ဂျန်ဇက် (NSS) - ဒီဇင်ဘာ ၃ 

အမေရိကန်လေယာဉ်တင်သင်္ဘောအုပ်စုဟာ အီရန်နိုင်ငံထုတ် ဒရုန်းတစ်စီးကို ဒီဇင်ဘာ ၂ ရက်က ကြားဖြတ် ပစ်ချနိုင်ခဲ့ကြောင်း အမေရိကန်စစ်ဘက်က သတင်းထုတ်ပြန်လိုက်ပါတယ်။

အီရန်နိုင်ငံထုတ်ဒရုန်းဟာ ပါရှင်ပင်လယ်ကွေ့နားမှာ ဖြန့်ကြတ်ချထားတဲ့  USS Dwight နဲ့ D. Eisenhower အမည် ရှိ အမေရိကန်လေယာဉ်တင်သင်္ဘောအုပ်စုနားကို ပျံသန်းလာခဲ့ခြင်းဖြစ်ကြောင်း သိရပါတယ်။ ဒရုန်းဟာ အမေရိကန်လေယာဉ်တင်သင်္ဘောအုပ်စုနားကို ပျံသန်းလာချိန်အတွင်း ပရော်ဖက်ရှင်နယ် မပီသတဲ့အပြုအမူတွေ ကြောင့် ပစ်ချခဲ့တာဖြစ်ကြောင်း အမေရိကန်စစ်ဘက်က သတင်းထုတ်ပြန်ထားပါတယ်။ 

အရှေ့အလယ်ပိုင်းဒေသ ရေကြောင်းလုံခြုံရေးနဲ့ တည်ငြိမ်ရေးတို့ကို ကူညီထောက်ပံ့ပေးနိုင်ဖို့ ရည်ရွယ်ချက်နဲ့ အမေရိကန်ဟာ လေယာဉ်တင်သင်္ဘောနှစ်စီးကို မြေထဲပင်လယ်ထဲကို စေလွှတ်ထားကြောင်း သိရပါတယ်။

လေယာဉ်တင်သင်္ဘောအုပ်စုများ မြေထဲပင်လယ်နားကို ရောက်ရှိလာခဲ့ပြီးနောက် အရှေ့အလယ်ပိုင်းဒေ သအတွင်းရှိ လက်နက်ကိုင်အဖွဲ့တွေဟာ အမေရိကန်တပ်ဖွဲ့တွေကို ခြိမ်းခြောက်တိုက်ခိုက်မှုတွေ လုပ်ဆောင်ခဲ့ရာ နိုဝင်ဘာ ၂၉ ရက်က ယီမင်နိုင်ငံ ဟူသီလက်နက်ကိုင်အုပ်စုက ပစ်ခတ်လိုက်တဲ့ ဒရုန်းတစ်စီးကို ပင်လယ်နီဒေသမှာ ပစ်ချခဲ့ရကြောင်း သိရပါတယ်။ 

အစ္စရေးနဲ့ ဟားမက်စ်လက်နက်ကိုင်အဖွဲ့ကြား စစ်ပွဲဖြစ်ပွားခဲ့ပြီးနောက် အမေရိကန်ဟာ စစ်ပွဲထဲကို တတိယအဖွဲ့အစည်းနိုင်ငံ ပါဝင်လာမှာကို စိုးရိမ်တဲ့အတွက် အရှေ့အလယ်ပိုင်းဒေသကို လေယာဉ်တင်သင်္ဘောအုပ်စုတွေ စေလွှတ်ခဲ့ကြောင်း သိရပါတယ်။ 

ဟူသီလက်နက်ကိုင်အဖွဲ့ဟာ အစ္စရေးနိုင်ငံသားပိုင်ဆိုင်တဲ့ သင်္ဘောတွေကို တိုက်ခိုက်၊ ဖမ်းဆီးမယ်လို့ သတင်းထုတ်ပြန်ခဲ့ပြီးနောက် အစ္စရေးနိုင်ငံသားသင်္ဘောကို ဖမ်းဆီးဖို့ကြိုးပမ်းခဲ့ရာ အမေရိကန်ရေတပ်တပ်ဖွဲ့က ကယ်တင်ပေးခဲ့ရကြောင်း သိရပါတယ်။