ဂျန်ဇက် (NSS) - ဒီဇင်ဘာ ၁၁

မြန်မာနိုင်ငံမြောက်ပိုင်းမှာဖြစ်ပွားနေတဲ့ ပဋိပက္ခတွေနဲ့ပတ်သက်ပြီး ငြိမ်းချမ်းရေးဆွေးနွေးပွဲပြုလုပ်ခဲ့ရာ အပြုသဘောဆောင်တဲ့ရလဒ်ကောင်းတွေရရှိခဲ့ကြောင်း တရုတ်အစိုးရ ကထုတ်ဖော်ပြောဆိုလိုက်ပါတယ်။

မြန်မာနိုင်ငံမြောက်ပိုင်းမှာ ပြီးခဲ့တဲ့ အောက်တိုဘာလနောက်ပိုင်းတည်းက တိုင်းရင်းသားလက်နက်ကိုင်အဖွဲ့တွေနဲ့ တပ်မတော်ကြား တိုက်ပွဲများဖြစ်ပွားခဲ့ရာ ဒေသခံအများအပြား နေရပ်စွန့်ခွာခဲ့ရကြောင်း သိရပါတယ်။ 

တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ မာအိုနင်က "မြန်မာနိုင်ငံမြောက်ပိုင်းမှာဖြစ်ပွားနေတဲ့ ပဋိပက္ခ နဲ့ပတ်သက်ပြီး အဖွဲ့စည်းတွေ ငြိမ်းချမ်းရေးဆွေးနွေးခဲ့တာတွေ့မြင်ရတော့ ပျော်ရွှင်မိပါတယ်။ ဆွေးနွေးမှုမှာ အပြုသဘောဆောင်တဲ့ရလဒ်တွေ ရရှိခဲ့တယ်။ တရုတ်နိုင်ငံဟာ မြန်မာနိုင်ငံမြောက်ပိုင်း ငြိမ်းချမ်းရေး ဆွေးနွေးပွဲနဲ့ပတ်သက်ပြီး ကူညီထောက်ပံ့ပေးမှုတွေ ဆက်လက်လုပ်ကိုင်သွားမယ်။ ဒီငြိမ်းချမ်းရေးဆွေးနွေးပွဲ အဆုံးအထိ စီစဉ်ဆောင်ရွက်ပေးသွားမယ်" လို့ ပြောပါတယ်။

ဒါ့အပြင် ၎င်းက "မြန်မာနိုင်ငံ မြောက်ပိုင်းမှာဖြစ်ပွားနေတဲ့အခြေနေတွေ ဖြေလျော့နိုင်ဖို့ မြန်မာနိုင်ငံရှိ အဖွဲ့အစည်း အားလုံး စိတ်ဝင်စားနေတယ်။ တရုတ်-မြန်မာနယ်စပ်တစ်လျှောက် တည်ငြိမ်ရေးကို ထိန်းသိမ်းနိုင်အောင် လုပ်ဆောင်နိုင်မယ်လို့ ယုံကြည်ထားတယ်" လို့ ပြောပါတယ်။\

ပြီးခဲ့တဲ့ အောက်တိုဘာလနောက်ပိုင်းက ရခိုင်လက်နက်ကိုင်အဖွဲ့၊ တအောင်းလက်နက်ကိုင်အဖွဲ့၊ ကိုးကန့် လက်နက်ကိုင်အဖွဲ့တွေဟာ တပ်မတော်စခန်းတွေကို စတင်တိုက်ခိုက်ခဲ့ပြီးနောက်တိုက်ပွဲတွေ စတင်ဖြစ်ပွားလာခဲ့ ကြောင်း သိရပါတယ်။ မြန်မာနိုင်ငံမြောက်ပိုင်းဒေသဖြစ်တဲ့ ရှမ်းပြည်နယ်မြောက်ပိုင်းမှာ တိုက်ပွဲများ စတင်ဖြစ်ပွား ခဲ့ပြီးနောက် မြန်မာနိုင်ငံအတွင်း တိုက်ပွဲဖြစ်ပွားမှု အရှိန်မြင့်တက်လာခဲ့ပြီး တိုက်ပွဲဖြစ်ပွားမှုတွေဟာ နိုင်ငံ အရှေ့ပိုင်းနဲ့အနောက်ပိုင်းအထိ ပျံ့နှံ့လာခဲ့ရာ လူပေါင်း ၅ သိန်းကျော် နေရပ်စွန့်ခွာခဲ့ရကြောင်း ကုလသမဂ္ဂက သတင်းထုတ်ပြန်ထားပါတယ်။