NP News - ဒီဇင်ဘာ ၂၅

ကိုးကန့်လက်နက်ကိုင် MNDAA အဖွဲ့၏ ပစ်ခတ်တိုက်ခိုက်မှုကြောင့် တုံချိန်ဒေသရှိ အရပ်သား(၈)ဦး သေဆုံး၍ (၂၁)ဦး ထိခိုက်ဒဏ်ရာရရှိခဲ့ကြောင်း သိရသည်။

MNDAA အဖွဲ့သည် ယနေ့(ဒီဇင်ဘာလ ၂၅ ရက်) နံနက်ပိုင်းတွင် လောက်ကိုင်မြို့၊ တုံချိန်၊ Crown ဟိုတယ်ရှေ့၊ ကော်တုံး (၃)လမ်းပေါ်တွင် အထက် ပါကဲ့သို့ ပစ်ခတ်တိုက်ခိုက်ခဲ့ခြင်းဖြစ်ကြောင်း တုံချိန်ဒေသရှိ သတင်းအရင်း အမြစ်က NP News ကို ပြောသည်။

“တုံချိန်က Crown ဟိုတယ်ရှေ့၊ ကော်တုံး (၃)လမ်းမှာ အရပ်သားတွေကို MNDAA အဖွဲ့က ပစ်ခတ်တိုက်ခိုက်သတ်ဖြတ်တာ။ တုံချိန်မှာ တပ်မရှိတော့ဘူးလေ။ သူတို့ပဲ(MNDAA) ရှိတာ။ အကြောင်းပြချက်ကတော့ မသိဘူး။ သူတို့ လုပ်ချင်ရင်လုပ်တာပဲ။ သေတဲ့လူတွေ အကုန်လုံးက ကိုးကန့်တွေပဲ။ သေဆုံးတာ (၈)ယောက်ရှိတယ်။ ဒဏ်ရာရတဲ့သူက (၂၁)ယောက်ရှိတယ်။ အားလုံးက ကိုးကန့်တွေချည်ပဲ”ဟု အထက်ပါသတင်းအရင်းအမြစ်က ပြောသည်။

တုံချိန်ဒေသသည် လောက်ကိုင်မြို့နှင့်တစ်စပ်တည်းတွင်တည်ရှိပြီး ဒေသခံများအနေဖြင့် လောက်ကိုင်မြို့သစ်ဟု ခေါ်ဆိုလေ့ရှိကြောင်း သိရသည်။

လက်ရှိတွင် တုံချိန်ဒေသအား MNDAA အဖွဲ့က သိမ်းပိုက်ထားကြောင်း သိရပြီး ဒေသခံကိုးကန့်လူမျိုးများကို ၎င်းတို့အဖွဲ့ထဲသို့ ဝင်ရောက်ခိုင်းမှုများရှိကြောင်း အထက်ပါသတင်းအရင်းအမြစ်က ဆက်လက်ပြောသည်။

ထို့ကြောင့် ဒေသခံကိုးကန့်လူမျိုးများအနေဖြင့် MNDAA အဖွဲ့ထံသို့ ဝင်ရောက်မှုများရှိသကဲ့သို့ မဝင်ရောက်သောသူများကိုလည်း အထက်ပါကဲ့သို့ ပစ်ခတ်တိုက်ခိုက်လေ့ရှိကြောင်း ၎င်းက ထပ်မံပြောသည်။

ထို့ပြင် MNDAA လက်နက်ကိုင်အဖွဲ့သည် နေရပ်စွန့်ခွာထွက်ပြေးတိမ်းရှောင်နေသူများကို အတင်းအဓမ္မ လူသစ်စုဆောင်းခြင်း၊ ပြန်ပေးဆွဲခြင်းများကိုလည်း လုပ်ဆောင်နေကြောင်း လူ့အခွင့်ရေးစောင့်ကြည့်ရေးအဖွဲ့(HRW)က တရားဝင် ထုတ်ဖော်အသိပေးထားသည်။

MNDAA ဦးဆောင်သော မြောက်ပိုင်းမဟာမိတ်လက်နက်ကိုင် (၃)ဖွဲ့သည် ပြီးခဲ့သော အောက်တိုဘာလ ၂၇ ရက်မှစတင်ကာ ရှမ်းပြည်နယ်အရှေ့ မြောက်ပိုင်းဒေသရှိ တပ်မတော်၏ လုံခြုံရေးစခန်းများကို အင်အားအလုံး အရင်းဖြင့် ဝင်ရောက်တိုက်ခိုက်ခဲ့သည်။

ထိုသို့ MNDAA ဦးဆောင်အဖွဲ့၏ ကျူးကျော်တိုက်ခိုက်မှုများကြောင့် လောက်ကိုင်မြို့ နှင့် တစ်ဝိုက်တွင် ပြီးခဲ့သော ရက်ပိုင်းအတွင်း တိုက်ပွဲအပြင်းအထန်ဖြစ်ပွားခဲ့ပြီး မြို့ပြအဆောက်အဦးများစွာသည်လည်း ပျက်စီးနေလျက်ရှိသည်။