Pika (NSS) - နိုဝင်ဘာ ၂၇ 

တောင်ကိုရီးယားသမ္မတယွန်ဆက်ယိုလ်သည် နိုဝင်ဘာလ(၂၆)ရက်တွင် ထောက်လှမ်းရေးအေဂျင်စီ အကြီးအကဲနှင့် ၎င်း၏ လက်ထောက်နှစ်ဦးတို့၏ ရာထူးမှ နှုတ်ထွက်စာကို လက်ခံခဲ့ကြောင်း ယွန်ဆက်ယိုလ်၏ ရုံးက ပြောကြားခဲ့သည်။

သို့သော်လည်း ထောက်လှမ်းရေးအကြီးအကဲနှင့် ၎င်း၏ လက်ထောက်နှစ်ဦး ရာထူးမှ နှုတ်ထွက်ရခြင်းအကြောင်းအရင်းများကို ယွန်ဆက်ယိုလ်၏ ရုံးက အသေးစိတ်ဖော်ပြပြောဆိုခဲ့ခြင်းမျိုး မရှိခဲ့ကြောင်း သိရသည်။

အမျိုးသားထောက်လှမ်းရေးဌာန(NIS) တွင် ယခင်က ဝန်ထမ်းများ အပြောင်းအလဲလုပ်စဉ်အချိန်အတွင်း ပြဿနာ များရှိခဲ့ကြောင်း ဒေသတွင်းမီဒီယာများက ဖော်ပြခဲ့သည်။

အမေရိကန်နှင့် မြောက်ကိုရီးယားရေးရာကျွမ်းကျင်သူ ဝါရင့်သံတမန် Kim Kyou-hyun သည် ယွန်ဆက်ယိုလ် သမ္မတ ရာထူးကို စတင်ရယူခဲ့သည့် ၂ဝ၂၂ ခုနှစ် မေလကတည်းက NIS ဌာနကို ကြီးကြပ်ခဲ့ကြောင်းလည်း သိရသည်။ 

ထို့အပြင် ယွန်ဆက်ယိုလ်သည် လစ်ဟာသွားသော လက်ထောက်နေရာ ရာထူးများအတွက် NIS ဌာနမှ အကြီးတန်း အရာရှိနှစ်ဦးကို ချက်ချင်းလွှဲပြောင်းခန့်အပ်ခဲ့ကြောင်း သိရသည်။ ယွန်ဆက်ယိုလ်သည် နောက်ထပ် ဒါရိုက်တာ ရာထူးကို အမည်စာရင်းတင်သွင်းခြင်းမျိုးမရှိသေးသော်လည်း အဆိုပါအချက်မှာ လွှတ်တော်၏ အတည်ပြကြားနာ မှုအပေါ် မူတည်ကြောင်း သိရသည်။

ယွန်ဆက်ယိုလ်၏ ရုံးက "Kim Kyou-hyun ဟာ အစိုးရအပြောင်းအလဲကာလအတွင်းမှာ NIS ဌာနကို နိုင်ငံရဲ့ ထိပ်တန်းလုံခြုံရေးထောက်လှမ်းရေးအေဂျင်စီဖြစ်လာစေဖို့နဲ့ မိတ်ဖက်နိုင်ငံတွေရဲ့ ထောက်လှမ်းရေးအေဂျင်စီ တွေနဲ့ ပူးပေါင်းဆောင်ရွက်တဲ့စနစ်တစ်ခုတည်ဆောက်ဖို့ လုပ်ဆောင်ခဲ့ပါတယ်" ဟု ပြောခဲ့သည်။

အဆိုပါနှုတ်ထွက်စာများသည် ယခုနှစ်ဇွန်လတည်းက  အမျိုးသားထောက်လှမ်းရေးဌာန(NIS) တွင် ဖြစ်ပွားခဲ့သော ဝန်ထမ်းစီမံခန့်ခွဲမှုဆိုင်ရာကိစ္စရပ်များ နှင့် ဆက်စပ်နေပုံပေါ်ကြောင်း ပြည်တွင်းမီဒီယာများက ဖော်ပြခဲ့သည်။

မြောက်ကိုရီးယားသည် ၎င်း၏ လက်နက်အစီအစဉ်များကို ပိုမိုအရှိန်မြှင့်လုပ်ဆောင်နေပြီး ပြီးခဲ့သည့်သီတင်းပတ် အစောပိုင်းတွင် ၎င်း၏ ပထမဆုံး စစ်ဘက်သုံးစပိုင်ဂြိုလ်တုကို ကမ္ဘာပတ်လမ်းကြောင်းထဲသို့ အောင်မြင်စွာ လွှတ်တင်နိုင်ခဲ့ပြီးနောက် တောင်ကိုရီးယားအမျိုးသားထောက်လှမ်းရေးဌာနတွင် ယခုကဲ့သို့ အပြောင်းအလဲများ ထွက်ပေါ်လာခြင်းဖြစ်သည်။