စော (NSS) - ဇန်နဝါရီ ၁

ကမ္ဘာ့အမွေအနှစ်စာရင်းဝင် ပျူမြို့ဟောင်း (၃)မြို့ရှိ ယဉ်ကျေးမှုဇုန်များသို့ လာရောက်လေ့လာသည့် နိုင်ငံခြားသားများ၏ ဝင်ကြေးများကို ယနေ့ (ဇန်နဝါရီလ ၁ ရက်)မှစတင်၍ ပြောင်းလဲကောက်ခံခဲ့ကြောင်း သိရသည်။

ရှေးဟောင်းသုတေသနနှင့် အမျိုးသားပြတိုက်ဦးစီးဌာနက ယနေ့ (ဇန်နဝါရီလ ၁ ရက်)တွင် အထက်ပါကဲ့သို့ ကြေညာထားခြင်းဖြစ်သည်။

၎င်းဦးစီးဌာနက ယနေ့(ဇန်နဝါရီလ ၁ ရက်)မှစတင်၍ ကမ္ဘာ့အမွေအနှစ်စာရင်းဝင်ပျူမြို့ဟောင်း (၃)မြို့ဖြစ်သည့် ဟန်လင်း၊ ဗိဿနိုး နှင့် သရေ ခေတ္တရာယဉ်ကျေးမှုဇုန်များသို့ လာရောက်လေ့လာသည့် နိုင်ငံခြားသားတစ်ဦးလျှင် ငွေကျပ် (၁၀၀၀၀)နှုန်းဖြင့် ဝင်ကြေးပြောင်းလဲကောက်ခံမည်ဖြစ်ကြောင်း သိရသည်။

ယခင်က ဟန်လင်း၊ ဗိဿနိုး နှင့် သရေခေတ္တရာယဉ်ကျေးမှုဇုန်များသို့ လာရောက်သည့် ပြည်ပနိုင်ငံခြားသားတစ်ဦးလျှင် ဝင်ကြေးအဖြစ် ငွေကျပ် (၅၀၀၀)နှုန်း ကောက်ခံခဲ့ကြောင်း သိရသည်။

ထို့ပြင် မန္တလေး အပါအဝင် စစ်တွေ၊ တောင်ကြီး၊ မော်လမြိုင်၊ မြစ်ကြီးနား၊ ဟားခါး၊ လွိုင်ကော်၊ ဘားအံ၊ ပုသိမ်၊ ထားဝယ်နှင့်‌ ကျိုင်းတုံဒေသရှိ ယဉ်ကျေးမှုပြတိုက် နှင့် စာကြည့်တိုက်များသို့ လာရောက်သည့် ပြည်တွင်းဧည့်သည်တစ်ဦးလျှင် ဝင်ကြေးအဖြစ် ငွေကျပ် (၅၀၀)နှုန်းဖြင့် ကောက်ခံသွားမည်ဖြစ်ကြောင်း သိရသည်။

ထိုသို့ ပြောင်းလဲကောက်ခံသွားသော်လည်း ရဟန်းသံဃာများ၊ သီလရှင်များ၊ ကျောင်းသား၊ ကျောင်းသူများ၊ ကလေးသူငယ်များ၊ သံတမန်များနှင့် ကုလသမဂ္ဂလက်အောက်ခံ အဖွဲ့အစည်းများကို အခမဲ့ဝင်ရောက် လေ့လာခွင့်ပြုလျက်ရှိကြောင်း သိရသည်။