Pika (NSS) - ဇန်နဝါရီ ၆

မြောက်ကိုရီးယားနိုင်ငံ အနောက်ဘက်ကမ်းလွန်ပြင်တွင် ဇန်နဝါရီလ(၅)ရက်က လုပ်ဆောင်ခဲ့သော အမြောက် ကျည်ဆန်ပေါင်း(၂ဝဝ)ကျော် ပစ်လွှတ်မှုသည် တောင်ကိုရီးယား၏ ကြီးမားသောစစ်ရေးလှုပ်ရှားမှုကို ပုံမှန်လက်တုံ့ပြန်မှုတစ်ခုဖြစ်ကြောင်း မြောက်ကိုရီးယားနိုင်ငံပိုင်သတင်းအေဂျင်စီ KCNA က ဖော်ပြခဲ့သည်။

ထို့အပြင် အဆိုပါပစ်လွှတ်မှုကြောင့် တောင်ကိုရီးယားကျွန်းစုများ၏ လုံခြုံရေးကို ထိခိုက်မှုမျိုးမရှိကြောင်း KCNA က ထပ်မံဖော်ပြခဲ့သည်။

မြောက်ကိုရီးယားစစ်တပ်သည် ဇန်နဝါရီလ(၅)ရက် နံနက်ပိုင်းတွင် Yeonpyeong နှင့် Baengnyeong ကျွန်းများ အနီးသို့ အမြောက်ကျည်ဆန်ပေါင်း(၂ဝဝ)ကျော် ပစ်လွှတ်ခဲ့ကြောင်း တောင်ကိုရီးယားကာကွယ်ရေးဝန်ကြီးဌာန က ပြောကြားခဲ့သည်။ 

အဆိုပါကျွန်းနှစ်ကျွန်းသည် တောင်ကိုရီးယား နှင့် မြောက်ကိုရီးယားကြားရှိ ရေကြောင်းနယ်နိမိတ် တောင်ဖက်တွင် ရှိသော တောင်ကိုရီးယားကျွန်းနှစ်ကျွန်းဖြစ်ကြောင်းလည်း သိရသည်။ အဆိုပါအမြောက်ကျည်များသည် နှစ်နိုင်ငံ ကြား ၂ဝ၁၈ ခုနှစ်က လက်မှတ်ရေးထိုးခဲ့သော တင်းမာမှုလျှော့ရေး သဘောတူညီချက်အရ ဖန်တီးထားသည့် နယ်စပ်တစ်လျှောက်ရှိ ကြားခံဇုန်အတွင်းသို့ ကျရောက်သွားခဲ့ကြောင်း သိရသည်။

"ကြားခံဇုန်အတွင်းမှာ အမြောက်ကျည်ပစ်ခတ်မှုတွေ ပြန်လည်စတင်တာဟာ ကိုရီးယားကျွန်းဆွယ်ရဲ့ငြိမ်းချမ်းရေး ကိုခြိမ်းခြောက်ကာ တင်းမာမှုတွေကို ပိုမိုတိုးမြင့် လာစေတဲ့ ရန်စတဲ့ လုပ်ရပ်တစ်ခုဖြစ်ပါတယ်။ မြောက်ကိုရီးယား ရဲ့လုပ်ရပ်ကိုလက်တုံ့ပြန်တဲ့အနေနဲ့ တောင်ကိုရီးယားစစ်တပ်ဟာ ပြင်းထန်တဲ့ ချက်ချင်းလက်တုံ့ပြန်မှုတွေကို လုပ်ဆောင်သွားမှာပါ။ ကျွန်တော်တို့ဟာ အင်အားသုံးပြီး ငြိမ်းချမ်းရေးကို ပြန်လည်ရယူရပါမယ်" ဟု တောင်ကိုရီးယားကာကွယ်ရေးဝန်ကြီး Shin Won-sik က ပြောခဲ့သည်။

တောင်ကိုရီးယားအနေဖြင့် လက်တုံ့ပြန်မှုဟုခေါ်ဆိုသည့် ရန်စမှုများကို မလုပ်ဆောင်သင့်ကြောင်း နှင့် ရန်စမှုများ ရှိလာပါက မကြုံစဖူးအဆင့်ဖြင့် လက်တုံ့ပြန်မှုများကို လုပ်ဆောင်သွားမည်ဟု မြောက်ကိုရီးယားစစ်တပ်က သတိပေးခဲ့ကြောင်း KCNA က ဖော်ပြခဲ့သည်။

KCNA က "အမြောက်ကျည်ဆန်ပေါင်း (၂ဝဝ)ကျော် ပစ်ခတ်မှုဟာ Baengnyeong နဲ့ Yeonpyeong ကျွန်းတွေရဲ့လုံခြုံရေးကို ထိခိုက်မှုမျိုးမရှိခဲ့ပါဘူး" ဟု ရေးသားဖော်ပြထားသည်။