မြူနစ် (NSS) - ဒီဇင်ဘာ ၂၅

စစ်ရေယာဉ် (၅)စင်း ထပ်မံတပ်တော်ဝင်ခဲ့ပြီး အိန္ဒိယသမုဒ္ဒရာအတွင်းရှိ မြန်မာ့ပင်လယ်ပြင်နှင့် ဆက်စပ်ပင်လယ်ပြင်များကို အင်အားဖြန့်ကြက်နိုင်ရန် ပြင်ဆင်နေကြောင်း ဒုတိယ ဗိုလ်ချုပ်မှူးကြီးစိုးဝင်းက ပြောသည်။

၎င်းက ယမန်နေ့(ဒီဇင်ဘာလ ၂၄ ရက်)တွင် ရန်ကုန်မြို့ရှိ အမှတ်(၃)ရေတပ်ဆိပ်ခံတံတား၌ ကျင်းပသော (၇၆)နှစ်မြောက် တပ်မတော်(ရေ) နှစ်ပတ်လည်နေ့အခမ်းအနားတွင် အထက်ပါကဲ့သို့ အသိပေးပြောကြားခဲ့ခြင်းဖြစ်သည်။

အဆိုပါနှစ်ပတ်လည်နေ့၌ နိုင်ငံတော်၏ ရေကြောင်းဆိုင်ရာအကျိုးစီးပွားများ နှင့် မြန်မာ့ပင်လယ်ပြင်သီးသန့်စီးပွားရေးဇုန်အား ကာကွယ်စောင့် ရှောက်ရန်အတွက် စစ်ရေယာဉ် (၅)စင်း တပ်တော်ဝင်ခဲ့ကြောင်း သိရသည်။

တပ်မတော်(ရေ)သို့ ၃၃ မီတာ ကမ်းခြေစောင့်တိုက်ရေယာဉ် (၂)စင်း၊ ပြည်ပမှ နည်းပညာလွှဲပြောင်းရယူကာ တပ်မတော်(ရေ)က ကိုယ်တိုင်တည် ဆောက်ခဲ့သော သတ္တမမြောက် နှင့် အဋ္ဌမမြောက် ၂၇ မီတာ Super Dvora အမြန်သွားကင်းလှည့် ရေယာဉ် (၂)စင်းနှင့် မြစ်တွင်းသွားကင်းလှည့်ရေယာဉ်တစ်စင်းတို့ တပ်တော်ဝင်ခဲ့ခြင်းဖြစ်သည်။

တပ်မတော်(ရေ)၏ တရားဝင်အသိပေးထုတ်ပြန်မှုများအရ လက်ရှိတွင် တိုက်ခိုက်ရေး ရေငုပ်သင်္ဘော (၂)စင်းကို ပိုင်ဆိုင်ထားပြီး ၎င်းသင်္ဘော (၂) စင်းအား အိန္ဒိယနှင့် တရုတ်နိုင်ငံတို့ထံမှ ရယူပိုင်ဆိုင်ထားခြင်းဖြစ်ကြောင်း သိရသည်။

မြန်မာ့တပ်မတော်(ရေ)အတွက် စစ်ရေယာဉ်များ တည်ဆောက်လျက်ရှိရာတွင် ၂၀၁၁ ခုနှစ်မှစ၍ ၂၀၂၃ ခုနှစ် ဇန်နဝါရီလအထိ ဆယ်စုနှစ်တစ်စုကျော်ကာလအတွင်း၌ စစ်ရေယာဉ်အစင်းပေါင်း (၁၀၀)ကျော်ကို တည် ဆောက်နိုင်ခဲ့ကာ တပ်တော်ဝင်ထားကြောင်း ကာကွယ်ရေးဦးစီးချုပ်(ရေ) ဗိုလ်ချုပ်ကြီးမိုးအောင်က ပြောကြားခဲ့ဖူးသည်။

လက်ရှိတွင် တပ်မတော်(ရေ)ကို တည်ဆောက်ရာ၌ အဆင့်လိုက်မျှော်မှန်းချက်များချမှတ်ကာဆောင်ရွက်လျက်ရှိပြီး ပထမအဆင့်ဖြစ်သည့် မြန်မာ့ပင်လယ်ပြင် သီးသန့်စီးပွားရေးဇုန်းအား အပြည့်အဝကာကွယ်နိုင်သော သုံးဘက်မြင် စစ်ဆင်နိုင်စွမ်းရှိသည့် တိုက်ပွဲဝင်အသင့်ရေတပ်အဖြစ် တည် ဆောက်နိုင်ခဲ့ပြီဖြစ်ကြောင်း ဒုတိယဗိုလ်ချုပ်မှူးကြီးစိုးဝင်းက ပြောသည်။

ထို့ပြင် ဒုတိယအဆင့်အနေဖြင့် အိန္ဒိယသမုဒ္ဒရာအတွင်းရှိ မြန်မာ့ပင်လယ်ပြင်နှင့် ဆက်စပ်ပင်လယ်ပြင်များသို့ အင်အားဖြန့်ကြက်နိုင်စွမ်းရှိသည့် ရေတပ်အဖြစ် တည်ဆောက်သွားမည်ဖြစ်ကြောင်းလည်း ၎င်းက ထပ်မံအသိပေးပြောကြားသည်။

အဆိုပါရေတပ်ဖြစ်ရန်အတွက် ပင်လယ်ပြင်၌ ရေရှည်ရပ်တည်နိုင်စွမ်းရှိပြီး တိုက်စွမ်းအားပြည့်ဝသော စစ်ရေယာဉ်ကြီးများရှိမှသာ အကောင်အထည် ဖော်နိုင်မည်ဖြစ်သည့်အတွက် စစ်ရေယာဉ်ကြီးများကို ဆက်လက်တည် ဆောက်သွားရမည်ဟု ဒုတပ်ချုပ်က ပြောသည်။

ထို့ပြင် တပ်မတော်(ရေ)သည် အနာဂတ်၌ လွန်းကျင်းကြီးများနှင့် ရေယာဉ်တည်ဆောက်နိုင်မှု စွမ်းရည်များကို ပေါင်းစပ် ကာ စွမ်းအားကြီးမားသော စစ်ရေယာဉ်ကြီးများအပြင် အရပ်ဘက် ကုန်တင်ရေယာဉ်ကြီးများနှင့် ဆီတင်ရေယာဉ်ကြီးများကိုလည်း တည်ဆောက်ရန် ပြင်ဆင်နေဖွယ်ရှိသည်။

လက်ရှိတွင် တပ်မတော်(ရေ)၌ တိုက်ခိုက်ရေး ရေငုပ်သင်္ဘော(၂)စင်းကို ပိုင်ဆိုင်ထားသည့်အပြင် ဒုံးပျံတင် ဖရီးဂိတ်စစ်ရေယာဉ်များကိုလည်း ကိုယ်တိုင်ထုတ်လုပ်ပိုင်ဆိုင်နေသည့်အဆင့်ထိ ရောက်ရှိနေပြီဖြစ်ကြောင်း သိရသည်။