Pika (NSS) - ဒီဇင်ဘာ ၁၂

တောင်ကိုရီးယားနာမည်ကျော် အမျိုးသားအဆိုတော်အဖွဲ့ BTS ၏ အဖွဲ့ဝင်နှစ်ဦးဖြစ်သော RM နှင့် Vတို့သည် ဒီဇင်ဘာလ(၁၁)ရက်တွင် တောင်ကိုရီးယားစစ်တပ်မှာ စတင် စစ်မှုထမ်းခဲ့ပြီဖြစ်ကြောင်း ဒေသတွင်းမီဒီယာများက ဖော်ပြခဲ့သည်။

ထို့အပြင် BTS ၏ နောက်ထပ်အဖွဲ့ဝင်နှစ်ဦးဖြစ်သော ဂျီမင်း နှင့် ဂျောင်ကွတ်တို့သည် ဒီဇင်ဘာလ(၁၂)ရက်တွင် စတင် စစ်မှုထမ်းနိုင်ဖွယ်ရှိနေကြောင်းလည်း သိရသည်။ တောင်ကိုရီးယားနိုင်ငံရှိ အမျိုးသားများအားလုံးသည် စစ်တပ် တွင် အနည်းဆုံး(၁၈)လခန့် စစ်မှုထမ်းရကြောင်းလည်း သိရသည်။

BTS အဖွဲ့၏ အသက်အကြီးဆုံးအဖွဲ့ဝင် ဂျင်သည် ပြီးခဲ့သည့်နှစ်တွင် စတင်စစ်မှုထမ်းခဲ့ပြီး နောက်ထပ်အဖွဲ့ဝင် နှစ်ဦးဖြစ်သော J-Hope နှင့် Suga တို့သည် ယခုနှစ်အစောပိုင်းတွင် စတင် စစ်မှုထမ်းခဲ့ကြောင်း သိရသည်။

RM နှင့် V တို့သည် Chungcheongပြည်နယ်တောင်ပိုင်းရှိ စစ်တပ်လေ့ကျင့်ရေးစခန်းတွင် ၎င်းတို့၏ သီတင်းပတ် (၅)ပတ်ကြာ အခြေခံလေ့ကျင့်ရေးများကို ဒီဇင်ဘာလ(၁၁)ရက်တွင် စတင်ခဲ့ကြောင်း Yonhap သတင်းအေဂျင်စီက ဖော်ပြခဲ့သည်။

BTS အဖွဲ့ခေါင်းဆောင် RM က "ဒီအချိန်ဟာ သင်ယူစရာတွေနဲ့ အသစ်အဆန်းတွေကို လေ့လာရမယ့် အချိန်ပါပဲ။ လက်ရှိအချိန်မှာတော့ နှုတ်ဆက်ခဲ့ပါတယ်။ ကျွန်တော်တို့အနာဂတ်မှာ ပြန်လည်တွေ့ဆုံကြရအောင်" ဟု ပြောခဲ့သည်။

BTS ၏ နောက်ထပ်အဖွဲ့ဝင်တစ်ဦးဖြစ်သော V သည် ၎င်း၏ စစ်မှုထမ်းပုံစံ ဓါတ်ပုံများကို ဆိုရှယ်မီဒီယာပေါ်သို့ တင်ခဲ့ကြောင်းလည်း သိရသည်။ V က "စစ်တပ်က ခွင့်ပြုထားတဲ့ နေကာမျက်မှန် နဲ့ ဆံပင်ပုံစံအတိုင်းနေရတာ တကယ်ကို ကောင်းပါတယ်။ ဒီပုံစံကို ကျွန်တော်အရင်တည်းက စမ်းကြည့်ချင်ခဲ့တာပါ။ ကျွန်တော် တကယ် စိတ်လှုပ်ရှားနေပါတယ်။ အချို့စစ်မှုထမ်းသူတွေဟာ ကျွန်တော့်ထက် အသက်ငယ်ပေမယ့်လည်း သူတို့နဲ့ စကား ပြောဆိုပြီး အသစ်အဆန်းတွေကို သင်ယူနိုင်မယ်လို့ ထင်ပါတယ်" ဟု ပြောခဲ့သည်။

BTS ၏ နောက်ဆုံးအဖွဲ့ဝင်လေးဦးကို စစ်မှုထမ်းရန် စာရင်းသွင်းမည်ဖြစ်ကြောင်း Bighit Music ကုမ္ပဏီက ပြီးခဲ့သည့်နိုဝင်ဘာလတွင် အတည်ပြုခဲ့သော်လည်း နောက်ထပ်အသေးစိတ်အချက်အလက်များကို ထုတ်ဖော်ပြော ဆိုခဲ့ခြင်းမျိုး မရှိခဲ့ကြောင်း သိရသည်။