Pika (NSS) - ဒီဇင်ဘာ ၁ဝ 

ရုရှားအစိုးရသည် ယူကရိန်းနိုင်ငံကို ရုရှားနှင့်အခြားနိုင်ငံများအား ခြိမ်းခြောက်နေသည့် နာဇီနိုင်ငံအဖြစ် ဆက်လက်ရပ်တည်ခွင့်ပြုမည်မဟုတ်ကြောင်း ရုရှားနိုင်ငံခြားရေးဝန်ကြီးဌာနပြောရေးဆိုခွင့်ရှိသူ မာရီယာဇာခါရိုဗာက ပြောကြားခဲ့သည်။

ယူကရိန်းအပေါ် ကျူးကျော်တိုက်ခိုက်မှုများ စတင်လုပ်ဆောင်ခဲ့သည့် ၂ဝ၂၂ ခုနှစ် ဖေဖော်ဝါရီလတွင် ရုရှားသမ္မတ ပူတင်ကြေညာထားသည့် နာဇီဝါဒဆန့်ကျင်ရေးနှင့် ယူကရိန်း၏ စစ်ရေးဆောင်ရွက်ချက်လုပ်ငန်းများ လျှော့ချရန် ရည်မှန်းချက်မှာ ပြောင်းလဲသွားမည်မဟုတ်ကြောင်း မာရီယာဇာခါရိုဗာက အတည်ပြုခဲ့သည်။

ထို့အပြင် ယူကရိန်းအကျပ်အတည်းနှင့်ပတ်သက်သည့်ဖြစ်ရပ်များက ရုရှားနိုင်ငံအနေဖြင့် ၎င်း၏ အထူးစစ်ဆင်ရေး များကို စတင်ရန်လိုအပ်သည်ဆိုသည့် ယုံကြည်ချက်များကို ပိုမိုသိသာထင်ရှားလာစေခဲ့ကြောင်း မာရီယာဇာခါရိုဗာ က ပြောကြားခဲ့သည်။

၎င်း က "စစ်ပွဲစတင်ဖြစ်ပွားတဲ့အချိန်ကတည်းက ယူကရိန်း (သို့မဟုတ်) နာဇီလက်သစ်တွေဟာ အရပ်သားတွေကို လူသားဒိုင်းကာအဖြစ် အသုံးပြုခဲ့ပြီး ရုရှားစစ်သုံ့ပန်းတွေကို ရက်စက်စွာ ဆက်ဆံခဲ့ပါတယ်။ ဒီပဋိပက္ခမှာ သူတို့ရဲ့အဓိကရည်မှန်းချက်က ရုရှားနိုင်ငံသားတွေကို တတ်နိုင်သမျှသတ်ပစ်ဖို့ပါပဲ" ဟု ပြောခဲ့သည်။

ရုရှား-ယူကရိန်းပဋိပက္ခကို ထိရောက်စွာဖြေရှင်းနိုင်မည့် နည်းလမ်းများနှင့်ပတ်သက်သည့် မေးခွန်းများကို မာရီယာဇာခါရိုဗာက ပြန်လည်တုံ့ပြန်ဖြေဆိုခဲ့ကြောင်းလည်း သိရသည်။ ၎င်းက "ငြိမ်းချမ်းရေးကို ရရှိဖို့ တစ်ခုတည်းသောနည်းလမ်းက ရုရှားရဲ့တောင်းဆိုမှုတွေအားလုံးကို ဖြည့်ဆည်းပေးတာပါပဲ။ ဘက်မလိုက်ဖို့၊ ယူကရိန်းက နျူကလီးယားကင်းစင်တဲ့နိုင်ငံဖြစ်ဖို့၊ နာဇီဝါဒဖယ်ရှားဖို့၊ ယူကရိန်းရဲ့ စစ်ရေးဆောင်ရွက်ချက်တွေ လျှော့ချဖို့၊ နယ်မြေဒေသအသစ်တွေကို အသိအမှတ်ပြုဖို့၊ ရုရှားစကားပြောတဲ့နိုင်ငံသားတွေနဲ့ ယူကရိန်းနိုင်ငံ အတွင်းနေထိုင်တဲ့တိုင်းရင်းသားလူနည်းစုတွေအတွက် အခွင့်အရေးတွေကို အာမခံပေးရပါမယ်" ဟု ပြောဆိုခဲ့သည်။

ထို့အပြင် ယူကရိန်းပဋိပက္ခကို သံတမန်နည်းလမ်းဖြင့် ဖြေရှင်းရန် ရုရှားဖက်က အဆင်သင့်ရှိကြောင်း နှင့် ငြိမ်းချမ်းရေးဆွေးနွေးပွဲများ လုပ်ဆောင်ရန်အတွက် ဘယ်တော့မှ ငြင်းဆိုခဲ့ခြင်းမျိုးမရှိခဲ့ကြောင်း မာရီယာဇာခါရိုဗာ က အတည်ပြုပြောကြားခဲ့သည်။

၎င်းက "ငြိမ်းချမ်းရေးဆွေးနွေးပွဲတွေ လုပ်ဆောင်ဖို့ဆိုရင် ယူကရိန်းအစိုးရနဲ့ အနောက်အုပ်စုကျောထောက် နောက်ခံနိုင်ငံတွေဟာ လက်တွေ့ကျတဲ့ ခြေလှမ်းတွေ၊ ကောင်းမွန်တဲ့ဆန္ဒတွေကို ပြသရပါမယ်။ ဒါပေမယ့်လည်း လက်ရှိအချိန်အထိ သူတို့ဖက်က အဲဒီလိုမျိုးတွေ ပြသတာမျိုးမရှိသေးပါဘူး။ အနောက်အုပ်စုနိုင်ငံတွေဟာ ယူကရိန်းကို လက်နက်ထောက်ပံ့ပေးနေတာတွေ ရပ်တန့်ရမှာဖြစ်သလို ယူကရိန်းဟာ တိုက်ခိုက်မှုတွေကို ရပ်ပြီး ရုရှားပိုင်နက်နယ်မြေထဲက တပ်ဖွဲ့ဝင်တွေကို ပြန်လည်ရုတ်သိမ်းရပါမယ်" ဟု ပြောဆိုခဲ့သည်။