သန့်ဇင် (NSS) - နိုဝင်ဘာ ၈

လာမည့် (၂၀၂၅) ခုနှစ်တွင်လာမည့်နှစ်အတွင်း နာမည်ကျော် WBC (World Boxing Council) ၏ Title match ပွဲစဉ် တစ်ပွဲကို မြန်မာနိုင်ငံတွင် ပြုလုပ်ရန် စီစဉ်နေကြောင်း MBC(Myanmar Boxing Commission) မှ တာဝန်ရှိသူဦးကျော်ဝင်းထွန်းက NSS သို့ ပြောသည်။

မြန်မာနိုင်ငံတွင် professional boxing ကစားသမားများ ပေါ်ထွန်းလာရေးအတွက် Myanmar Boxing Commission (MBC) သည် ဂျပန်နိုင်ငံမှ Japan Boxing Commission (JBC) နှင့် မေလ (၂၄) ရက်တွင် MOU လက်မှတ်ရေးထိုးခဲ့ကြောင်း သိရသည်။

WBC နှင့် WBO ပြိုင်ပွဲများ၌ ဝင်ရောက် ယှဉ်ပြိုင်နိုင်ရန် မြန်မာနိုင်ငံ၏ ပထမဆုံး PROFESSIONAL BOXING လက်ရည်စစ်ပြိုင်ပွဲများကို ပြီးခဲ့သည့်ရက်ပိုင်းက ကျင်းပခဲ့ပြီးနောက် WBC တွင် Manber ဝင်ခွင့်ရရှိခဲ့ကြောင်း သိရသည်။ ထို့နောက် လာမည့် (၂၀၂၅) ခုနှစ်တွင် WBC Title match ပွဲစဉ်များမှ ပွဲစဉ်တစ်ပွဲကို မြန်မာနိုင်ငံ တွင် Myanmar Boxing Commission (MBC) ကဦးစီး၍ ကျင်းပပြုလုပ်ရန်စီစဉ်နေကြောင်း ဦးကျော် ဝင်းထွန်းက ဆိုသည်။

“နောက်နှစ်ထဲမှာ WBC Title Match မှာ တစ်ပွဲကို မြန်မာနိုင်ငံမှာလုပ်ဖို့စီစဉ်နေတယ်။ နောက် နှစ် (၂၀၂၅) ခုနှစ် (၃) လပိုင်း ဒါမှမဟုတ် (၆) လ ပိုင်းလောက်မှာ လုပ်ဖြစ်ဖို့များတယ်။ ကျွန်တော်တို့ BMC ကပဲ ဦးဆောင်ပြီးကျင်းပမှာပါ။ ပွဲပါမစ်က တစ်ခါလုပ်ရင် တစ်ခါလျှောက်ရတယ်” ဟု ၎င်းက ဆိုသည်။

ထို့ပြင် မြန်မာနိုင်ငံတွင် Professional Boxing  သမားများ‌ ပေါ်ထွက်စေရန်နှင့် လူငယ်များ Boxing အာကစားကို စိတ်ဝင်စားမှု မြင့်တက်စေရန် (၂)လလျှင်တစ်ကြိမ် ကြေးစားလက်ဝှေ့ Professional Boxing ပွဲများ ကျင်းပရန်ရှိကြောင်း သိရသည်။ “ဒါက မျိုးဆက်သစ်ထွက်လာဖို့ပါ။ မြန်မာ နိုင်ငံမှာက Boxing အားကစားကို စိတ်ဝင်စားတဲ့လူက နည်းတယ်။ နောက်ပြီးတော့ ကစားသမားလည်း ရှားတယ်။ ဘာလို့ ကစားသမားရှားလဲဆိုတော့ မြန်မာ့ရိုးရာ လက်ဝှေ့ အဖွဲ့ချုပ်အောက်မှာဆိုရင် ကစား သမားတွေ အများကြီးရှိတယ်။ ဘာလို့လဲဆိုတော့ သူက ပရော်ဖက်ရှင်နယ်ဖြစ်တဲ့အတွက်။ ထိုးရင် ထိုးကြေး ရတယ်။ အခုအစ်ကိုတို့က ကြေးစားလောကကို ဖော်ဆောင်တဲ့အတွက် လူသိလည်း နည်း သေးလို့ပါ ” ဟု ဦးကျော်ဝင်းထွန်းကဆိုသည်။

ထို့ကြောင့် Boxing အားကစားသည် အကြီးစား တိုက်ခိုက်ရေးအားကစားနည်းများအတွင်း ထိုးကြေး အမြင့်ဆုံး အားကစားတစ်မျိုး ဖြစ်သည့်အတွက် မြန်မာလူငယ်များအနေဖြင့် ကြေးစားလက်ဝှေ့ Professional Boxing စိတ်ဝင်စားသင့်ကြောင်း ၎င်းကအကြံပြု ပြောဆိုထားသည်။ “ မြန်မာနိုင်ငံမှာ က ပရော်ဖက်ရှင်နယ်မရှိသေးတဲ့အတွက် အခုလို ဖြစ်လာတာပေါ့လေ။ အမှန်တကယ် နိုင်ငံခြားမှာ သွားထိုး ပြီဆိုရင်တော့ ထိုးကြေးတွေလည်း မြင့်လာမယ်။ ကစားသမားတွေအတွက် အနာဂတ်လည်း အရမ်း ကောင်းလာမှာပေါ့လေ။ အဲဒီအတွက်ကို ကစားသမားရွေးထုတ်ဖို့ကို ရည်ရွယ်ပြီးတော့ (၂၀၂၅)ခုနှစ်၊ ၂လပိုင်းဒါမှမဟုတ်(၃)လပိုင်းနောက်ဆုံး ထားပြီးတော့ ကိုယ်ပိုင် GYM ၊ Boxing GYM ပေါ့နော် အဲဒါ တွေဖွင့်မယ်။ နောက်ပြီးတော့(၂)လကို တစ်ကြိမ် လောက်ကို မျိုးဆက်သစ် ကစားသမားတွေ ထွက်ပေါ်လာအောင် လုပ်ပေးမယ် ”ဟု ၎င်းဆိုသည်။