Pika (NSS) - နိုဝင်ဘာ ၂၉

မန်စီးတီးအသင်းကစားသမားများအနေဖြင့် ၎င်းတို့၏ အမှားများမှ သင်ခန်းစာယူရမည်ဖြစ်ကြောင်း မန်စီးတီး နည်းပြဂွါဒီယိုလာက သတိပေးပြောခဲ့သည်။ 

RB လိုက်ပ်ဇစ်အသင်းကို (၃)ဂိုး-(၂)ဂိုးဖြင့် အနိုင်ရရှိခဲ့သည့် ချန်ပီယံလိဂ်ပွဲစဉ်တွင် မန်စီးတီးအသင်းသည် ပထမပိုင်း (၁၃)မိနစ် နှင့် (၃၃)မိနစ်တို့တွင်  (၂)ဂိုးပေးခဲ့ရကာ တစ်ဖက်အသင်း၏ ဖိအားပေးကစားခြင်းများကို ခံခဲ့ရကြောင်း လည်း သိရသည်။ 

မန်စီးတီးအသင်းသည် ပထမပိုင်းတွင် ခံစစ်ပိုင်းအမှားများကြောင့် ဖိအားပေးကစားခြင်းများကို ခံခဲ့ရပြီး RB လိုက်ပ်ဇစ်အသင်း တိုက်စစ်မှူး Lois Openda က နှစ်ဂိုးသွင်းယူနိုင်ခဲ့ခြင်းဖြစ်ကြောင်း သိရသည်။ သို့သော်လည်း မန်စီးတီးအသင်းသည် ဒုတိယပိုင်းတွင် အကောင်းဆုံးပုံစံဖြင့် ပြန်လည်ကစားနိုင်ခဲ့ပြီး ဟာလန်း၊ ဖိုဒန် နှင့် ဂျူလီယန်အဲဗာရက်ဇ်တို့က တစ်ဂိုးစီပြန်လည် သွင်းယူပေးနိုင်ခဲ့ပြီးနောက် (၃)ဂိုး-(၂)ဂိုးဖြင့် အနိုင်ရရှိခဲ့ခြင်းဖြစ် သည်။

နည်းပြဂွါဒီယိုလာက "ချဲလ်ဆီးအသင်းနဲ့ကစားခဲ့တဲ့ ပရီးမီးယားလိဂ်ပွဲစဉ်တုန်းက ကျွန်တော်တို့လုပ်ခဲ့မိသလိုမျိုး (၄)ဂိုးပေးခဲ့ရတာဟာ ပုံမှန်တော့မဟုတ်ပါဘူး။ ပြီးခဲ့တဲ့ရာသီတုန်းက အဲဒီလိုဖြစ်တာမျိုး မရှိခဲ့ပါဘူး။ ကျွန်တော်တို့ ဒီထက်ပိုပြီး တိုးတက်အောင်လုပ်ရပါမယ်။လီဗာပူးလ်အသင်းနဲ့ကစားခဲ့တဲ့ ပရီးမီးယားလိဂ်ပွဲစဉ်တုန်းက ကျွန်တော် တို့ဆုံးဖြတ်ချက်တွေက ကောင်းမွန်ပြီး အကောင်းဆုံးခြေစွမ်းပြကစားနိုင်ခဲ့ပါတယ်။ ကျွန်တော်တို့ ဒီထက် အများကြီး ပိုကောင်းလာအောင် ကြိုးစားရပါမယ်။ ဒီနေ့မှာတော့ ကျွန်တော်တို့ ကံကောင်းသွားခဲ့တာပါ" ဟု ပြောခဲ့သည်။

မန်စီးတီးအသင်းသည် ၎င်းတို့နောက်ဆုံးကစားခဲ့သော ပြိုင်ပွဲစုံ(၃)ပွဲတွင် သွင်းဂိုး(၇)ဂိုးထိ ပေးခဲ့ရကြောင်းလည်း သိရသည်။ ထို့အပြင် မန်စီးတီးအသင်းသည် လာမည့် ဒီဇင်ဘာလ(၃)ရက်တွင် စပါးအသင်း နှင့် ပရီးမီးယားလိဂ်ပြိုင်ပွဲကို အကြိတ်အနယ်ယှဉ်ပြိုင်ကစားရမည်ဖြစ်ကြောင်း သိရသည်။