Pearl (NSS) - နိုဝင်ဘာ ၃၀

ကရင်ပြည်နယ်၊ ကော့ကရိတ်မြို့နယ်ရှိ အံဖလေးကျေးရွာ ဘုန်းတော်ကြီးကျောင်းဝင်း အတွင်းသို့ လက်နက်ကြီးကျည်များ ကျရောက်ပေါက်ကွဲခဲ့ပြီး ဘုန်းကြီး ၂ ပါး ထိခိုက် ဒဏ်ရာရရှိခဲ့ကာ သာသနိကအဆောက်အဦးအချို့ ပျက်စီးခဲ့ကြောင်း သိရသည်။

အဆိုပါ ဖြစ်စဉ်သည် ပြီးခဲ့သည့် နိုဝင်ဘာလ ၂၇ ရက်၊ ညနေ ၅ နာရီခန့်တွင်ဖြစ်ပွားခဲ့ကြောင်း သိရသည်။ 

ယင်းဖြစ်စဉ်နှင့်ပတ်သက်ပြီး ကော့ကရိတ်မြို့နယ်၊ အံဖလေးရွာ၌ တပ်မတော်မှ လက်နက်ကြီးဖြင့်ပစ်ခတ်မှုကြောင့် ကျေးရွာဘုန်းတော်ကြီးကျောင်းဝင်းအတွင်းသို့ လက်နက်ကြီးကျည် ၄ လုံး ကျရောက်ပေါက်ကွဲခဲ့ပြီး ဘုန်းကြီးကျောင်းဆောင်နှင့် ရေချမ်းစင်တို့ ထိမှန်ပျက်စီးကာ ဘုန်းကြီး ၂ ပါးလက်နက်ကြီးကျည်စ ထိမှန်ဒဏ်ရာရရှိခဲ့ကြောင်း လူမှုကွန်ရက်စာမျက်နှာများတွင် ရေးသားမှုများ ရှိသည်။

၎င်းဖြစ်စဉ်နှင့်ပတ်သက်၍ ကော့ကရိတ်မြို့နယ်ရှိ အံဖလေးရွာနှင့် ပတ်ဝန်းကျင်အနီးတစ်ဝိုက်အား တပ်မတော်မှ လက်နက်ကြီးပစ်ခတ်မှု လုံးဝ(လုံးဝ) ပြုလုပ်ခြင်း မရှိကြောင်း တပ်တွင်းသတင်းများအရ သိရှိရကြောင်း နစကဘက်က ယနေ့ (နိုဝင်ဘာလ ၃ဝ ရက်)တွင် တုံ့ပြန်ထားသည်။

အကြမ်းဖက်သမားများသည် စစ်ရေးပစ်မှတ်မဟုတ်သော မြို့၊ ရွာများ၊ ပညာရေးကျောင်းများ၊ သာသနိက အဆောက်အဦးများအား လက်နက်ကြီးများဖြင့် ရည်ရွယ်ချက်ရှိရှိ ပစ်ခတ်နေခြင်းဖြစ်သည်ဟုလည်း နစကဘက်က တုံ့ပြန်ထားသည်။

ထိုသို့ပစ်ခတ်မှုကြောင့် အံဖလေးကျေးရွာ ဘုန်းတော်ကြီးကျောင်းဝင်း အတွင်းသို့ လက်နက်ကြီးကျည်များ ကျရောက်ပေါက်ကွဲခဲ့ပြီး ဘုန်းကြီး ၂ ပါး ထိခိုက် ဒဏ်ရာရရှိခဲ့ကာ သာသနိကအဆောက်အဦးအချို့ ပျက်စီးခဲ့ခြင်းသာဖြစ်ကြောင်း နစကဘက်က ဆိုသည်။ 

အလားတူ စစ်ကိုင်းတိုင်း ၊  တန့်ဆည်မြို့နယ်၊ ရွာရှည်(မ)ကျေးရွာရှိ စာသင်ကျောင်း နှင့်ဆေးရုံကို ယမန်နေ့ (နိုဝင်ဘာလ ၂၉ ရက်) တွင် တပ်မတော်က လေယာဉ်ဖြင့် ဗုံး ၂ လုံး ကျဲချတိုက်ခိုက်သွားကြောင်း လူမှုကွန်ရက်စာမျက်နှာများတွင် ရေးသားမှုများရှိသည်။

အဆိုပါ တန့်ဆည်မြို့ကို PDF များက နိုဝင်ဘာလ (၂၈) ရက် နှင့် (၂၉) ရက်များတွင်  တိုက်ခိုက်ခဲ့သော်လည်း လုံခြုံရေးပူးပေါင်းအဖွဲ့များ၏ တန်ပြန်တိုက်ခိုက်ခဲ့မှုကြောင့်  အကြမ်းဖက်သမား အများအပြား ထိခိုက်သေဆုံးခဲ့ပြီး ဆုတ်ခွာထွက်ပြေးသွားခဲ့ကြသည်ဟု နစကက ဆိုသည်။ 

ထို့ပြင် ယနေ့ (နိုဝင်ဘာလ ၃၀ ရက်)တွင်လည်း တန့်ဆည်မြို့ပေါ် နှင့် တန့်ဆည်မြို့နယ်ရှိ ကျေးရွာများတွင် တိုက်ပွဲဖြစ်ပွားမှု လုံးဝမရှိကြောင်း၊ သတင်းအမှားများသာဖြစ်သည်ဟု နစကက ထုတ်ပြန်ထားသည်။