ဂျန်ဇက် (NSS) - နိုဝင်ဘာ ၂၉

အီရန်နိုင်ငံဟာ ရုရှားနိုင်ငံထံကနေ Sukhoi su-35 အမျိုးအစား တိုက်လေယာဉ်တွေ လွှဲပြောင်းဝယ်ယူဖို့ အပြီးသတ် စီစဉ်ဆောင်ရွက်သွားမယ်လို့ အီရန်ကာကွယ်ရေးဝန်ကြီးဌာန လက်ထောက်ဝန်ကြီးက ပြောပါတယ်။ 

အီရန်ဟာ ရုရှားနိုင်ငံထံကနေ Sukhoi su-35  တိုက်လေယာဉ်တွေ ဝယ်ယူဖို့ စီစဉ်ခဲ့ပေမယ့် နှောင့်နှေးမှုတွေ ရှိခဲ့ကြောင်း သိရပါတယ်။ အီရန်ကာကွယ်ရေးဝန်ကြီးဌာန ဒုတိယဝန်ကြီး Mehdi Farahi က "ရုရှားနိုင်ငံထုတ် Sukhoi Su-35  တိုက်လေယာဉ်တွေ၊ Mil Mi-28  တိုက်ခိုက်ရေးသုံးရဟတ်ယာဉ် နဲ့ Yak-130 တိုက်လေယာဉ်တွေ ဟာ အီရန်စစ်တပ်ရဲ့တိုက်ခိုက်ရေးလုပ်ငန်းတွေအတွက် မကြာခဏရောက်ရှိတော့မှာပါ" လို့ ပြောပါတယ်။ 

အီရန်စစ်တပ်ဟာ ၁၉၇၉ ခုနှစ် မတိုင်က အီရန်လေတပ်မှာအသုံးပြုနေခဲ့တဲ့ သက်တမ်းရင့် အမေရိကန်မော်ဒယ်နဲ့ ရုရှားတိုက်လေယာဉ်တွေနေရာမှာ အစားထိုးဖို့ ရုရှားနိုင်ငံထံကနေ တိုက်လေယာဉ်တွေ  ဝယ်ယူခဲ့တာဖြစ်ပါတယ်။ အီရန်ဟာ ပြည်တွင်းမှာလည်း ကိုယ်ပိုင်တိုက်လေယာဉ်တွေထုတ်လုပ်နေပြီး ၂ဝ၁၈ ခုနှစ်က Kowsar အမည်ရှိ တိုက်လေယာဉ်တွေကို စတင်ထုတ်လုပ်ခဲ့ကြောင်း သိရပါတယ်။

အဆိုပါ တိုက်လေယာဉ်တွေဟာ အမေရိကန်နိုင်ငံက ၁၉၆ဝ ပြည့်နှစ်မှာ ထုတ်လုပ်ခဲ့ဖူးတဲ့  F-5 တိုက်လေယာဉ်တွေ ပုံတူ ထုတ်လုပ်ထားခြင်းမျိုးဖြစ်ကြောင်း စစ်ရေးကျွမ်းကျင်သူများက ပြောပါတယ်။ အီရန်ဟာ ဂါဇာစစ်ပွဲနဲ့ ပတ်သက်ပြီး အစ္စရေး၊ အမေရိကန်နိုင်ငံတို့နဲ့ တင်းမာမှုတွေရှိနေချိန်မှာ ရုရှားနိုင်ငံထံကနေ တိုက်လေယာဉ်တွေ လွှဲပြောင်းလက်ခံဖို့ စီစဉ်ခဲ့တာဖြစ်ပါတယ်။