Pika (NSS) - နိုဝင်ဘာ ၂၅

ဂါဇာကမ်းမြောင်ဒေသရှိ ဟားမက်လက်နက်ကိုင်အဖွဲ့က ပြန်လွှတ်ပေးလိုက်သော အစ္စရေးဓါးစာခံ(၁၃)ဦးသည် အစ္စရေးသို့ပြန်လည်ရောက်ရှိလာပြီဖြစ်ပြီး ဆေးကုသမှုများကိုလုပ်ဆောင်နေပြီဖြစ်ကြောင်း အစ္စရေးစစ်တပ်က နိုဝင်ဘာလ(၂၄)ရက်တွင် ထုတ်ပြန်ပြောဆိုခဲ့သည်။

အစ္စရေးနှင့်ဟားမက်လက်နက်ကိုင်အဖွဲ့ကြား လေးရက်ကြာအပစ်ခတ်ရပ်စဲရန် စီစဉ်ထားသည့် ပထမဆုံးနေ့အပြီးတွင် ယခုကဲ့သို့ ဓါးစာခံ လွှတ်ပေးမှုများ ထွက်ပေါ်လာခြင်းဖြစ်သည်။ အဆိုပါဓါးစာခံများထဲတွင် ကလေးငယ်(၄)ဦး နှင့် သက်ကြီးရွယ်အိုအမျိုးသမီး(၆)ဦးတို့ပါဝင်ကြောင်း အစ္စရေးဝန်ကြီးချုပ်နေတန်ရာဟု၏ ရုံးကပြောကြားခဲ့သည်။ လွတ်မြောက်လာသော ဓါးစာခံများသည် အစ္စရေးတွင် ကနဦးဆေးစစ်မှုများကိုလုပ်ဆောင်ခဲ့ပြီး ၎င်းတို့မိသားစုများနှင့် ပြန်လည်ပေါင်းစည်းစေမည့် ဆေးရုံများသို့ခေါ်ဆောင်သွားမည်ဖြစ်ကြောင်း အစ္စရေးစစ်တပ်ကပြောကြားခဲ့သည်။

ထို့ပြင်ဟားမက်လက်နက်ကိုင်အဖွဲ့က ဓါးစာခံအဖြစ် ဖမ်းဆီးထားသော အစ္စရေးနိုင်ငံသားများနှင့်နိုင်ငံ ခြားသား(၂၄၀)ဦးအနက်မှ အနည်းဆုံးလူ(၅၀)ခန့်သည် လာမည့်ရက်ပိုင်းအတွင်း လွတ်မြောက်လာမည်ဟု မျှော်လင့်ရကြောင်း အစ္စရေးစစ်တပ်ကပြောကြားခဲ့သည်။ အပြန်အလှန်အနေဖြင့် အစ္စရေးအစိုးရသည် ၎င်းတို့ဖမ်းဆီးထိန်းသိမ်းထားသော ပါလက်စတိုင်းအမျိုးသမီးများနှင့် အရွယ်မရောက်သေးသော ကလေးငယ် စုစုပေါင်း(၃၉)ဦးကို နိုဝင်ဘာလ(၂၄)ရက်တွင် ပြန်လွှတ်ပေးခဲ့ကြောင်းသိရသည်။

အစ္စရေးဓါးစာခံများအပြင် ထိုင်းနိုင်ငံသားဓါးစာခံ(၁၀)ဦးနှင့် ဖိလစ်ပိုင်နိုင်ငံသား(၁)ဦးတို့လည်း သီးခြားသဘောတူညီချက်တစ်ခုအရ ပြန်လည်လွတ်မြောက်လာခဲ့ကြောင်း ကာတာကြားဝင်စေ့စပ်သူများကပြောကြားခဲ့သည်။ ထို့ပြင် ဟားမက်လက်နက်ကိုင်အဖွဲ့၏ ဖမ်းဆီးခြင်းကို ခံထားရသော ဓါးစာခံအားလုံး ပြန်လည်လွတ်မြောက်လာစေရန်အတွက် ဆက်လက်လုပ်ဆောင်သွားမည်ဖြစ်ကြောင်း အစ္စရေးဝန်ကြီးချုပ်နေတန်ရာဟုက ကတိပြုပြောဆိုခဲ့သည်။

နေတန်ရာဟုက "ဒါဟာ ဒီစစ်ပွဲရဲ့ပန်းတိုင်တွေထဲကတစ်ခုဖြစ်ပြီး အခြားပန်းတိုင်တွေအားလုံးကို ဆက်လက်အရောက်လှမ်းနိုင်ဖို့ ကျွန်တော်တို့ ကတိပြုထားပါတယ်"ဟု ပြောဆိုခဲ့သည်။

အစ္စရေးနှင့်ဟားမက်လက်နက်ကိုင်အဖွဲ့ကြား နိုဝင်ဘာလ(၂၄)ရက်က လုပ်ဆောင်ခဲ့သော ဖမ်းဆီးထားသူများ အပြန်အလှန် လွှတ်ပေးခြင်းသည် အစပျိုးမှုတစ်ခုဖြစ်ပြီး ဂါဇာကမ်းမြောင်ဒေသတွင် ယာယီအပစ်ခတ်ရပ်စဲရေးကို သက်တမ်းတိုးရန် အခွင့်အလမ်းများရှိနေကြောင်း အမေရိကန်သမ္မတဂျိုးဘိုင်ဒန်ကပြောဆိုခဲ့သည်။

သမ္မတ ဂျိုးဘိုင်ဒန်က "အစ္စရေးနဲ့ ပါလက်စတိုင်းတို့ကြားမှာ ငြိမ်းချမ်းရေးအတွက် ပြည်နယ်နှစ်ရပ်ဖြေရှင်းချက်တစ်ခုဖန်တီးဖို့ အချိန်ကျရောက်နေပါပြီ။ ပြီးတော့ ယာယီအပစ်ခတ်ရပ်စဲရေးကို သက်တမ်းတိုးဖို့အတွက် အခွင့်အလမ်းတွေကရှိတယ်လို့ ကျွန်တော်ထင်ပါတယ်"ဟု ပြောဆိုခဲ့သည်။