ဂျန်ဇက် (NSS) - ဒီဇင်ဘာ ၉

ဂါဇာဒေသရှိ ဟားမက်စ်အုပ်စုပိုင် လိုဏ်ခေါင်းဆောင်တွေကို ပင်လယ်ရေတွေ အသုံးပြုကာဖျက်ဆီးမယ့် အစ္စရေးရဲ့အစီအစဉ်တွေဟာ စစ်ရာဇဝတ်မှုကျူးလွန်မှုဖြစ်လာဖွယ်ရှိနေတယ်လို့ ရုရှား သံအမတ်ကြီးက ပြောပါတယ်။ 

ကုလသမဂ္ဂဆိုင်ရာ ရုရှားသံအမတ်ကြီး Dmitry Polyansky ဟာ ဒီဇင်ဘာ လ ၈ ရက်ကကျင်းပခဲတဲ့ ကုလသမဂ္ဂလုံခြုံရေးကောင်စီအစည်းအဝေးအတွင်း အခုလိုမျိုးပြောခဲ့တာဖြစ်ကြောင်း သိရပါတယ်။ ရုရှားသံအမတ်ကြီးက "ဂါဇာကမ်းမြောင်ဒေသရှိ ဟားမက်စ် လက်နက်ကိုင်အုပ်စုရဲ့မြေအောက်ဥမင်လိုဏ်ခေါင်းတွေကို အစ္စရေးက ပင်လယ်ရေတွေအသုံးပြုပြီး ဖျက်ဆီးမယ်လို့ သတင်းတွေကြားနေရတယ်။ အဲဒီသတင်းတွေဟာ အမှန်တကယ် ဆိုရင် မဖြစ်သင့်ဘူး"လို့ ပြောပါတယ်။

အစ္စရေးအစိုးရဟာ ဂါဇာကမ်းမြောင်ဒေသရှိ ဟားမက်စ်လက်နက်ကိုင်အုပ်စုတွေရဲ့မြေအောက်ဥမင်လိုဏ်ခေါင်းကို ပင်လယ်ရေတွေ စုပ်ထုတ်ပြီးဖျက် ဆီးဖို့ အမေရိကန်အစိုးရနဲ့ ပြင်ဆင်နေကြောင်းသိရပါတယ်။ ရုရှားအစိုးရက ပင်လယ်ရေဟာ ဂါဇာဒေသရှိမြေအောက်ရေကို ပျက်စီးစေပြီး လူနေထိုင်ဖို့ မသင့်တော်ကြောင်း ပြောပါတယ်။ အစ္စရေး အာဏာပိုင်များဟာ ဂါဇာဒေသမှာနေထိုင်နေတဲ့ ပါလက်စတိုင်းပြည်သူတွေကို အီဂျစ်နိုင်ငံဘက်ခြမ်းကိုပြောင်းရွှေ့ဖို့လိုလားနေကြောင်းသိရပါတယ်။ အစ္စရေးစစ်တပ်ဟာ ဂါဇာဒေသကို မြေပြင်ထိုးစစ်ဆင်နွဲခဲ့ပြီးနောက် ဟားမက်စ်လက်နက်ကိုင်အဖွဲ့တွေ ပိုင်ဆိုင်ထားတဲ့မြေအောက်ဥမင်လိုဏ်ခေါင်းအရေအတွက် ၈၀၀ ကျော် ရှာဖွေတွေ့ရှိထားကြောင်းသိရပါတယ်။

အစ္စရေးဟာ အဆိုပါတွေ့ရှိထားတဲ့ မြေအောက်ဥမင်လိုဏ်ခေါင်းတွေကိုဖျက်ဆီးဖို့ ပင်လယ်ရေကိုအသုံးပြုဖို့ ရေစုပ်စက်တွေ ပြင်ဆင်နေကြောင်း အစောပိုင်းကတည်းက သတင်းတွေထွက်ပေါ်ခဲ့ပါတယ်။ အစ္စရေး နဲ့ ဟားမက်စ်လက်နက်ကိုင်အဖွဲ့ကြားဖြစ်ပွားနေတဲ့ ဂါဇာစစ်ပွဲဟာ အောက်တိုဘာလ ၇ ရက်မှာစတင်ခဲ့ပြီး ပါလက်စတိုင်းလူမျိုးအနည်းဆုံး ၁၆၀၀၀ ကျော်သေဆုံးထားကြောင်းသိရပါတယ်။