ဂျန်ဇက် (NSS) - နိုဝင်ဘာ ၂၉

အမေရိကန်စစ်လေယာဉ်တစ်စီးဟာ နိုဝင်ဘာ ၂၉ ရက် နံနက်ပိုင်းမှာ ဂျပန်နိုင်ငံ ယူကူရှီမားကျွန်းအနီး သမုဒ္ဒရာထဲကို ပျက်ကျသွားခဲ့ကြောင်း ဂျပန်ကမ်းခြေစောင့်တပ်ဖွဲ့က ပြောပါတယ်။ 

Osprey အမျိုးအစား စစ်လေယာဉ်ပေါ်မှာ စစ်သား ၈ ဦး လိုက်ပါခဲ့ပြီး လေယာဉ်ပေါ်မှာ လိုက်ပါသွားသူများ ဘေးကင်းရေး အပါအဝင် စစ်လေယာဉ်ပျက်ကျရတဲ့အကြောင်းအရင်းကို အတိအကျမသိသေးကြောင်း ဂျပန်ကမ်းခြေစောင့်တပ်ဖွဲ့ပြောရေးဆိုခွင့်ရှိသူတစ်ဦးက ပြောပါတယ်။

ဂျပန်သတင်းဌာနတစ်ခုကတော့ စစ်လေယာဉ်ရဲ့ဘယ်ဖက်အင်ဂျင်မှာ မီးလောက်ကျွမ်းကျင်မှုများဖြစ်ကာ အင်ဂျင်ပေါက်ကွဲကာ ပင်လယ်ထဲကို ပျက်ကျသွားခဲ့တာဖြစ်တယ်လို့ ဆိုပါတယ်။ အဆိုပါစစ်လေယာဉ် ပျက်ကျရတဲ့အကြောင်းအရင်းနဲ့ပတ်သက်ပြီး အမေရိကန်စစ်ဘက်ကတော့ တစ်စုံတရာ သတင်းထုတ်ပြန်ခြင်းမျိုး မရှိသေးကြောင်း သိရပါတယ်။

အမေရိကန်စစ်ဘက်က လက်ရှိအချိန်မှာ သတင်းအချက်အလက်များကို စုဆောင်းနေဆဲဖြစ်ကြောင်း၊ လေယာဉ်ကို ပြန်လည်ရှာဖွေတွေ့ရှိချိန်မှသာ ပျက်ကျရတဲ့အကြောင်းအရင်းကို အတိအကျပြောဆိုနိုင်မယ်လို့ ဆိုထားပါတယ်။ 

ပြီးခဲ့တဲ့ သြဂုတ်လကလည်း သြစတြေးလျနိုင်ငံ မြောက်ပိုင်းမှာ စစ်ရေးလေ့ကျင့်ချိန်အတွင်း အမေရိကန် Osprey စစ်လေယာဉ်ပျက်ကျခဲ့ဖူးပြီး၊ အဲဒီအချိန်တုန်းက လေယာဉ်ပေါ်မှာ လိုက်ပါခဲ့တဲ့ မရိန်းတပ်သားသုံးဦး သေဆုံးခဲ့ဖူးကြောင်း သိရပါတယ်။

ဒါ့အပြင် အဆိုပါအမျိုးအစား စစ်လေယာဉ်တစ်စီးဟာ ၂ဝ၁၆ ခုနှစ် ဒီဇင်ဘာလကလည်း ဂျပန်နိုင်ငံတောင်ပိုင်း အိုကီနာဝါကျွန်းမှာ ပျက်ကျခဲ့ဖူးကြောင်း သိရပါတယ်။