရိအား ဒုတိယအချီတွင်အလဲထိုးအနိုင်ယူခဲ့သည်။