Pika (NSS) - နိုဝင်ဘာ ၃ဝ

အစ္စရေးတပ်ဖွဲ့များသည် နိုဝင်ဘာလ(၂၉)ရက်က အနောက်ဘက်ကမ်းခြေ Jenin မြို့တွင် ကလေးငယ်နှစ်ဦး အပါအဝင် ပါလက်စတိုင်းလူမျိုးလေးဦးကို သတ်ပစ်ခဲ့ကြောင်း ပါလက်စတိုင်းတရားဝင်သတင်းအေဂျင်စီ WAFA က ဖော်ပြခဲ့သည်။

ပါလက်စတိုင်းကျန်းမာရေးဝန်ကြီးဌာနက "အသက်(၈)နှစ်အရွယ် Adam Samer Al-Ghoul နဲ့ အသက် (၁၅)နှစ်အရွယ် Basil Suleiman Abu Al-Wafa တို့နှစ်ဦးဟာ Jenin မြို့မှာ အစ္စရေးတပ်ဖွဲ့ဝင်တွေရဲ့ သတ်ပစ်ခြင်း ကို ခံခဲ့ရပါတယ်" ဟု ထုတ်ပြန်ပြောကြားခဲ့သည်။

ထို့နောက် နာရီပိုင်းအကြာတွင် Jenin မြို့ရှိ စခန်းတစ်ခုတွင် နောက်ထပ်ပါလက်စတိုင်းလူမျိုးနှစ်ဦးဖြစ်သည့် Muhammad Jamal Zubaidi နှင့် Wissam Ziad Hanoun တို့ကို အစ္စရေးတပ်ဖွဲ့များက သတ်ဖြတ်ခဲ့ကြောင်း WAFA သတင်းအေဂျင်စီက ထပ်မံဖော်ပြခဲ့သည်။ ထို့အပြင် အစ္စရေးတပ်ဖွဲ့များသည် အဆိုပါ ပါလက်စတိုင်းလူမျိုး လေးဦးစလုံး၏ ရုပ်အလောင်းများကို ယူဆောင်သွားခဲ့ကြောင်း WAFA က ထပ်မံဖော်ပြခဲ့သည်။

Muhammad Jamal Zubaidi နှင့် Wissam Ziad Hanoun တို့သည်  IDF၊ ISA နှင့် အစ္စရေးနယ်ခြားစောင့် ရဲတပ်ဖွဲ့တို့၏ Jenin မြို့ရှိ စခန်းတစ်ခုတွင် ပြုလုပ်သော အကြမ်းဖက်မှု တုံ့ပြန်ရေးလှုပ်ရှားမှုအတွင်း သေဆုံးခဲ့ခြင်း ဖြစ်ကြောင်း အစ္စရေးစစ်တပ်က ထုတ်ပြန်ပြောကြားခဲ့သည်။ Muhammad Jamal Zubaidi သည် အစ္စလာမ်မစ်ဂျီဟတ် စစ်ဆင်ရေးအကြီးတန်းအရာရှိတစ်ဦးဖြစ်သလို Jenin မြို့စခန်းရှိ အဓိကအကြမ်းဖက် သမားများထဲမှ တစ်ဦးဖြစ်ကြောင်း အစ္စရေးစစ်တပ်က ပြောကြားခဲ့သည်။

၎င်းသည် အကြမ်းဖက်လှုပ်ရှားမှုများတွင်ပါဝင်ခဲ့ပြီး ပစ်ခတ်တိုက်ခိုက်မှုများလုပ်ဆောင်ကာ နောက်ထပ် အကြမ်းဖက်မှုများကို လှုံ့ဆော်ပေးခဲ့သူဖြစ်ကြောင်း အစ္စရေးစစ်တပ်က ထုတ်ပြန်ပြောခဲ့သည်။