သန့်ဇင် (NSS) - ဒီဇင်ဘာ ၂၅

ဘရော်နီကာသည် ထိုင်းဖိုက်တာမယ် Phayasingha ကို ပထမအချီအတွင်း အလဲထိုးအနိုင်ယူကာ ထိုင်းဘုရင့်ဖလား ချန်ပီယံဆုကို (၂)ကြိမ်ဆက်တိုက် ရယူနိုင်ခဲ့ကြောင်း သိရသည်။

မြန်မာနိုင်ငံကိုယ်စားပြု ဘရော်နီကာသည် ယမန်နေ့(ဒီဇင်ဘာလ ၂၄ ရက်) တွင် ထိုင်းနိုင်ငံ အယုဒ္ဓယမြို့၌ ကျင်းပသည့် ထိုင်းဘုရင့်ဖလား ဗိုလ်လုပွဲစဉ်အဖြစ် မွေထိုင်းဖိုက်တာမယ် Phayasingh နှင့် ယှဉ်ပြိုင်ထိုးသတ်ခဲ့ကြရာ ပထမအချီ၌ပင် ပြိုင်ဘက်အား အလဲထိုးအနိုင်ရယူနိုင်ခဲ့ခြင်းဖြစ်သည်။

အသက်(၂၇)နှစ်အရွယ်ရှိ ဘရော်နီကာသည် အဆိုပါပွဲစဉ်ကို အနိုင်ရပြီးနောက် ထိုင်းမွေထိုင်းပွဲစဉ်များတွင် (၁၆)ပွဲဆက်တိုက် အနိုင်ယူနိုင်ခဲ့သူဖြစ်ကာ ချန်ပီယံဆုကို (၂)ကြိမ်ဆက်တိုက်ရယူနိုင်ခဲ့ကြောင်း သိရသည်။

အဆိုပါ ချန်ပီယံဆုအား ရယူနိုင်ခဲ့ပြီးနောက် ဘရော်နီကာအနေဖြင့် ၎င်း၏ လူမှုကွန်ရက်စာမျက်နှာမှတစ်ဆင့် “အားလုံး Merry Christmas ပါနော်။ ဒီနှစ်လည်း ခရစ်စမက်လက်ဆောင်လေး ထပ်ယူဆောင်လာနိုင်တဲ့အတွက် Vero နဲ့ထပ်တူ အားလုံး ကျေနပ်ပျော်ကြမယ်လို့ မျှော်လင့်ပါတယ်” ဟု ရေးသားထားသည်ကို တွေ့ရသည်။

၎င်းသည် မြန်မာ့လက်ဝှေ့ပြိုင်ပွဲများကို ယှဉ်ပြိုင်ထိုးသတ်ခဲ့ဖူးသူဖြစ်ပြီး ကိုရိုနာဗိုင်းရပ်စ်ဖြစ်ပွားချိန်တွင် ထိုင်းနိုင်ငံသို့ မွေထိုင်းပွဲစဉ်များ သွားရောက်ယှဉ်ပြိုင်ခဲ့သူ ဖြစ်ကြောင်း သိရသည်။

လက်ရှိအချိန်တွင် မွေထိုင်းလက်ဝှေ့ပြိုင်ပွဲကျင်းပရေးအဖွဲ့ဖြစ်သည့် Thai Fight နှင့်  (၃)နှစ်စာ စာချုပ်ချုပ်ဆိုခဲ့ကြောင်း သိရသည်။

ထို့ပြင် မြန်မာနိုင်ငံကိုယ်စားပြု ဘရော်နီကာအနေဖြင့် ထိုင်းမွေထိုင်းပွဲစဉ်များကို ယှဉ်ပြိုင်ချိန်ကာလအတွင်း ထိုင်း၊ ဘရာဇီး၊ အီရန်၊ အီတလီ၊ ဂရိ၊ အာဂျင်တီးနား၊ ဗီယက်နမ်နိုင်ငံတို့၏ အမျိုးသမီးဖိုက်တာများကို အနိုင်ရယူနိုင်ခဲ့ကြောင်း သိရသည်။