Pika (NSS) - ဇန်နဝါရီ ၂

အမေရိကန်၊ တောင်ကိုရီးယားနိုင်ငံတို့နှင့် စစ်ရေးအရ ထိပ်တိုက်ရင်ဆိုင်မှုများ စတင်ဖြစ်ပွားခဲ့ပါက အင်အား အမြင့်ဆုံးသုံးရန် မြောက်ကိုရီးယားခေါင်းဆောင်ကင်ဂျုံအန်းက ၎င်း၏ ထိပ်တန်းစစ်ဘက်ဆိုင်ရာအရာရှိများကို ပြောကြားခဲ့ကြောင်း (KCNA) သတင်းဌာနက ဇန်နဝါရီလ(၁)ရက်တွင် ဖော်ပြခဲ့သည်။

တောင်ကိုရီးယား နှင့် အမေရိကန်တို့သည် ပြီးခဲ့သည့်နှစ်အတွင်း မြောက်ကိုရီးယား၏ စံချိန်တင် လက်နက်စမ်းသပ် မှုများကို တွေ့ကြုံခဲ့ရပြီးနောက်  ကာကွယ်ရေးပူးပေါင်းဆောင်ရွက်မှုများကို ပိုမိုအရှိန်မြှင့် လုပ်ဆောင်ခဲ့ကြောင်း သိရသည်။ မြောက်ကိုရီးယားစစ်တပ်သည်  ထိပ်တိုက်တွေ့ဆုံမှုများဖြစ်ပွားခဲ့ပါက ရန်သူများကို အမြစ်ပြတ်ချေမှုန်း သင့်သည်ဟု ကင်ဂျုံအန်းက ပြောကြားခဲ့ကြောင်း (KCNA) သတင်းဌာနက ဖော်ပြခဲ့သည်။

ကင်ဂျုံအန်းသည် နှစ်သစ်ကူးအကြိုနေ့တွင် ပြုံးယမ်းမြို့မှာ အဓိကကွပ်ကဲရေးမှူးများ နှင့် တွေ့ဆုံစဉ်အချိန်အတွင်း ယခုကဲ့သို့ပြောဆိုခဲ့ခြင်းဖြစ်ကြောင်း သိရသည်။ ကင်ဂျုံအန်း က "ရန်သူတွေဟာ မြောက်ကိုရီးယားကို စစ်ရေးအရ ထိပ်တိုက်ရင်ဆိုင်မှုတွေနဲ့ ရန်စမှုတွေလုပ်ဆောင်ဖို့ ရွေးချယ်ခဲ့မယ်ဆိုရင် ကျွန်တော်တို့စစ်တပ်ဟာ တုံ့ဆိုင်းနေခြင်း မျိုးမရှိဘဲ အပြင်းထန်ဆုံးနည်းလမ်းတွေနဲ့ အမြစ်ပြတ်ချေမှုန်းမှုတွေကို လုပ်ဆောင်သင့်ပါတယ်" ဟု ပြောခဲ့သည်။ 

ကိုရီးယားကျွန်းဆွယ်တွင် စစ်ပွဲမှာအချိန်မရွေးဖြစ်ပွားလာနိုင်သည့်အတွက် ကြိုတင်ပြင်ဆင်မှုအဖြစ် လက်နက် တိုက်များကို ပိုမိုတည်ဆောက်ရန် ကင်ဂျုံအန်းက နှစ်ကုန်အစည်းအဝေးတွင် ပြောကြားခဲ့သည်။ ထို့အပြင် အမေရိကန်နိုင်ငံသည် စစ်ရေးအရ ခြိမ်းခြောက်မှုပုံစံအမျိုးမျိုးကို လုပ်ဆောင်နေကြောင်း ကင်ဂျုံအန်းက စွပ်စွဲပြောဆိုခဲ့သည်။

ကိုရီးယားကျွန်းဆွယ်တွင် စစ်ရေးပဋိပက္ခများဖြစ်ပွားလာမည်ဆိုပါက တောင်ကိုရီးယားပိုင်နက်တစ်ခုလုံးကို ဖိနှိပ်နှိမ်နှင်းရန် မြောက်ကိုရီးယားစစ်တပ်ကို ကင်ဂျုံအန်းက တိုက်တွန်းခဲ့ကြောင်း သိရသည်။ ထို့အပြင် တောင်ကိုရီးယားနိုင်ငံနှင့် ပြန်လည်ပေါင်းစည်းရေးကို ကြိုးပမ်းတော့မည်မဟုတ်ကြောင်းနှင့် ထိန်းချုပ်၍မရနိုင် သောအကျပ်အတည်းကို အမေရိကန်နှင့်တောင်ကိုရီးယားတို့က အစပျိုးခဲ့ခြင်းဖြစ်ကြောင်း ကင်ဂျုံအန်း က ပြောခဲ့သည်။