Pika (NSS) - ဇန်နဝါရီ ၂

ပင်လယ်နီအတွင်းသွားလာနေသော ကုန်တင်သင်္ဘောများအား ပစ်မှတ်ထားတိုက်ခိုက်နေသည့် ယီမင်အခြေစိုက် ဟူသီလက်နက်ကိုင်အဖွဲ့၏ တိုက်ခိုက်မှုများကို လက်တုံ့ပြန်သည့်အနေဖြင့် လေကြောင်းမှ တိုက်ခိုက်မှုများ လုပ်ဆောင်ရန် ဗြိတိန်အစိုးရက စီစဉ်နေကြောင်း  The Times သတင်းစာက ဖော်ပြခဲ့သည်။

အဆိုပါစစ်ဆင်ရေးတွင် အမေရိကန်နိုင်ငံနှင့် အခြားဥရောပနိုင်ငံတစ်နိုင်ငံတို့လည်း ပါဝင်မည်ဖြစ်ကြောင်း The Times က ထပ်မံဖော်ပြခဲ့သည်။

ဟူသီလက်နက်ကိုင်အဖွဲ့သည် ၎င်းတို့၏ တိုက်ခိုက်မှုများကို ချက်ချင်း မရပ်တန့်ပါက အနောက်အုပ်စုနိုင်ငံများထံမှ စစ်ရေးအရ အရေးယူဆောင်ရွက်မှုများကို ကြုံတွေ့ရနိုင်ကြောင်း ဗြိတိန်နှင့် အမေရိကန်တို့က သတိပေးပြောဆိုခဲ့ သည်။ 

အဆိုပါသတိပေးချက်ကို နောက်ဆုံးသတိပေးချက်တစ်ခုအဖြစ် ရည်ရွယ်ထားကြောင်း ဗြိတိန်အစိုးရ သတင်းရင်းမြစ်တစ်ဦး၏ ပြောကြားချက်ကို ကိုးကားပြီး The Times သတင်းစာက ဖော်ပြခဲ့သည်။ 

"ဟူသီလက်နက်ကိုင်အဖွဲ့ဟာ သတိပေးချက်တွေကို လိုက်နာဖို့ပျက်ကွက်မယ်ဆိုရင် ဗြိတိန်နဲ့ အမေရိကန်တို့ရဲ့ စစ်သင်္ဘောတွေ၊စစ်လေယာဉ်တွေဟာ ယီမင်နဲ့ ပင်လယ်နီမှာရှိတဲ့ ကြိုတင်စီစဉ်ထားတဲ့ပစ်မှတ်တွေကို ဒုံးကျည်တွေ ပစ်လွှတ်ပြီး တိုက်ခိုက်သွားနိုင်ဖွယ်ရှိနေပါတယ်။ အဲဒီစစ်ဆင်ရေးမှာ အမည်မဖော်လိုတဲ့ ဥရောပနိုင်ငံ တစ်နိုင်ငံလည်း ပါဝင်သွားနိုင်ဖွယ်ရှိနေပါတယ်" ဟု The Times သတင်းစာ က ဖော်ပြထားသည်။

ဟူသီလက်နက်ကိုင်အဖွဲ့သည် အစ္စရေး-ဟားမက်စစ်ပွဲစတင်ဖြစ်ပြီးနောက်ပိုင်းတည်းက ပင်လယ်နီအတွင်းရှိ ဒါဇင် နှင့်ချီသော ကွန်တိန်နာသင်္ဘောများကို  ဒုံးကျည်များ၊ ဒရုန်းများ နှင့် ပစ်ခတ်တိုက်ခိုက်ခဲ့ခြင်းဖြစ်ကြောင်း သိရသည်။ 

ပင်လယ်နီသည် ကမ္ဘာလုံးဆိုင်ရာ ကုန်သွယ်မှုများ၏ (၁၂)ရာခိုင်နှုန်းရှိသော သယ်ယူပို့ဆောင်ရေးလမ်းကြောင်း တစ်ခုဖြစ်ကြောင်းလည်း သိရသည်။ ထို့အပြင် အမေရိကန်အစိုးရသည် ပင်လယ်နီအတွင်းရှိ ကုန်တင်သင်္ဘောများ ကို ဟူသီလက်နက်ကိုင်အဖွဲ့၏ တိုက်ခိုက်မှုများမှ ကာကွယ်ရန်အတွက် နိုင်ငံပေါင်း(၂ဝ)ခန့် ပါဝင်သော ညွန့်ပေါင်းအဖွဲ့ကို ဖွဲ့စည်းခဲ့ပြီး ကင်းလှည့်မှုများ စတင်လုပ်ဆောင်ခဲ့ကြောင်း သိရသည်။