ဂျန်ဇက် (NSS) - ဇန်နဝါရီ ၇ 

လာအိုနိုင်ငံဟာ  မြန်မာနိုင်ငံရေးအငြင်းပွားမှုများကိုဖြေရှင်းနိုင်ဖို့ ရည်ရွယ်ချက်နဲ့ မြန်မာနိုင်ငံဆိုင်ရာအာဆီယံဥက္ကဋ္ဌရဲ့အထူးကိုယ်စားလှယ်တစ်ဦးကို ခန့်အပ်လိုက်ပြီဖြစ်ကြောင်း သိရပါတယ်။

လာအိုနိုင်ငံဟာ ၂ဝ၂၄ ခုနှစ်မှာ အာဆီယံအလှည့်ကျဥက္ကဋ္ဌအဖြစ် တာဝန်ယူမှာဖြစ်ပြီး ဇန်နဝါရီလအတွင်း အာဆီယံ အဖွဲ့ဝင်နိုင်ငံများရဲ့နိုင်ငံခြားရေးဝန်ကြီးများအစည်းအဝေးကို အိမ်ရှင်အဖြစ်လက်ခံကျင်းပသွားမှာဖြစ်ပါတယ်။ 

လာအိုနိုင်ငံဟာ ကုလသမဂ္ဂဆိုင်ရာလာအိုသံအမတ်ကြီးအဖြစ်တာဝန်ယူခဲ့ဖူးသူ Alounkeo Kittikhoun ကို ဇန်နဝါရီလနောက်ပိုင်းမှာကျင်းပမယ့် အာဆီယံအဖွဲ့ဝင်နိုင်ငံများရဲ့ နိုင်ငံခြားရေးဝန်ကြီးများအစည်းအဝေးကို အိမ်ရှင်အဖြစ် လက်ခံမကျင်းပခင် အထူးကိုယ်စားလှယ်ကို ခန့်အပ်ခဲ့တာဖြစ်ပါတယ်။

လာအိုနိုင်ငံခြားရေးဝန်ကြီးဌာနဟာ Alounkeo Kittikhoun ဆိုသူကို အာဆီယံဥက္ကဋ္ဌရဲ့ အထူးကိုယ်စားလှယ်အဖြစ် ခန့်အပ်တာကိုအဖွဲ့ဝင်နိုင်ငံတွေထံအ သိပေးအကြောင်းထားတယ်လို့ အာဆီယံသံတမန်အသိုင်းအဝိုင်းနဲ့ နီးစပ်သူတွေက ပြောပါတယ်။ 

လာအိုအစိုးရက ခန့်အပ်လိုက်တဲ့ မြန်မာနိုင်ငံဆိုင်ရာအာဆီယံဥက္ကဋ္ဌရဲ့အထူးကိုယ်စားလှယ်ဖြစ်သူ Alounkeo Kittikhoun ဟာ မြန်မာနိုင်ငံနဲ့ အာဆီယံအဖွဲ့ကြား ရရှိထားတဲ့ အာဆီယံသဘောတူညီချက်ငါးချက်ကို အပြည့်အဝ အကောင်အထည်ဖော်နိုင်အောင် အဓိကထားဆောင်ရွက်ရမယ်လို့ ထိုင်းသံတမန်တစ်ဦးက ပြောပါတယ်။

၎င်းဟာ မြန်မာနိုင်ငံဆိုင်ရာအာဆီယံအလှည့်ကျဥက္ကဋ္ဌရဲ့ အထူးကိုယ်စားလှယ်အဖြစ်ခန့်အပ်ခံရပြီးနောက် ဇန်နဝါရီ ၁ ရက်နေ့ကတည်းက တာဝန်တွေကို စတင်ထမ်းဆောင်နေတယ်လို့ သိရပါတယ်။ 

မြန်မာနိုင်ငံမှာ အာဏာအငြင်းပွားမှုဖြစ်ပွားခဲ့ပြီးနောက်ပိုင်း အာဆီယံအဖွဲ့ဟာ မြန်မာနိုင်ငံရေးအငြင်းပွားမှုတွေကို ဖြေရှင်းနိုင်အောင် ကြားဝင်ဆောင်ရွက်ခဲ့ပေမယ့် လက်ရှိအချိန်အထိ တိုးတက်ခြင်းမရှိသေးဘဲ အာဆီယံအလှည့်ကျဥက္ကဋ္ဌအဖြစ် တာဝန်ယူခဲ့ဖူးတဲ့ ဘရူနိုင်း၊ ကမ္ဘောဒီးယား နဲ့ အင်ဒိုနီးရှားနိုင်ငံတို့လက်ထက်မှာ ကြိုးပမ်းခဲ့ပေမယ့် အောင်မြင်မှုမရခဲ့တာဖြစ်ပါတယ်။