ရောင်နီ (NSS) - ဒီဇင်ဘာ ၃၀

           အိန္ဒိယနိုင်ငံ၊ အဝေးပြေးလမ်းမကြီးတစ်ခုအပေါ်မှာ ကြက်တွေ တင်ဆောင်လာတဲ့ ထရပ်ကားတစ်စီး ယာဉ်မတော်တဆဖြစ်ခဲ့ပါတယ်။ 

အိန္ဒိယနိုင်ငံ မြောက်ပိုင်း အတ္တရာပရာဒက်ရှ်ပြည်နယ်ရှိ အာဂရာ၊ ဒဲဟီ အဝေးပြေးလမ်းမကြီးတစ်နေရာမှာ ဒီဇင်ဘာလ ၂၇ ရက်က မြူမှိုင်းတွေ ထူထပ်နေတဲ့ နံနက်ပိုင်း ရာသီဥတုအခြေအနေကြား မတော်တဆမှုဖြစ်ပွားခဲ့ခြင်းဖြစ်ပါတယ်။ မတော်တဆမှုမှာ လူတစ်ဦးသေဆုံးပြီး အခြားလူ အများအပြား ဒဏ်ရာရရှိခဲ့ပါတယ်။

လူတစ်ဦး သေဆုံးပြီး အခြားသူ​တွေကတော့ ထိခိုက်ဒဏ်ရာရခဲ့ပေမယ့် အနီးအနားမှာရှိတဲ့လူတွေဟာ ဒဏ်ရာရသူတွေကို ကူညီမယ့်အစား မတော်တဆမှုဖြစ်ပွားရာ နေရာအနီး ပြန့်ကျဲနေတဲ့ ကြက်တွေကို ရသလောက် ခိုးယူခဲ့ကြတာပဲဖြစ်ပါတယ်။ 

X ဆိုရှယ်မီဒီယာမှာ တင်ထားတဲ့ ဗီဒီယိုတစ်ခုအရ အချို့ဟာ ကြက်တွေကို သေချာထုပ်ပိုးပြီး သူတို့အိတ်ထဲတောင် ထည့်နေတာတွေ့ရပါတယ်။ 

အဆိုပါထရပ်ကားကို မောင်းနှင်တဲ့ မစ္စတာ ဆူနေးလ်ကူးမားက ကြက်တွေ ခိုးယူနေတာကို တားဆီးဖို့ကြိုးစားခဲ့ပေမယ့် မအောင်မြင်ခဲ့ဘူးလို့ ဆိုပါတယ်။ 

ဒီအတွက် ထရပ်ကားဟာ ရူပီး ၂၅၀,၀၀၀ ထိ ဆုံးရှုံးခဲ့ရတယ်လို့ သိရပါတယ်။ ဆိုရှယ်မီဒီယာမှာတော့ အဆိုပါလုပ်ရပ်ကို ရှက်စရာအဖြစ်ရေးသားခဲ့ကြပြီး #IncredibleIndia စာသားတွေနဲ့ ဗီဒီယိုကို ဖော်ပြနေတာ တွေ့ရပါတယ်။