စော (NSS) - ဒီဇင်ဘာ ၇

ရက်ကန်း နှင့် အသက်မွေးပညာသင်တန်းကျောင်း(တောင်ကြီး)မှ သင် တန်းသားများခေါ်ယူလျက်ရှိပြီး အခြေခံမူလတန်းအောင်မြင်သူများ လျှောက်ထားနိုင်ကြောင်း သိရသည်။

သမဝါယမ နှင့် ကျေးလက်ဖွံ့ဖြိုးရေးဝန်ကြီးဌာန၊ အသေးစားစက်မှုလက်မှုလုပ်ငန်းဦးစီးဌာန၊ ရက်ကန်း နှင့် အသက်မွေးပညာသင်တန်းကျောင်း (တောင်ကြီး) က ယနေ့(ဒီဇင်ဘာလ ၇ ရက်)ထုတ် နိုင်ငံပိုင်သတင်းစာများတွင် အသိပေးကြေညာထားခြင်းဖြစ်သည်။

အဆိုပါသင်တန်းကျောင်းမှ ချည်မျှင် နှင့် အထည်အလိပ်ကျွမ်းကျင် (၁)နှစ်သင်တန်းအတွက် သင်တန်းသား(၂၀)ဦးကို လက်ခံသင်ကြားပေးသွားမည်ဖြစ်ပြီး အခြေခံပညာအလယ်တန်းအဆင့် အောင်မြင်ပြီးသူဖြစ်ရမည်ဖြစ် ကြောင်း သိရသည်။

ထို့ပြင် လက်ရက်ကန်း (၆)လသင်တန်းအတွက် အခြေခံပညာမူလတန်းအဆင့် အောင်မြင်ပြီးသူ သင်တန်းသား (၁၀)ဦးကို  လက်ခံသင်ကြားပေးသွားမည်ဖြစ်ကြောင်း သိရသည်။

လျှောက်ထားသူများသည် အသက် (၁၆)နှစ်မှ (၂၅)နှစ်အတွင်း အိမ်ထောင်မရှိသူဖြစ်ရန်လိုအပ်ပြီး သင်တန်းဝင်ခွင့်အတွက် ပညာအရည်အချင်းထောက်ခံချက်နှင့် ရပ်ကွက်/အုပ်ချုပ်ရေးမှူး၏ ထောက်ခံချက်ပါရမည်ဖြစ်ကြောင်း သိရသည်။

လျှောက်ထားလိုသူများအနေဖြင့် တောင်ကြီးမြို့၊ အရှေ့မြို့ပတ်လမ်း၊ ရေအေးကွင်းရပ်ကွက်ရှိ ရက်ကန်းနှင့် အသက်မွေးပညာ သင်တန်းကျောင်း (တောင်ကြီး)တွင် ဒီဇင်ဘာလ ၂၉ ရက် နောက်ဆုံးထား၍ လျှောက်ထားနိုင်ကြောင်း သိရသည်။

သင်တန်းတက်ရောက်ခွင့်ရရှိသူများအား  သင်တန်းကျောင်းရှိ အဆောင်တွင် အခမဲ့ နေထိုင်ခွင့်ပေးမည်ဖြစ်ကာ တစ်လလျှင် ငွေကျပ်(၃၀၀၀၀) ကိုလည်း ပညာသင်ထောက်ပံ့ကြေးအဖြစ် ပေးအပ်သွားမည်ဖြစ်ကြောင်း သိရသည်။