ယွန်း (NSS) - နိုဝင်ဘာ ၂၉

ရက်ချိန်းတိုကင်မရှိသူများကို လာမည့် ဒီဇင်ဘာလ(၄)ရက်မှစ၍ နိုင်ငံကူးလက်မှတ်အသစ် ပြုလုပ်ပေးမည်မဟုတ်ကြောင်း ထိုင်းနိုင်ငံရှိ မြန်မာသံရုံးက ထုတ်ပြန်ကြေညာထားသည်။

ထိုင်းနိုင်ငံ၊ ဘန်ကောက်မြို့ရှိ မြန်မာသံရုံးက ယမန်နေ့(နိုဝင်ဘာလ ၂၈ ရက်)တွင် အထက် ပါကဲ့သို့ အသိပေးထုတ်ပြန်ထားခြင်းဖြစ်သည်။

မြန်မာသံရုံး(ဘန်ကောက်)၌ ၂၀၂၄ ခုနှစ်၊ ဒီဇင်ဘာလ(၃၁)ရက်တွင် (PJ) အမျိုးအစား နိုင်ငံကူးလက်မှတ် သက်တမ်းကုန်ဆုံးမည့်သူများကို နိုင်ငံကူးလက်မှတ်အသစ်ပြုလုပ်ပေးလျက်ရှိကြောင်း သိရသည်။

ထိုသို့ ဆောင်ရွက်ပေးလျက်ရှိရာ နေ့စဥ် Walk-in လာရောက်သူများ စနစ်တကျဆောင်ရွက်နိုင်ရေးအတွက် တိုကင်ရယူပြီး သတ်မှတ်ရက်၌ လာရောက်လုပ်ကိုင်သည့်စနစ်ကို ပြန်လည်စတင်သွားမည်ဖြစ်ကြာင်း ထုတ်ပြန်ထားသည်။

ထို့ကြောင့် ဒီဇင်ဘာလ(၂)ရက်မှစ၍ စနေနေ့တိုင်း ရက်ချိန်းတိုကင်ပေးအပ်သွားမည်ဖြစ်ပြီး ရက်ချိန်းတိုကင်မရှိသူများကို ဒီဇင်ဘာလ(၄)ရက်မှစ၍ နိုင်ငံကူးလက်မှတ် လက်ခံပြုလုပ်ပေးမည်မဟုတ်ကြောင်း သံရုံးမှထုတ်ပြန်ထားသည်။

စက်ရုံ၊ အလုပ်ရုံများမှ အမည်စာရင်းပေးပို့သူများကို ယခင်အတိုင်းသံရုံးဟောင်းတွင် အလှည့်ကျစနစ်အတိုင်း ပြုလုပ်ပေးမည်ဖြစ်ကြောင်း ထုတ်ပြန်ချက်တွင် ဖော်ပြထားသည်။