Pika (NSS) - ဒီဇင်ဘာ ၂ဝ

ဂါဇာကမ်းမြောင်ဒေသအပေါ် အစ္စရေး၏ ထိုးစစ်ဆင်မှုများနှင့်ပတ်သက်ပြီး စစ်ရာဇဝတ်မှုကျူးလွန်နေကြောင်း စွဲချက်တင်ရန်အတွက် နိုင်ငံတကာရာဇဝတ်တရားရုံး (ICC)ထံ လိုအပ်သော စာရွက်စာတမ်းများအားလုံးကို အဆိုပြုတင်သွင်းခဲ့ကြောင်း တောင်အာဖရိကသမ္မတဆိုင်ရေးရာမာဖိုဆာ က ပြောကြားခဲ့သည်။

ပြီးခဲ့သည့် အောက်တိုဘာလ(၇)ရက်တွင် ဟားမက်လက်နက်ကိုင်အဖွဲ့သည် အစ္စရေးကို ဒုံးကျည်များဖြင့် စတင် ပစ်ခတ်တိုက်ခိုက်ခဲ့ခြင်းကြောင့် အစ္စရေးနိုင်ငံသား(၁၂ဝဝ)ကျော် သေဆုံးခဲ့ကြောင်း သိရသည်။ ထို့အပြင် ဟားမက် လက်နက်ကိုင်အဖွဲ့သည် အစ္စရေးနိုင်ငံတောင်ပိုင်းကို ဝင်ရောက်စီးနင်းမှုများ လုပ်ဆောင်ခဲ့ပြီး လူ(၂၄ဝ) ဦးကို ဓါးစာခံအဖြစ် ဖမ်းဆီးခေါ်ဆောင်သွားခဲ့ကြောင်းလည်း သိရသည်။ 

အဆိုပါတိုက်ခိုက်မှုများကို လက်တုံ့ပြန်သည့်အနေဖြင့် ဟားမက်လက်နက်ကိုင်အဖွဲ့ကို အမြစ်ပြတ်ချေမှုန်းသွား မည်ဖြစ်ကြောင်း အစ္စရေးဝန်ကြီးချုပ်နေတန်ရာဟုက ကတိပြုပြောဆိုခဲ့ပြီး ထိုးစစ်ဆင်မှုများကို လုပ်ဆောင်ခဲ့ရာ ကလေးငယ်နှင့်အမျိုးသမီးများ အပါအဝင် ပါလက်စတိုင်းလူမျိုး (၁၉ဝဝဝ)ကျော် သေဆုံးခဲ့ကြောင်း သိရသည်။ ပြီးခဲ့သည့်လတွင် တောင်အာဖရိကသမ္မတဆိုင်ရေးရာမာဖိုဆာသည် ဟားမက်လက်နက်ကိုင်အဖွဲ့၏ ကျူးကျော် တိုက်ခိုက်မှုကို ပြစ်တင်ရှုတ်ချခဲ့သလို အဆိုပါတိုက်ခိုက်မှုမှာ နိုင်ငံတကာဥပဒေကို ချိုးဖောက်ခြင်းဖြစ်ကြောင်း စွပ်စွဲပြောဆိုခဲ့သည်။

ထို့အပြင် အစ္စရေးသည် ဂါဇာကမ်းမြောင်ဒေသအပေါ် ထိုးစစ်ဆင်မှုများအား ပိုမိုအရှိန်မြှင့်လုပ်ဆောင်ကာ လူမျိုးတုံးသတ်ဖြတ်မှုများကို ကျူးလွန်နေကြောင်း ဆိုင်ရေးရာမာဖိုဆာက အခိုင်အမာပြောဆိုခဲ့သည်။ ဆိုင်ရေးရာမာဖိုဆာသည် အစ္စရေး-ဟားမက်စစ်ပွဲတွင် အစ္စရေး၏လုပ်ရပ်များကို စုံစမ်းစစ်ဆေးရန် နိုင်ငံတကာ ရာဇဝတ်တရားရုံးကို တောင်းဆိုခဲ့ဖူးပြီး အဆိုပါစုံစမ်းစစ်ဆေးမှုများအတွက် အခြားနိုင်ငံအများအပြားကို ပူးပေါင်းပါဝင်ရန် တောင်းဆိုခဲ့ဖူးကြောင်းလည်း သိရသည်။

ဂါဇာကမ်းမြောင်ဒေသတွင်ဖြစ်ပွားနေသော ပဋိပက္ခသည် တောင်အာဖရိကနိုင်ငံနှင့် အစ္စရေးနိုင်ငံကြား သံတမန် ဆက်ဆံရေးများကို ပိုမိုတင်းမာလာစေခဲ့ကြောင်း သိရသည်။ ထို့အပြင် ပါလက်စတိုင်းနယ်မြေတွင် အပစ်အခတ်ရပ်စဲရန် အစ္စရေးဝန်ကြီးချုပ်နေတန်ရာဟုက ကတိမပြုမချင်း အစ္စရေးနှင့်ဆက်ဆံရေးများကို ရပ်ဆိုင်း ထားရန် တောင်အာဖရိကလွှတ်တော်အမတ်များက ပြီးခဲ့သည့်လနှောင်းပိုင်းတွင် ထောက်ခံခဲ့ကြကြောင်း သိရသည်။

အစ္စရေးက စစ်ရာဇဝတ်မှုကျူးလွန်နေကြောင်း စွပ်စွဲပြောဆိုချက်များကို အမြန်ဆုံးစုံစမ်းစစ်ဆေးရန်အတွက် စတင် လုပ်ဆောင်ရန် နိုင်ငံတကာရာဇဝတ်တရားရုံးကို တောင်းဆိုခဲ့ကြောင်း ဆိုင်ရေးရာမာဖိုဆာ က ပြောကြားခဲ့သည်။ ဆိုင်ရေးရာမာဖိုဆာ က "ဒီကိစ္စကို အလေးအနက်ထား လုပ်ဆောင်ဖို့လိုအပ်ပါတယ်။ ဒါကြောင့် တောင်အာဖရိကနဲ့ အခြားနိုင်ငံတွေဟာ သူတို့ရဲ့စာရွက်စာတမ်းအပြည့်အစုံကို ICC ကို တင်ပြထားပါတယ်" ဟု ပြောခဲ့သည်။