ဂျန်ဇက် (NSS) - ဒီဇင်ဘာ ၁၂

ကမ္ဘာကျော်သတင်းဌာနတစ်ခုဖြစ်သော ဘလွန်းဘတ်သည် ၂ဝ၂၃ ခုနှစ်အတွက် ကမ္ဘာ့အချမ်းသာဆုံး မိသားစု စာရင်းကို ထုတ်ပြန်ခဲ့ရာ ယူအေအီးနိုင်ငံ သမ္မတဖြစ်သူ ရှိတ်မိုဟမ်မက် ဘင်ဇာရက်ချ် အယ်နက်ယမ်တို့မိသားစုက ကမ္ဘာ့အချမ်းသာဆုံးမိသားစုအဖြစ် ထိပ်ဆုံးတွင်ရပ်တည်နေကြောင်း သိရသည်။

ယူအေအီးသမ္မတဖြစ်သူ နက်ယမ်တို့ မိသားစုပိုင်ဆိုင်သော ကြွယ်ဝချမ်းသာမှုသည် အမေရိကန်ဒေါ်လာ ၃ဝ၅ ဘီလျံကျော်ရှိနေကြောင်း ဘလွန်းဘတ်သတင်းဌာနက ခန့်မှန်းဖော်ပြထားသည်။

နက်ယမ်တို့မိသားစုသည် ကမ္ဘာ့အချမ်းသာဆုံးမိသားစုစာရင်းတွင် ပထမဆုံးအကြိမ် သတ်မှတ်ဖော်ပြခံခြင်းဖြစ်ပြီး ယူအေအီးတွင် ရေနံတွင်းအများအပြား ပိုင်ဆိုင်ထားကြောင်း သိရပါတယ်။ ထို့အပြင် အမေရိကန်အခြေစိုက် ဝေါတန်တို့မိသားစုသည် ကမ္ဘာ့အချမ်းသာဆုံးမိသားစုများစာရင်းတွင် ဒုတိယနေရာတွင် ရှိနေခဲ့နေပြီး အမေရိကန် ဒေါ်လာ ၂၅၇ ဒသမ ၉ ဘီလျံကြွယ်ဝချမ်းသာကြောင်း ဘလွန်းဘတ် သတင်းဌာနတွင် ဖော်ပြထားသည်။

ထို့အပြင် ကမ္ဘာ့အချမ်းသာဆုံးမိသားစုစာရင်းတွင် ဇိမ်ခံပစ္စည်းများ၊ နာမည်ကျော် ဖက်ရှင်အမှတ်တံဆိပ်များကို ပိုင်ဆိုင်ထားသော ဖရန်စ့် ဟာမက်စ်တို့ မိသားစုက တတိယနေရာတွင်ရှိနေခဲ့ပြီး ၎င်းတို့မိသားစုက အမေရိကန် ဒေါ်လာ ၁၅ဝ ဒသမ ၉ ဘီလျံကြွယ်ဝချမ်းသာကြောင်း သိရသည်။

ကမ္ဘာ့အချမ်းသာဆုံးမိသားစု ၁ဝ ဦးထဲတွင် အမေရိကန်စီးပွားရေးလုပ်ငန်းရှင်ဖြစ်သော မက်စ်မိသားစု၊ ကာတာ တော်ဝင်မိသားစုဝင်ဖြစ်သော အယ်တာနီ အမေရိကန် ရေနံ နှင့် ဓါတုလုပ်ငန်းဖြစ်သော ကော့ချ် စက်မှုလုပ်ငန်းပိုင်ရှင် ကော့ချ်တို့ ပါဝင်ခဲ့ကြောင်း သိရသည်။

ကမ္ဘာ့အချမ်းသာဆုံးမိသားစု  ၂၅ ဦး၏ ကြွယ်ဝချမ်းသာမှု စုစုပေါင်းကို တွက်ချက်ရာတွင် အမေရိကန်ဒေါ်လာ ၁ ဒသမ ၅ ထရီလီယံ ပမာဏရှိခဲ့ပြီး၊ ပြီးခဲ့သောနှစ်က ကမ္ဘာ့အချမ်းသာဆုံးမိသားစု  ၂၅ ဦး၏ ကြွယ်ဝချမ်းသာမှု စုစုပေါင်းနှင့်နှိုင်းယှဉ်လျှင် ၄၃ ရာခိုင်နှုန်းမြင့်တက်လာခဲ့ကြောင်း သိရသည်။

၂ဝ၂၃ ခုနှစ်အတွင်း ကမ္ဘာ့အချမ်းသာဆုံးမိသားစုဝင် ၁ဝ ဦးစာရင်းထဲတွင် ပင်လယ်ကွေ့ဒေသအတွင်း နိုင်ငံများမှ မိသားစုဝင်သုံးဦး ပါဝင်ခဲ့ကြောင်း ဘလွန်းဘတ်သတင်းဌာနက ဖော်ပြထားသည်။ ကမ္ဘာ့အချမ်းသာဆုံး မိသားစုဝင် ၁ဝ ဦးထဲတွင် အိန္ဒိယရေနံလုပ်ငန်းဖြစ်သော Reliance Industries  ၏ ပိုင်ရှင်ဖြစ်သူ အမ်ဘာနီမိသားစု၊ ပြင်သစ် ဖက်ရှင်ကုမ္ပဏီဖြစ်သော Chanel ကုမ္ပဏီကို ပိုင်ဆိုင်သူ  Wertheimers နှင့် ကမ္ဘာကျော်သတင်းဌာနတစ်ခုဖြစ် သော ရိုက်တာသတင်းဌာန၏ ရှယ်ယာအများစုကို ထိန်းချုပ်ထားသော သွန်ဆန်မိသားစုတို့ ပါဝင်ခဲ့ကြောင်း သိရသည်။