ပုံစာ - ၂ဝ၂၃ ခုနှစ်က ကျင်းပခဲ့သည့် အကယ်ဒမီပေးပွဲမြင်ကွင်း

ယွန်း (NSS) - ဇန်နဝါရီ ၆

အကယ်ဒမီပေးပွဲကို လာမည့်‌ဖေဖော်ဝါရီလ(၃)ရက်တွင် ကျင်းပမည်ဖြစ်ပြီး ရွှေစင်ရုပ်တုရင်ထိုးတံဆိပ်များအတွက် လိုအပ်သည့် ရွှေများကို နိုင်ငံတော်က ကျခံသွားမည်ဖြစ်ကြောင်း သိရသည်။

ပြန်ကြားရေးဝန်ကြီးဌာန၊ ပြည်ထောင်စုဝန်ကြီး ဦးမောင်မောင်အုန်းက ဇန်နဝါရီလ(၅)ရက်တွင် နေပြည်တော်၌ ကျင်းပခဲ့သည့် လုပ်ငန်းညှိနှိုင်းအစည်းအဝေးတွင် အထက်ပါကဲ့သို့ ပြောကြားခဲ့ခြင်းဖြစ်သည်။

၂၀၂၃ ခုနှစ် မြန်မာ့ရုပ်ရှင်ထူးချွန်ဆုချီးမြှင့်ပွဲအခမ်းအနားကို လာမည့် ဖေ ဖော်ဝါရီလ(၃)ရက်တွင် နေပြည်တော်ရှိ မြန်မာအပြည်ပြည်ဆိုင်ရာ ကွန်ဗင်း ရှင်းဗဟိုဌာန-၁(MICC-1) ခန်းမတွင် ကျင်းပသွားမည်ဖြစ်ကြောင်း သိရသည်။

အဆိုပါအခမ်းအနားကို Forever Group Co.,Ltd အနေဖြင့် အဓိကကူညီပံ့ပိုးသူအဖြစ် တာဝန်ယူဆောင်ရွက်မည်ဖြစ်ပြီး နှစ်ဖက်သဘောတူစာချုပ်ချုပ်ဆိုခြင်းကို ပြီးခဲ့သည့် ဇန်နဝါရီလ(၃)ရက်တွင်လုပ်ဆောင်ခဲ့ပြီး လုပ်ငန်းများစတင်နိုင်ရေးကို ညှိနှိုင်းလျက်ရှိကြောင်း သိရသည်။

ထို့ပြင် အကယ်ဒမီရွှေစင်ရုပ်တုတွင် တပ်ဆင်မည့် ရွှေကြယ်များနှင့် အကယ် ဒမီပေးပွဲကို တက်ရောက်လာကြမည့် အကယ်ဒမီဆုရ အနုပညာရှင်၊ အတတ်ပညာရှင်များကို ရွှေစင်ရုပ်တုရင်ထိုးတံဆိပ်များပေးအပ်သွားမည်ဖြစ်ပြီး လိုအပ်သည့်ရွှေများကို နိုင်ငံတော်က ကျခံသွားမည်ဖြစ်ကြောင်း ပြန်ကြားရေးဝန်ကြီးက ပြောသည်။

ဇာတ်ကားစိစစ်အကဲဖြတ်ခြင်းတွင် ပထမအဆင့်အနေဖြင့် ၂၀၂၃ ခုနှစ်အတွင်း ရုံတင်ပြသခဲ့သည့် ဇာတ်ကား (၃၅)ကားကို စိစစ်ခဲ့ပြီး ဒုတိယအဆင့်အနေဖြင့် ရွေးချယ်ထားသည့် ဇာတ်ကား(၁၂)ကားကို ဇန်နဝါရီလ (၃)ရက်တွင် အပြီးအစီး စိစစ်ဆောင်ရွက်ခဲ့ကြောင်း သိရသည်။

ယခုနှစ်၌ ရွှေကြိုများအပြင် ရုပ်ရှင်အနာဂတ်အတွက် သရုပ်ဆောင်များကို မွေးထုတ်ပေးရန်ဆိုသည့် ရည်ရွယ်ချက်ဖြင့် ရွှေကြိုရွေးချယ်ရေးအဖွဲ့၊ ရုပ်ရှင်ထုတ်လုပ်ရေးများ နှင့် ရုပ်သံလိုင်းများက သရုပ်ဆောင်(၄၃)ဦးကို ရွေးချယ်ထားကြောင်းလည်း ၎င်းကဆက်လက်ပြောသည်။

အလားတူ ပြီးခဲ့သည့်နှစ်တွင်ကျင်းပခဲ့သည့် သုံးနှစ်စာအကယ်ဒမီဆုပေးပွဲတွင်လည်း အကယ်ဒမီရရှိပြီးသော အနုပညာရှင်နှင့် အတတ်ပညာရှင်များကို ရွှေအစစ်ဖြင့် ပြုလုပ်ထားသော အကယ်ဒမီပုံရွှေရင်ထိုးများ ပေးအပ်ခဲ့ပြီး ကုန်ကျစရိတ်များကို မြန်မာနိုင်ငံရုပ်ရှင်အစည်းအရုံးမှ အကုန်အကျခံကာ ဆောင်ရွက်ခဲ့ခြင်းဖြစ်သည်။