Pika(NSS) - ဒီဇင်ဘာ ၁ဝ 

မန်ယူအသင်းကစားသမားများသည် အသင်းအဖွဲ့တစ်ခုအနေဖြင့် ကောင်းမွန်စွာလက်တွဲလုပ်ဆောင်နိုင်ခြင်းမျိုး မရှိသေးကြောင်း မန်ယူနည်းပြတန်ဟက်က ပြစ်တင်ဝေဖန်ပြောဆိုခဲ့သည်။

မန်ယူအသင်းသည် ဘုန်းမောက်အသင်းနှင့်ကစားခဲ့သော ပရီးမီးယားလိဂ် အိမ်ကွင်းပွဲစဉ်တွင် (၃)ဂိုးပြတ်ဖြင့် ရှုံးနိမ့်ခဲ့ပြီးနောက် မန်ယူနည်းပြတန်ဟက်က ယခုကဲ့သို့ ပြစ်တင်ဝေဖန်ပြောဆိုခဲ့ခြင်းဖြစ်သည်။

မန်ယူအသင်းသည် ဒီဇင်ဘာလ(၇)ရက်က ချဲလ်ဆီးအသင်းနှင့်ကစားခဲ့သော ပရီးမီးယားလိဂ်အိမ်ကွင်းပွဲစဉ်တွင် (၂)ဂိုး-(၁)ဂိုးဖြင့် အနိုင်ရရှိခဲ့သော်လည်း ဘုန်းမောက်အသင်းနှင့် ကစားခဲ့သည့်ပွဲတွင် ခြေစွမ်းပြကစားနိုင်ခဲ့ခြင်းမျိုး မရှိဘဲ (၃)ဂိုးပြတ်ဖြင့် ရှုံးနိမ့်ခဲ့ခြင်းဖြစ်သည်။

ထို့အပြင် မန်ယူအသင်းသည် နိုင်ပွဲများ ဆက်တိုက်ရရှိအောင် ယှဉ်ပြိုင်ရန်အတွက် လုံလုံလောက်လောက် ကောင်းမွန်မှု ရှိ/မရှိဆိုသည့်မေးခွန်းကို နည်းပြတန်ဟက်က ပြန်လည်တုံ့ပြန်ဖြေဆိုခဲ့ကြောင်းလည်း သိရသည်။ 

တန်ဟက် က "ကျွန်တော်တို့ဟာ အသင်းအဖွဲ့တစ်ခုအနေနဲ့ ကောင်းမွန်စွာ လက်တွဲလုပ်ဆောင်နိုင်တာမျိုး မရှိသေး ဘူးလို့ ကျွန်တော်ထင်ပါတယ်။ ကျွန်တော်တို့ ပိုမိုကောင်းမွန်တိုးတက်ဖို့အတွက် အသင်းအဖွဲ့တစ်ခုအနေနဲ့ အကောင်းဆုံးကြိုးစားရပါမယ်။ အဖွဲ့တစ်ဖွဲ့အနေနဲ့ ကျွန်တော်တို့ ပိုမိုတိုးတက်အောင်၊ ပိုပြီးခံနိုင်ရည်ရှိအောင်၊ အမြဲတမ်း အဆင်သင့်ဖြစ်နေအောင် လုပ်ရပါမယ်။ အကောင်းဆုံးခြေစွမ်း၊ ကစားနိုင်စွမ်းတွေနဲ့ မကစားဘူးဆိုရင် ဒီလိဂ်မှာ ကစားဖို့မဖြစ်နိုင်ဘူးလို့ ကျွန်တော်အရင်ကတည်းက ပြောခဲ့ပါတယ်" ဟု ပြောခဲ့သည်။

မန်ယူအသင်းသည် လက်ရှိအချိန်အထိ ပရီးမီးယားလိဂ်ပြိုင်ပွဲ(၁၆)ပွဲ ကစားထားပြီး (၉)ပွဲနိုင် (၇)ပွဲရှုံးကာ ရမှတ် (၂၇)မှတ်ဖြင့် အမှတ်ပေးဇယားတွင် အဆင့်(၆)နေရာမှာ ရပ်တည်နေကြောင်း သိရသည်။