Pika (NSS) - ဒီဇင်ဘာ ၁၈ 

ထိုင်ဝမ်နှင့် တရုတ်နိုင်ငံကြားရှိ ရေလက်ကြားအလယ်မျဉ်းကို တရုတ်၏ မိုးပျံပူဖောင်းနှစ်လုံး ဖြတ်ကျော် ပျံသန်းဝင်ရောက်လာခဲ့ကြောင်း ထိုင်ဝမ်ကာကွယ်ရေးဝန်ကြီးဌာနက ဒီဇင်ဘာလ(၁၈)ရက်တွင် ထုတ်ဖော်ပြောဆိုခဲ့သည်။

တရုတ်၏ မိုးပျံပူဖောင်းများ ထိုင်ဝမ်ရေလက်ကြားအလယ်မျဉ်းကို ဖြတ်ကျော်ဝင်ရောက်လာခြင်းသည် ယခုလ အတွင်း နှစ်ကြိမ်မြောက် ဖြတ်ကျော်ဝင်ရောက်လာခြင်းဖြစ်သည်။ ပြီးခဲ့သည့် ဖေဖော်ဝါရီလတွင် အမေရိကန်နိုင်ငံ လေပိုင်နက်သို့ ဖြတ်ကျော်ပျံသန်းခဲ့သော တရုတ်၏စပိုင်မိုးပျံပူဖောင်းကို အမေရိကန်အစိုးရက ပစ်ချခဲ့ကြောင်း လည်း သိရသည်။

သို့သော်လည်း အဆိုပါမိုးပျံပူဖောင်းမှာ အရပ်ဘက်သုံးမိုးပျံပူဖောင်းတစ်ခုသာဖြစ်ကြောင်း တရုတ်အစိုးရက ပြောခဲ့သည်။ တရုတ်အစိုးရသည် ထိုင်ဝမ်ကျွန်းကို ၎င်း၏ ပိုင်နက်နယ်မြေအဖြစ် သတ်မှတ်ထားပြီး ပြီးခဲ့သည့်နှစ် များအတွင်း ထိုင်ဝမ်ကျွန်းအပေါ် စစ်ရေးနှင့်နိုင်ငံရေးအရ ဖိအားပေးမှုများကို ပိုမိုတိုးမြှင့်လုပ်ဆောင်ခဲ့သော်လည်း မိုးပျံပူဖောင်းများ ဖြတ်ကျော်ဝင်ရောက်လာခြင်းမှာ အလွန်ရှားပါးသည့်ဖြစ်ရပ်တစ်ခုဖြစ်ကြောင်းလည်း သိရသည်။

ထိုင်ဝမ်ရေလက်ကြားကို ဖြတ်ကျော်လာသော တရုတ်မိုးပျံပူဖောင်းနှစ်လုံးကို ဒီဇင်ဘာလ(၁၇)ရက် နံနက် (၉)နာရီ (၃)မိနစ် နှင့် နေ့လည်(၂)နာရီ (၄၃)မိနစ်တို့တွင် Keelung မြို့ အနောက်မြောက်ဘက်ရေပိုင်(၁၁ဝ) အကွာတွင် တွေ့ရှိခဲ့ခြင်းဖြစ်ကြောင်း ထိုင်ဝမ်ကာကွယ်ရေးဝန်ကြီးဌာနက ပြောကြားခဲ့သည်။

ထိုင်ဝမ်ကာကွယ်ရေးဝန်ကြီးဌာနက "တရုတ်မိုးပျံပူဖောင်းတွေဟာ အရှေ့ဖက်ကို ဦးတည်သွား ပြီးတော့ (၉)နာရီ (၃၆)မိနစ်နဲ့ (၄)နာရီ (၃၅)မိနစ်တို့မှာ ပျောက်ကွယ်သွားခဲ့ပါတယ်" ဟု ပြောခဲ့သည်။ 

အစောပိုင်းစုံစမ်းစစ်ဆေးမှုများအရ အဆိုပါမိုးပျံပူဖောင်းများမှာ မိုးလေဝသမိုးပျံပူဖောင်းများဖြစ်ကြောင်း ထိုင်ဝမ် ကာကွယ်ရေးဝန်ကြီးဌာနပြောရေးဆိုခွင့်ရှိသူတစ်ဦးက ပြောကြားခဲ့သည်။ ပြီးခဲ့သည့် ဒီဇင်ဘာလ(၈)ရက်တွင် တရုတ်မိုးပျံပူဖောင်းတစ်လုံးက ထိုင်ဝမ်ရေလက်ကြားကို ဖြတ်ကျော်ဝင်ရောက်လာပြီးနောက် ရက်ပိုင်းအကြာတွင် ယခုကဲ့သို့ ထပ်မံဖြတ်ကျော်ဝင်ရောက်လာခဲ့ခြင်းဖြစ်သည်။