ကျော် (NSS) - ဒီဇင်ဘာ ၁၅

ရှမ်းပြည်နယ်(မြောက်ပိုင်း)၊ နမ္မတူမြို့၊ ရပ်ကွက် (၃)ရှိ အ.ထ.က (၁) ကျောင်းအနီးတွင် လုံခြုံရေးအဖွဲ့ဝင်များနှင့် တအာင်းလက် နက်ကိုင်အဖွဲ့ TNLA တို့အကြား မိနစ်ပိုင်းကြာအပြန်အလှန်ပစ်ခတ်မှုဖြစ်ပွားခဲ့ကြောင်း ဒေသခံများထံမှသိရသည်။

ယနေ့(ဒီဇင်ဘာလ ၁၅ ရက်) ၊ နံနက် ၉ နာရီ ၄၅ မိနစ်ခန့်က နမ္မတူမြို့၊ ရပ်ကွက်(၃)ရှိ အ.ထ.က(၁)ကျောင်းအနီးရှိ စစ်ဆေးရေးဂိတ်တွင် လုံခြုံရေးအဖွဲ့ဝင်များက ဆိုင်ကယ်စီးနင်းလာသည့် အမျိုးသား(၃)ဦးအား စစ်ဆေးရန်ရပ်တန့်ခိုင်းရာမှတဆင့် နှစ်ဖက်အပြန်အလှန်ပစ်ခတ်မှုဖြစ်ပွားခဲ့ခြင်းဖြစ်ကြောင်း သိရသည်။

"ပစ်ခတ်မှုဖြစ်တဲ့နေရာက လမ်းဆုံစစ်ဆေးရေးဂိတ်ရှိတဲ့နေရာမှာပါ။ အဲဒီနားမှာ အ.ထ.က(၁) ကျောင်းလည်းရှိတယ်။ ဆိုင်ကယ်စီးလာတဲ့ ၃ ယောက်က TNLA အဖွဲ့ကလို့သိရတယ်။ ပစ်ခတ်ချိန်ကခန့်မှန်း ၁၅ မိနစ်လောက်ကြာတယ်"ဟု ဒေသခံတစ်ဦးက ပြောသည်။

အပြန်အလှန်ပစ်ခတ်မှုဖြစ်ပွားပြီးနောက် တအာင်းလက်နက် ကိုင်အဖွဲ့မှ အဖွဲ့ဝင်(၂)ဦးသေဆုံးခဲ့ပြီး ဖြစ်စဥ်နေရာအား လုံခြုံ ရေးအဖွဲ့ဝင်များက ဖြတ်သန်းသွား လာခွင့်ပိတ်ကာ စစ်ဆေးမှုများပြုလုပ်လျက်ရှိကြောင်း သိရသည်။

"တိုက်ပွဲဖြစ်တယ် အသံကြားတာနဲ့ တစ်ချို့မိဘတွေက စိတ်ပူပြီးလာခေါ်ကြတယ်လို့ပြောတယ်။ သေချာတာတစ်ခုကတော့ ကျောင်းပိတ်ထားတာတွေ့တယ်"ဟု ဒေသခံတစ်ဦးကပြော သည်။

တအာင်းလက်နက်ကိုင်အဖွဲ့ (TNLA) ပါဝင်သော မြောက်ပိုင်းမဟာမိတ်(၃)ဖွဲ့သည် ပြီးခဲ့သည့် အောက်တိုဘာလ ၂၇ ရက်မှစတင်ကာ ရှမ်းပြည်နယ်(မြောက်ပိုင်း) ရှိ လုံခြုံရေးစခန်းများအား ဝင်ရောက်တိုက်ခိုက်မှုများပြုလုပ်လျက်ရှိကြသည်။

လက်ရှိအချိန်တွင် တရုတ်နိုင်ငံ၏ ကြားဝင်ကူညီမှုကြောင့်  NSPNC နှင့်မြောက်ပိုင်းမဟာမိတ်(၃)ဖွဲ့မှတာဝန်ရှိသူများတွေ့ဆုံ၍ လက်ရှိပဋိပက္ခများကို စစ်ရေးအစား နိုင်ငံရေးဖြင့်ဖြေရှင်းရန် ဆွေးနွေးခဲ့ကြသည်။