ဂျန်ဇက် (NSS) - ဒီဇင်ဘာ ၇ 

မြန်မာနိုင်ငံမှာ အမျိုးသားပြန်လည်သင့်မြတ်ရေး လျင်မြန်စွာရရှိပြီး နိုင်ငံရေးပြုပြင်ပြောင်းလဲမှုများကို ဆက်လက် လုပ်ကိုင်နိုင်မယ်လို့ မျှော်လင့်ထားတယ်လို့ တရုတ်နိုင်ငံခြားရေးဝန်ကြီးက ထုတ်ဖော်ပြောဆိုလိုက်ပါတယ်။ တရုတ် နိုင်ငံခြားရေးဝန်ကြီးဝမ်ယိဟာ တရုတ်နိုင်ငံကိုရောက်ရှိနေတဲ့ မြန်မာနိုင်ငံခြားရေးဝန်ကြီး ဦးသန်းဆွေနဲ့ တွေ့ဆုံဆွေးနွေးချိန်အတွင်း အခုလိုမျိုးပြောခဲ့တာဖြစ်ပါတယ်။

တရုတ်နိုင်ငံခြားရေးဝန်ကြီးဝမ်ယိက "မြန်မာနိုင်ငံမှာ အမျိုးသားပြန်လည်သင့်မြတ်ရေးရရှိဖို့ နဲ့ ဖွဲ့စည်းပုံ အခြေခံဥပဒေ မူဘောင်အတိုင်း မြန်မာနိုင်ငံမှာ နိုင်ငံရေး ပြုပြင်ပြောင်းလဲမှုတွေ ဆက်လက်လုပ်ကိုင်နိုင်မယ်လို့ မျှော်လင့်ထားတယ်။ နှစ်နိုင်ငံစလုံးဟာ ကင်ဆာရောဂါလိုမျိုးအမြစ်တွယ်နေတဲ့ အွန်လိုင်းက တဆင့်လိမ်လည်နေ တဲ့ဂိုဏ်းတွေနဲ့ လောင်ကစားဂိုဏ်းတွေကို ဖြိုခွင်းနိုင်အောင် လုံခြုံရေးပူးပေါင်းဆောင်ရွက်မှုတွေ ဥပဒေပိုင်း ပူးပေါင်းဆောင်ရွက်မှုတွေ ပိုမိုကေင်းမွန်အောင်လုပ်ဆောင်သင့်တယ်" လို့ ပြောပါတယ်။

ပြီးခဲ့တဲ့ အောက်တိုဘာလက တရုတ်နိုင်ငံနဲ့ နယ်စပ်ချင်းထိစပ်နေတဲ့ ရှမ်းပြည်နယ်မြောက်ပိုင်းမှာ တိုက်ပွဲတွေ ဖြစ်လာခဲ့ပြီးနောက်မကြာမီ တရုတ်အစိုးရတာဝန်ရှိသူတွေနဲ့ မြန်မာအစိုးရတာဝန်ရှိသူများ တွေ့ဆုံဆွေးနွေးခဲ့ကြောင်း သိရပါတယ်။ 

တရုတ်နိုင်ငံခြားရေးဝန်ကြီးဝမ်ယိ နဲ့ မြန်မာနိုင်ငံခြားရေးဝန်ကြီးတို့ဟာ အွန်လိုင်းကတဆင့် လိမ်လည်မှုကျူးလွန် နေတဲ့ဂိုဏ်းများ တိုက်ဖျက်ရေးကို ပိုမိုကောင်းမွန်အောင်ပူးပေါင်းဆောင်ရွက်ဖို့ကိစ္စတွေကိုလည်း ဆွေးနွေးခဲ့ ကြောင်း သိရပါတယ်။ 

မြန်မာနိုင်ငံဟာ အွန်လိုင်းမှတဆင့် လိမ်လည်မှုကျူးလွန်နေသည့် ဂိုဏ်းများတွင် ပါဝင်နေသည့် တရုတ်နိုင်ငံသား ၃၁ဝဝဝ ကျော်ကို မိခင်နိုင်ငံသို့ ပြန်လည်လွှဲပြောင်းပေးနိုင်ခဲ့တယ်လို့ ဆိုပါတယ်။ တရုတ်မီဒီယာများက   မြန်မာ နိုင်ငံမှာ အွန်လိုင်းကတဆင့် လိမ်လည်မှုကျူးလွန်နေတဲ့ စင်တာပေါင်း ၁ဝဝဝ ဟာ တစ်ရက်ကို လူပေါင်း ၁ သိန်း ကျော်ခန့် လိမ်လည်လျက်ရှိနေကြောင်း ဖော်ပြထားပါတယ်။