ဂျန်ဇက် (NSS) - ဒီဇင်ဘာ ၁၅ 

ဥရောပတိုက်ရှိ ဂျုးအင်စတီကျူးရှင်းများကိုတိုက်ခိုက်ဖို့ ကြံစည်နေသူအဖြစ် သံသယရှိသူ ဟားမက်စ်အုပ်စုအဖွဲ့ဝင်လေးဦးကို ဖမ်းဆီးထိန်းသိမ်းခဲ့ရကြောင်း ဂျာမနီအစိုးရရှေ့နေများက ပြောပါတယ်။

ဖမ်းဆီးထိန်းသိမ်းခဲ့သူ ဟားမက်စ်အဖွဲ့ လေးဦးအနက် သုံးဦးကို ဂျာမနီနိုင်ငံဘာလင်မြို့မှာ ထိန်းသိမ်းခဲ့ပြီး အခြားတစ်ဦးကို နယ်သာလန်နိုင်ငံမှာ ဖမ်းဆီးထိန်းသိမ်းခဲ့တာဖြစ်ကြောင်း သိရပါတယ်။

အဆိုပါ ဖမ်းဆီးခံရသူအားလုံးဟာ ဟားမက်စ်လက်နက်ကိုင်အဖွဲ့ရဲ့စစ်ရေးခေါင်းဆောင် နဲ့ ရင်းနှီးသူများဖြစ်ကြောင်း ဖမ်းဆီးခံရသူလေးဦးဟာ လက်ဘနွန်နိုင်ငံသား  နှစ်ဦး၊ အီဂျစ်နိုင်ငံသားတစ်ဦးနဲ့ နယ်သာလန်နိုင်ငံသား တစ်ဦးတို့ဖြစ်ကြောင်း ပြောပါတယ်။ 

ဂျာမနီတရားရေးဝန်ကြီး မာကိုစ့်ဘတ်ချ်မန်က "ပြီးခဲ့တဲ့သီတင်းပတ်များအတွင်း ဂျာမနီနိုင်ငံအတွင်းမှာ ဂျူးလူမျိုး အင်စတီကျူးရှင်းတွေကို တိုက်ခိုက်မှုအရှိန်မြင့်တက်လာခဲ့တယ်။ အထူးသဖြင့် အစ္စရေးနဲ့ ဟားမက်စ်လက်နက်ကိုင်အဖွဲ့ကြား စစ်ပွဲစတင်ခဲ့ပြီးနောက်ပိုင်းမှာ ဂျာမနီနိုင်ငံအတွင်းရှိ ဂျုးတွေကို ပစ်မှတ်ထား တိုက်ခိုက်တာတွေ မြင့်တက်လာခဲ့တာပါ" လို့ ပြောပါတယ်။ 

ဂျာမနီတရားရေးဝန်ကြီးက ဂျာမနီအစိုးရအနေနဲ့ နိုင်ငံအတွင်းရှိ ဂျူးလူမျိုးတွေကို ကာကွယ်ပေးနိုင်အောင် အရာရာတိုင်း လုပ်ဆောင်သွားမှာဖြစ်ကြောင်း ပြောပါတယ်။ ဟားမက်စ် နဲ့ အစ္စရေးနိုင်ငံကြားစစ်ပွဲဖြစ်ပွားခဲ့ပြီးနောက်ပိုင်း အစွန်းရောက်အကြမ်းဖက်အဖွဲ့များရဲ့ရန်ပြုလာနိုင်တဲ့အန္တရာယ်မြင့်တက်လာဖွယ်ရှိနေကြောင်း ဥရောပအာဏာပိုင်များက သတိပေးထားပါတယ်။ 

ဟားမက်စ်နဲ့ အစ္စရေးနိုင်ငံကြား စစ်ပွဲဖြစ်ပွားခဲ့ပြီးနောက်ပိုင်း အမေရိကန်နိုင်ငံ အပါအဝင် ကမ္ဘာတဝန်ရှိနိုင်ငံများမှာ ဂျူး လူမျိုးဆန့်ကျင်ရေးဆန္ဒပြပွဲတွေ အရှိန်မြင့်တက်လာခဲ့ပြီး၊ ဂျူးလူမျိုးကို ပစ်မှတ်ထားတိုက်ခိုက်ဖို့ ပြင်ဆင်တာမျိုးတွေလည်း ရှိနေခဲ့ကြောင်း သိရပါတယ်။