Pika (NSS) - ဒီဇင်ဘာ ၁၈ 

မြောက်ကိုရီးယားနိုင်ငံသည် ဒီဇင်ဘာလ(၁၈)ရက်တွင် တာဝေးပစ် ပဲ့ထိန်းဒုံးကျည်တစ်စင်းကို ပစ်လွှတ်ခဲ့ကြောင်း တောင်ကိုရီးယားစစ်တပ်က ပြောကြားခဲ့သည်။

မြောက်ကိုရီးယားသည် ဒီဇင်ဘာလ(၁၇)ရက် ညနှောင်းပိုင်းတွင် တာတိုပစ်ပဲ့ထိန်းဒုံးကျည်တစ်စင်းကို ပစ်ခတ်ခဲ့ကြောင်း တောင်ကိုရီးယားစစ်တပ်က ပြောဆိုခဲ့ပြီးနောက် နာရီပိုင်းအကြာတွင် ယခုကဲ့သို့ ထပ်မံပစ်လွှတ်ခဲ့ခြင်းဖြစ်ကြောင်း သိရသည်။

အမေရိကန် နှင့် တောင်ကိုရီးယားတို့အပေါ် မြောက်ကိုရီးယား၏နျူကလီးယားတိုက်ခိုက်မှုမှန်သမျှသည် မြောက်ကိုရီးယားခေါင်းဆောင်ကင်ဂျုံအန်းအစိုးရ အဆုံးသတ်ခြင်းကို ဖြစ်ပေါ်စေမည်ဟု အမေရိကန်က သတိပေးပြောခဲ့ပြီးနောက် ယခုကဲ့သို့ပစ်လွှတ်မှုများထွက်ပေါ်လာခြင်းဖြစ်သည်။

တောင်ကိုရီးယားစစ်ဦးစီးချုပ်များရုံး က "မြောက်ကိုရီးယားဟာ တာဝေးပစ်ပဲ့ထိန်းဒုံးကျည်တစ်စင်းကို ဂျပန် ပင်လယ်ထဲသို့ ပစ်လွှတ်ခဲ့ပါတယ်" ဟု ပြောခဲ့သည်။ ဂျပန်အစိုးရ က "မြောက်ကိုရီးယားဟာ ပဲ့ထိန်းဒုံးကျည်လို့ ယူဆရတဲ့ ဒုံးကျည်တစ်စင်းကို ဂျပန်ပင်လယ်ထဲကို ပစ်လွှတ်ခဲ့ပါတယ်" ဟု ဆိုခဲ့သည်။

သို့သော်လည်း ဂျပန်အစိုးရသည် အဆိုပါပစ်လွှတ်မှုနှင့်ပတ်သက်သည့် နောက်ထပ်သတင်းအချက်အလက်များကို ထုတ်ဖော်ပြောဆိုခဲ့ခြင်းမျိုးမရှိခဲ့ကြောင်း သိရသည်။ 

အဆိုပါပဲ့ထိန်းဒုံးကျည်သည် အကွာအဝေး ကီလိုမီတာ(၁ဝဝဝ)ခန့်အထိ ပျံသန်းခဲ့ပြီးနောက် ဂျပန်ပင်လယ်ထဲသို့ ကျသွားခဲ့ကြောင်း တောင်ကိုရီးယားစစ်ဦးစီးချုပ်များရုံးက ပြောကြားခဲ့သည်။ ထို့အပြင် အမေရိကန်၊ တောင်ကိုရီးယား နှင့် ဂျပန်တို့သည့် မြောက်ကိုရီးယား၏ ပဲ့ထိန်းဒုံးကျည်ပစ်လွှတ်မှုနှင့်ပတ်သက်ပြီး သတင်း အချက်အလက်များကို အနီးကပ်မျှဝေခဲ့ကြကြောင်း တောင်ကိုရီးယားအစိုးရက ပြောကြားခဲ့သည်။

မြောက်ကိုရီးယား၏ ပဲ့ထိန်းဒုံးကျည်ပစ်လွှတ်မှုများသည် ငြိမ်းချမ်းရေး နှင့် တည်ငြိမ်ရေးကို ခြိမ်းခြောက်နေသည့် လုပ်ရပ်တစ်ခုဖြစ်ကြောင်း ဂျပန်ဝန်ကြီးချုပ်ဖူမီအိုကီရှီဒါက ဖော်ပြခဲ့သည်။ အမေရိကန်နိုင်ငံခြားရေးဝန်ကြီးဌာန က "မြောက်ကိုရီးယားက ယခုနှစ်အတွင်း လုပ်ဆောင်ခဲ့တဲ့ ပဲ့ထိန်းဒုံးကျည်ပစ်လွှတ်မှုတွေလိုပဲ ဒီပစ်လွှတ်မှုတွေ ဟာ ကုလသမဂ္ဂလုံခြုံရေးကောင်စီရဲ့ဆုံးဖြတ်ချက်တွေကို ချိုးဖောက်နေတာပဲဖြစ်ပါတယ်" ဟု ပြောခဲ့သည်။