ကျော် (NSS) - ဒီဇင်ဘာ ၃၀

မန္တလေးတိုင်း၊ ချမ်းအေးသာစံမြို့နယ်တွင် အလုပ်သင် ဒု-ရဲအုပ် ရဲမေတစ်ဦးကို PDF အဖွဲ့ဝင်များက သေနတ်ဖြင့်ပစ်ခတ်ခဲ့ကြောင်း လုံခြုံရေးအဖွဲ့နှင့်နီးစပ်သူများထံမှ သိရသည်။

ယမန်နေ့ (ဒီဇင်ဘာလ ၂၉ ရက်)၊ ညနေ ၄ နာရီခွဲခန့်က PDF အဖွဲ့ဝင်များသည် အမှတ် (၃) နယ်မြေရဲစခန်းမှရုံးဆင်းပြန်လာသည့် အလုပ်သင် ဒု-ရဲအုပ်ရဲမေ တစ်ဦးအား ချမ်းအေးသာစံမြို့နယ်၊ ချမ်းအေးသာစံအရှေ့ရပ်ကွက်၊ ၂၉ လမ်း နှင့် လမ်း ၈၀ လမ်းဆုံတွင် သေနတ်ဖြင့်ပစ်ခတ်၍ ထွက်ပြေးသွားခဲ့ကြကြောင်း သိရသည်။

"ပစ်ခတ်ခံရတဲ့ရဲမေက ချမ်းအေးသာစံမြို့နယ်ရဲတပ်ဖွဲ့မှူးရုံးရဲ့ ရုံးလုပ်ငန်းတာဝန်တွေဆောင် ရွက်ဖို့ အလုပ်သင်အနေနဲ့တစ်နှစ်တာဝန်ကျနေတာပါ။ မနေ့က အလုပ်ပြီးလို့ရုံးဆင်းတဲ့အချိန် အရပ်ဝတ်နဲ့ဆိုင်ကယ်မောင်းပြီး သူနေတဲ့ အမှတ် (၃)နယ်မြေရဲစခန်းကိုပြန်သွားတယ်။ အခင်းဖြစ်တဲ့လမ်းဆုံမှာ ဆိုင်ကယ်ကိုခဏရပ်လိုက်တဲ့အချိန် ပစ်ခတ်ခံရတာပါ။ သူ့ဆိုင်ကယ်နောက်ကနေ ဆိုင်ကယ်နဲ့လိုက်လာပြီးပစ်သွားကြတာပါ"ဟု လုံခြုံရေးအဖွဲ့နှင့်နီးစပ်သူတစ်ဦးက ပြောသည်။

ထိုသို့ သေနတ်ဖြင့်ပစ်ခတ်ခံရမှုကြောင့် အလုပ်သင် ဒု-ရဲအုပ်ရဲမေ၏ ဘယ်ဘက်လည်ပင်း၌ ကျည်ဖောက်ဝင်ဒဏ်ရာရရှိခဲ့ကြောင်း သိရသည်။

"သူ့ကိုပစ်သွားတဲ့ PDF အဖွဲ့ဝင်တွေကတော့ ထွက်ပြေးသွားကြပြီ။ လုံခြုံရေးအဖွဲ့တွေရောက်လာပြီး ဒု-ရဲအုပ်ကိုဆေးရုံပို့ပေးခဲ့ကြတယ်။ ဆေးရုံကိုအရေးပေါ်အနေနဲ့ပို့ပေးခဲ့ကြရတာပါ"ဟု လုံခြုံရေးအဖွဲ့နှင့်နီးစပ်သူတစ်ဦးကပြောသည်။

ဖြစ်စဥ်မှ သေနတ်ဖြင့်ပစ်ခတ်ခံခဲ့ရသည့် အလုပ်သင် ဒု-ရဲအုပ်ရဲမေအား ဆေးကုသမှုခံယူနိုင်ရန် လုံခြုံရေးအဖွဲ့ဝင်များက မန္တလေးမြို့ပြည်သူ့ဆေးရုံကြီးသို့ ပို့ဆောင်ပေးခဲ့ကြကြောင်း သိရသည်။

ထို့ပြင် ပြစ်မှုကျူးလွန်သူများအား ဖမ်းဆီးရမိရေးနှင့်ဥပဒေအရထိရောက်စွာအရေးယူနိုင်ရေးတို့အတွက် လုံခြုံရေးအဖွဲ့ဝင်များက အမှုဖွင့်ကာ စုံစမ်းစစ်ဆေးမှုများပြုလုပ်လျက်ရှိကြောင်း သိရသည်။

ပြီးခဲ့သည့် အောက်တိုဘာလ ၁၀ ရက်ကလည်း အောင်မြေသာစံမြို့နယ်ရှိ ရပ်ကွက်အုပ်ချုပ်ရေးမှူးရုံးရှေ့၌ လုံခြုံရေးတာဝန်ထမ်းဆောင်နေသည့် ရဲတပ်ဖွဲ့ဝင်တစ်ဦးအား PDF အဖွဲ့ဝင်များက သေနတ်ဖြင့်ပစ်ခတ်ခဲ့ကြသည့်ဖြစ်စဥ်ဖြစ်ပွားခဲ့သည်။